¿La nakamakgtayayaw tiku lakxtlawakgonit xtamakgaxtokgatkan?

Max lakgapasa tiku lakxtlawanit xtamakgaxtokgat, chu max ni kaj chatum. Xlakata lu lhuwa tiku lakxtlawakgo xtamakgaxtokgatkan. Kalichuwinaw uma, kPolonia lakputsaka la wilakgolh tamakgaxtokgat chu tasiyalh pi tiku kgalhikgo puxamakaw kata, chu akgtutu kata lata akxni latatamakgaxtokgnit o akgchaxan tlakg lakxtlawakgo xtamakgaxtokgatkan. Pero uma ni wamputun pi kajwatiya umakgolh tiku lakxtlawakgo xtamakgaxtokgatkan.

Anta kʼEuropa «xliʼakgatiyun tamakgaxtokgat lakxla pulaktum», chuna wan Instituto de Política Familiar, xalak España. Chu kmakgapitsi laklanka países, nachuna lama.

LHUWA TAPUWAN NEMA NIXATLAN

¿Tuku titaxtukgo akxni wi tiku lakxtlawa xtamakgaxtokgat? ¿La makgkatsikgo? Chatum tiku lu katsini xalak Europa del Este xlakata tamakgaxtokgat wan: «Akxni wi tiku lakxtlawa xtamakgaxtokgat kaj limasiya tuku lanita, nialh latalalin chu lamakgxtakgnitta, uma lhuwa tuku nitlan tlawaninan ktalakapastakni». Chu wa pi «alistalh lu lhuwa tuku lu nitlan limakgkatsikgo la, tasitsi, lakpuwankgo pi wi tuku nitlan tlawakgolh, ni kgantaxtulh tuku xlakaskinkgo, nialh katsikgo tuku natlawakgo chu maxanankgo». Makgapitsi asta lakpuwankgo xakstukan xkamakgnika. «Akxni laktlawakgonitta xtamakgaxtokgatkan kxlakatin mapakgsinanin, alistalh min tuku atanu. Tiku lakxtlawalh xtamakgaxtokgat makgkatsi pi xakstu wi chu la nitu kxtapalh, tiku lakxtlawalh xtamakgaxtokgat max akstu natlawanikan uma takgalhskinin: “Xlakata la uku lakxlanit kintamakgaxtokgat, ¿tiku klitaxtu? ¿Xlakaskinka kilatamat?”.»

Uma tuku wan Ewa akxni lakapastaka la xmakgkatsi kata nema titaxtukgolh: «Lu klimaxanalh akxni xaklakxtlawanitta kintamakgaxtokgat, kintalakatsunin chu tiku xakkataskuja xkilimapakwikgo, “tiku lakxtlawanit xtamakgaxtokgat”. Lu xaksitsinit. Chatiy laktsu kilakgkgawasan xkimakgxtakgninit kinchixku, wa xlakata xatlat chu xatse xaklitaxtu».a Adam, tiku xlin akgkutiy kata kgolotsin xlitaxtu kcongregación, wan: «Kmakgkatsi pi nitu klitaxtu asta min kilhtamaku lu ksitsi chu klakaskin pi niti kakiʼakxilhli».

TUKU TLAWAKAN XLAKATA TLAN TAWILAPARA TALAKAPASTAKNI

Makgapitsi lu nitlan makgkatsikgo xlakata tuku nakakitaxtuni alistalh, lhuwa tiku fuerza tlawamakgolh tlantiya natawila xtalakapastaknikan maski lhuwata kata titaxtunit akxni lakxtlawakgolh xtamakgaxtokgatkan. Chu chuna la wan chatum periodista tiku lu katsini xlakata tiku lakxtlawakgo xtamakgaxtokgatkan, «la uku nalakgpalikgo tuku lismanikgonit chu nakatsinikgo xakstukan natayanikgo taʼakglhuwit».

Stanisław lakapastaka: «Akxni klakxtlawaw kintamakgaxtokgatkan, xtse kinkamanan ni xkimaxki talakaskin nakkaʼakxilha chatiy laktsu kilaktsuman. Uma tlawalh pi naklakpuwan pi nialhti xkiʼakxilhputun, xakmakgkatsi pi asta Jehová na xkimakgxtakgnit. Nialh xaklatamaputun. Chuna la titaxtulh kilhtamaku kkatsilh pi ni chuna xwanit». Wanda, tiku na xlipuwan la xʼama kitaxtuni alistalh, wan: «Xaklakpuwan pi xchaʼalh kilhtamaku akxni nialhti xkimakgtayaputulh nipara kinatalan xalak congregación, chu nipara kinkamanan xkamakgtayaka. Pero, la uku kkatsi pi lu kinkakuentajtlawakgon chu kimakgtayakgolh xakkamasiyanilh kinkamanan naskujnanikgo Jehová».

Chuna la akxilhaw, makgapitsi lu nitlan talakapastakni kalakgchin akxni lakxtlawakgo xtamakgaxtokgatkan. Max makgkatsikgo pi nitu litaxtukgo chu ni kaminini pi wi tiku nakamakgtayaputun. Nachuna, max wa tsukukgo akxilhkgo tuku nitlan tlawakgo amakgapitsin chu max lakpuwankgo pi tiku xalak congregación ni lakgalhamanankgo chu ni akgatekgsninankgo. Pero chuna la wankgolh Stanisław chu Wanda, max alistalh naʼakxilhkgo pi xnatalan xalak congregación lu kamakgtayakgonit. Asta minit kilhtamaku kakuentajtlawakgonit, maski ni tunkun makgkatsikgolh pi kamakgtayaka.

MAKGKATSIKGO PI XAKSTUKAN WILAKGOLH CHU KALAKGMAKGANKANIT

Kakatsiw pi maski lu nakamakgtayayaw tiku lakxtlawakgonit xtamakgaxtokgatkan namin kilhtamaku chuntiya namakgkatsikgo pi xakstukan wilakgolh. Tiku max tlakg makgkatsikgo pi niti kamakgtaya wa kinatalankan lakpuskatin. Alicja wan: «Titaxtunit akgtsayan kata akxni klakxtlawalh kintamakgaxtokgat pero minku kilhtamaku kmakgkatsi pi lu nitu klitaxtu. Akxni chuna kmakgkatsi klakaskin pi nitiku kakiʼakxilhi chu ktsuku ktasa chu akstu kililakgaputsakan».

Maski xlikana pi chuna makgkatsikgo tiku laktlawakgonit xtamakgaxtokgatkan, Biblia kinkastakyawayan pi ni natamakgatliniyaw amakgapitsin, xlakata uma natlawa pi “nalakgmakganaw putum xatlan liskgalala” (Prov. 18:1). Pero tiku xakstu makgkatsi, ni tlan komo makglhuwa naputsa tastakyaw o xlakata namakgoxomixi tiku ni xtapuskat o ni xtachixku. Komo chuna natlawa max natsukukgo lalakgatikgo.

Kinatalankan tiku chuna titaxtumakgolh lhuwa talipuwan kgalhikgo. Nachuna xlakata ni katsikgo la nakakitaxtuni alistalh, max makgkatsikgo pi xakstukan wilakgolh o asta kalakgmakgankan. Xlakata katsiyaw pi kgalhikgo talipuwan, chu nila lakapala titaxtu, lu kakamakgtayaw chuna la tlawa Jehová (Sal. 55:22; 1 Ped. 5:6, 7). Xlikana pi lu nakinkapaxtikatsinikgoyan. Naʼakxilhkgo pi kcongregación wilakgolh tiku xlikana tlan nakatalalinkgo (Prov. 17:17; 18:24).