«Lu tlan pi liwana lakapastakti»
DAVID, tiku xtapakgsi kxamakgan kachikin Israel, limalankilh umakgolh tachuwin chatum puskat tiku xwanikan Abigail. ¿Tuku xlakata chuna wanilh? ¿Tuku katsiniyaw xliʼakxilhtit uma puskat?
David lakgapasli Abigail akxni mapakgsina Saúl xputsastalanima. Xla xtamakgaxtokga Nabal, chatum chixku tiku xkgalhi tumin xalak kkasipijni nema xwi ksur xla Judá. David chu ksoldados xtachuna la «patsaps» nema xkakuentajtlawa xmapuchwayananin chu xborregos Nabal. Wa xlakata, David malakgachalh makgapitsi makatsininanin xlakata kskinikgolh liwat Nabal (1 Sam. 25:8, 15, 16). Ni kaj akglakgwa tuku kskimakgolh, xlakan xkuentajtlawakgonit tuku tapakgsini Nabal.
Pero Nabal limasiyalh tuku kilhchanima xtukuwani, nema wamputun «Tonto». Nitlan kgalhtinalh xlakata tuku kskima David. Wa xlakata David lakkaxlalh namalakgaxokge xlakata nitlan xlikatsininit chu nitlan xlichuwinanit. Xlakata nixatlan xtayat Nabal lu nitlan x’ama kitaxtuni xla chu tuku xtapakgsini (1 Sam. 25:2-13, 21, 22).
Akxni Abigail katsilh pi lu nitlan x’ama kitaxtu tuku x’ama tlawa David, ni pekualh chu lakapala alh laktlawa tuku nitlan xtlawaputun David. Liwana wanilh pi xlakapastakli, chu malakapastakalh la talalin Jehová. Nachuna, malaknunilh lhuwa liwat tiku mapakgsina x’ama litaxtu k’Israel chu ksoldados. David katsilh pi Dios xmaklakaskinit Abigail xlakata na malaktlawi tuku nitlan x’ama tlawa kxlakatin Jehová. Wanilh: «Chu lu tlan pi liwana lakapastakti, chu lu tlan pi tlawa ni nakmakgninan» (1 Sam. 25:18, 19, 23-35).
Ni tuwa katsikan pi kilipaxtikatsinitkan tuku tlawakan kimpalakatakan, ni xtachuna la Nabal. Nachuna akxni akxilhaw pi wi tuku nitlan ama la, wi tuku katlawaw xlakata namalakgachokgoyaw. Kaskiniw Dios chuna la salmista: «Kakimasini tlan tapuwan chu liʼakgskgalala» (Sal. 119:66 SXP).
Amakgapitsin max nalakpuwankgo pi liwana lakapastakaw chu liwana laksakaw tuku tlawayaw. Maski nakinkawanikgoyan o ni, max nalakpuwankgo la David, tiku wa: «Lu tlan pi liwana lakapastakti».