¿Chuntiya Jesucristo aktsu skgata?

Papaʼ xla diciembre xlikalanka katiyatni tasiyakgo dibujo chu muñeco xla Jesús nema aku lakachinit mamikanit niku xmujukan xliwat animales. Pero ¿nalakpuwanaw pi Jesús chuntiya aktsu skgata?...a Talakaskin atanu la nalakapastakaw. ¿La nalakapastakaw? Kalakapastakwi tuku titaxtukgolh xkuentajtlawananin borregos akgtum katsisni, akxni xwilakgolh kpukuxtu lakatsu kBelén.

Chatum ángel katasiyanilh xkuentajtlawananin borregos chu kawanilh: «Chiyu lakachilh [...] mimakgaputaxtinakan wanti wanikan nCristo». Alistalh kawanilh pi xʼamakgolh tekgskgo Jesús «putamakgswitnit lhakgat, na kxpuway kawayu ntajuma». Chu tasiyakgolh lhuwa ángeles chu tsukukgolh kilhtlinikgo Dios.

¿La xmakgkatsi komo xkgaxpatti pi ángeles kilhtlinimakgolh Dios?... Tiku xkuentajtlawakgo borregos lu paxuwakgolh. «Kaw kBelén, lawanikgo, na naukxilha yuma ntu lanit». Anta tekgskgolh «María, chu José, chu skgata; xma kxpuway kawayuj».

Ni lhuwa kilhtamaku titaxtulh chankgolh kBelén atanu latamanin. Akxni xkuentajtlawananin borregos kawanikgolh kawanikgolh tuku xlanit, nila xkanajlakgo. ¿Lakgatiya xkatsini la uma tuku lichuwinaw xlakata Jesús?... Putum tiku paxkiyaw Dios nachuna makgkatsiyaw. La uku kaʼakxilhwi tuku xlakata lu paxuwakgolh akxni katsikgolh pi xlakachinit Jesús. Xlakata nakatsiyaw, kalakapastakwi akxni María nina xtamakgaxtokgnit.

Akgtum kilhtamaku, chatum ángel wanikan Gabriel lakgapaxialhnalh María xlakata nawani pi xʼama kgalhi aktsu skgata. Wanilh pi aktsu xkgawasa lu lanka xʼama wan chu xwanika «xKam Dios». Alistalh wanilh pi mapakgsina xʼama wan chu xtamapakgsin putum kilhtamaku xtawi.

María xkatsiputun la xʼama kgalhi aktsu skgata xlakata nitu xtawi chatum chixku. Gabriel wanilh: «Wa Spiritu Santo namin kmiokgspun» chu «skgata ntu nalakachin, Xkam Dios nalitapakuwiy». Jehová xʼama tlawa akgtum lanka milagro: xʼama tiya xlatamat xKgawasa chu xʼama wili kxpan María, xlakata kstakli chuna la stakkgo laktsu kamanan.

¿Akxilhnita kdibujos chu likaxtlawan nema wilikan kNavidad chu wilakgolh chatutu «reyes magos» tiku lakgapaxiʼalhnamakgolh Jesús?... Pero uma ni chuna lanit. «Reyes magos» tiku lakgapaxialhnankgolh Jesús astrólogos xwankgonit, uma tuku xtlawakgo ni lakgati Dios. Kaʼakxilhwi tuku lalh akxni chankgolh niku xwi Jesús. Biblia wan: «Akxni chu tanukgolh kchiki, chu [...] ukxilhkgolh aktsu kgawasa [...] xtsi María». Uma kinkamasiyaniyan pi Jesús nialh aktsu skgata xwanit chu ni anta xwi kxpuway kawayu; tsinu lankata xwanit chu wa xtawilakgolh José chu María kʼakgtum chiki.

¿Katsiya la tekgskgolh astrólogos Jesús?... Wa stalanikgolh nema xtachuna xtasiya la akgtum staku. Pero uma «staku» pulana kalilh kJerusalén, niku xwi mapakgsina Herodes chu alistalh kalilh kBelén. Biblia lichuwinan pi mapakgsina Herodes xkatsiputun niku xwi Jesús xlakata namakgni. ¿Tiku wililh ama «staku»?... Ni wa wililh Dios; wa Satanás tiku xtalatlawana.

Satanás lakaskin pi kalakpuwanka pi Jesús aktsu skgata. Pero kalakapastakti pi ángel Gabriel wanilh María: «[Jesús] xaliankgalhin xmapakgsinakan nawan [...], xlimapakgsin, niukxni katikgalhilh xlisputni». Jesús mapakgsina kʼakgapun, chu nialh makgas nakamasputu xtalamakgasitsin Dios. Chuna kililakapastakatkan, chu wa uma tuku kilimasiyanitkan latamanin.