¿Xkatsiyata?

¿Wi tuku xpalakata kalimapakuwika «kgalhananin» tiku kstanankgo ktemplo xla Jerusalén?

KLIBRO xla Mateo lichuwinan: «Cha nchu ntitanulh Jesús kxtemplo Dios, na paks titamakaxtukgolh wa nti kstanamakgo, chu wa nti xtamawamakgo anta kxpulakni templo, chu na timakgpuspitnikgolh xmesajkan wa nti xlakgpalinanin tumin, chu xlaktawilhkan wa nti kstamakgo ntijtimput. Cha nchu wanikgolh: “Chuna ntatsokgnit wan: ‘Wa nkinchik, chiki xputlawakan oración nalitapakuwiy, wa mpi wa wixin, xputatsekgnikan kgalhananin tlawanitantit”» (Mat. 21:​12, 13).

Tuku lichuwinankgo judíos xlakata tiku kstanankgo ktemplo xkaʼakgskgawikgo latamanin chu lu tapalaxla xkamatajikgo. Chuna lichuwinan Misná (Keritot 1:⁠7), milh kilhtamaku kxapulana siglo, tantiy palomas nema xmakamastakan xlistakan akgtum denario xla oro. Uma xkilhchanima tuku chatum skujni tlan xtlaja puxamakitsis kilhtamaku. Limapakgsin xwan pi tiku limaxkganin tlan xmakamastakgolh tórtolas o pichones, pero chuna la xtapalh lu xtaliwakanit chu nialh la kxokgokgo (Lev. 1:14; 5:7; 12:​6-8). Rabino Simeón ben Gamaliel ni lakgatilh uma tuku xlama, chu nialh lhuwa skilh tamakamastan. Tuku kitaxtulh, wa pi xtapalh tantiy palomas lakapala taktujulh.

Chuna la lichuwinaw, Jesús wi tuku xpalakata xkalimapakuwi «kgalhananin» tiku kstanankgo ktemplo, xlakata lhuwa tuku xkgalhiputunkgo.