Natlatni, ¿kamakgtayapatit minkamanankan natatliwakglha xtakanajlakan chu natamunukgo?

1. ¿Tuku liwana katsiputunkgo natlatni tiku kstalaninanin Cristo akxni nina tamunukgo xkamanankan?

«AKGLHUWA papaʼ kkawanilh kinatlatni pi xaktamunuputun chu xlakan makglhuwa kilitachuwinankgolh xlakata uma. Xkatsiputunkgo komo xlikana lu xlakaskinka xakliʼakxilha tuku xaktlawaputun. Pero chilh ama kilhtamaku akxni tlakg xlakaskinka tuku lalh kkilatamat: akxni 31 xla diciembre kata 1934». Chuna lichuwinan chatum tala wanikan Blossom Brandt xlakata akxni tamunulh. La uku, natlatni tiku kstalaninanin Cristo na kamakgtayaputunkgo xkamanankan nalaksakkgo tuku tlan natlawakgo. Komo namamakgapalikgo xtamunutkan xkamanankan max nitlan katikakitaxtunilh (Sant. 4:17). Pero xlikana, natlatni katsiputunkgo komo xkamanankan liwana katsikgo tuku kilhchanima kstalanina Cristo litaxtukan akxni nina tamunukgo.

2. 1) ¿Tuku lilakgaputsakgo makgapitsi superintendentes xla circuito? 2) ¿Tuku naʼakxilhaw kʼuma artículo?

² Makgapitsi superintendentes xla circuito lu lilakgaputsakgo xlakata kalakgapaskgo lhuwa kamanan tiku kgalhikgo akgpuxam kata chu kamakgastakkanit kfamilias niku xtatayananin Jehová chu nina tamunukgo. Lhuwa tiku ankgo ktamakxtumit, ankgo lichuwinankgo Dios chu litasiyakgo pi xtatayananin Jehová. Pero wi pulaktum tuku xlakata nina tamakamastanikgo Jehová chu nina tamunukgo. ¿Tuku xlakata? Makgapitsi wa natlatni tiku wankgo pi kakgalhkgalhikgolh. ¿Tuku xlakata makgapitsi natlatni tiku xtatayananin Jehová mamakgapalikgo xtamunutkan xkamanankan? Kʼuma artículo pulaktati nalichuwinanaw tuku lilakgaputsakgo natlatni.

¿AKCHANITA XKATA KINKGAWASA XLAKATA TLAN NATAMUNU?

3. ¿Tuku xlilakgaputsakgo xnatlatni Blossom?

³ Xlikana, akgatekgsaw tuku xlakata xnatlatni Blossom xlilakgaputsakgo komo xtsumatkan xʼakchanita xkata xlakata naʼakgatekgsa tuku kilhchanima tamunut chu tuku xlakata lu xlakaskinka. ¿La tlan nakatsikgo natlatni komo xkamanankan tlantiya natamakamastanikgo Jehová?

4. ¿La kamakgtaya natlatni xlimapakgsin Jesús nema lichuwinan kMateo 28:19, 20?

⁴ (Kalikgalhtawakga Mateo 28:19, 20). Chuna la akxilhwi kʼartículo nema titaxtulh, Biblia ni lichuwinan tukuya kata tlan natamunuyaw. Maski chuna, natlatni tlan tuku tlawakgo akxni lilakpuwankgo tuku kilhchanima kstalanina Cristo nalitaxtuya. Ktachuwin griego nema lichuwinan Mateo 28:19 «kapitit, na kamasiyunikgotit xlipaks akgmakgat chixkuwin», kilhchanima pi nakamasiyaniyaw latamanin xlakata wi tiku kstalaninanin nalitaxtukgo. Kstalanina Jesús wa tiku katsini chu akgatekgsa xtamasiy chu kgalhakgaxmatputun. Wa xlakata, tuku xlitlawatkan natlatni wa nakamasiyanikgo xkamanankan lata akxni lakgskgatanku xlakata uma nakamakgtaya tlan natamunukgo chu kstalanina Cristo nalitaxtu. Xlikana chatum aktsu skgata nila tamunu xlakata ni katsi tuku kilhchanima. Pero Biblia lichuwinan pi asta laktsu kamanan tlan akgatekgsnikgo chu lhuwa xtapalh liʼakxilhkgo tuku xaxlikana xalak Biblia.

5, 6. 1) Akxni katsiniyaw tuku wan Biblia xlakata Timoteo, ¿tuku tlan nawanaw xlakata xtamunut? 2) ¿La tlan nakamakgtayakgo natlatni xkamanankan?

⁵ Timoteo laksakli naskujnani Jehová akxni kajku kgawasa xwanit. Apóstol Pablo lichuwinalh pi Timoteo liwana xlakgapasa tuku lichuwinan Biblia «lata akxni aktsinajku», kilhchanima lata skgataku xwanit. Wa xtse chu xnana tiku judíos xwankgonit masiyanikgolh nakgalhini tapaxkit tuku lichuwinan Biblia, xlakata xtlat ni kskujnani Jehová. Lu tlan kitaxtulh, xlakata tliwakga kgalhilh xtakanajla (2 Tim. 1:5; 3:14, 15). Chu akxni xkgalhi akgpuxam kata, xmakgatsi tuku xtaskin xlakata wi tuku nalakgayawakan kcongregación (Hech. 16:1-3).

⁶ Xlikana laktsu kamanan ni lakxtum. Makgapitsi lakapala katsinikgo xlakata tamunut pero makgapitsi nichuna. Makgapitsi lu laktsujku akxni tlantiya liwana lakapastaknankgo chu wankgo pi tamunuputunkgo. Pero makgapitsi tsinu makgapalakgo xlakata tlan natamunukgo. Natlatni tiku akgatekgskgo uma, ni kamalakapalikgo xkamanankan xlakata natamunukgo wata lakatsuku kamakgtayakgo xlakata tlakg nastaka xtakanajlakan. Natlatni lipaxuwakgo akxni akxilhkgo pi xkamanankan xlakaskinka akxilhkgo tuku lichuwinan Proverbios 27:11 (kalikgalhtawakga). Xlikana, natlatni ankgalhin nalilakpuwankgo pi xkamanankan tlan kstalaninanin Cristo nalitaxtukgo. Xlakata uma tuku lichuwinaw, natlatni tlan nakakgalhskinkan: «¿Kgalhi kinkgawasa xaʼakchan takatsin xlakata tlan natamakamastani Dios chu natamunu?».

¿KGALHI KINKGAWASA XAʼAKCHAN TAKATSIN?

7. ¿Talakaskin pi liwana nakatsiniyaw putum tuku lichuwinan Biblia xlakata tlan natamunuyaw? Kalichuwinanti.

⁷ Natlatni kamasiyanikgo tuku xaxlikana xkamanankan xlakata liwana nalakgapaskgo Jehová. Wa uma takatsin nema natlawa pi xkamanankan tlan natamakamastanikgo Jehová. ¿Kilhchanima uma pi liwana nakatsikgo putum tuku lichuwinan Biblia xlakata tlan natamunukgo? Nichuna. Putum tiku tamunu chuntiya nakatsinitilha xalak Biblia xlakata nakgalhi xaʼakchan takatsin (kalikgalhtawakga Colosenses 1:9, 10). Wa xlakata, ¿la xlilhuwa takatsin kilikgalhitkan xlakata tlan natamunuyaw?

8, 9. ¿Tuku katsiniyaw xliʼakxilhtit Pablo chu tiku xkuentajtlawa pulachin?

⁸ Xlakata tlan nakgalhtiyaw uma takgalhskinin, kalichuwinaw xlakata akgtum familia xalak pulana siglo (Hech. 16:25-33). Akxni xtitaxtuma kata 50, Pablo lakgapaxialhnalh kachikin xla Filipos akxni xlimakgtiy kilalh la komo misionero. Xla chu Silas kachipaka chu katamaknuka kpulachin xlakata kaliyawaka taʼakgsanin. Pero uma katsisni tachikilh tiyat chu lakxtlawalh xpatsaps pulachin chu talakkikgolh malakcha. Tiku xkuentajtlawa pulachin lu xpekuama, xlakata xlakpuwan pi tiku xtanumakgo kpulachin xtsalakgolh chu wa xlakata akstu xmakgniputunkan. Pero Pablo ni maxkilh talakaskin chuna natlawa. Xla chu Silas litachuwinankgolh Dios uma chixku chu xfamilia. Lu lanka xtapalh liʼakxilhkgolh tuku katsinikgolh xlakata Jesús chu lakapala tamunukgolh. ¿Tuku kinkamasiyaniyan uma tuku lalh?

⁹ Max uma tiku xkuentajtlawa pulachin soldado romano xwanit chu ni xlakgapasa tuku xalak Biblia. Xlakata tlan kstalanina Cristo xlitaxtulh, xtalakaskin nakatsini tuku tlakg xlakaskinka lichuwinan Biblia, naʼakgatekgsni tuku kilhchanima xlakskujni Jehová nalitaxtu chu nakgalhakgaxmata xtamasiy Jesús. Kaj ni makgas, katsinilh tuku tlakg xlakaskinka chu tsukulh paxki tuku xaxlikana, wa xlakata tamunulh. Nachuna chuntiya tsukulh katsini akxni xtamununita. Wa xlakata, ¿tuku xlitlawatkan natlatni komo xkgawasakan nakawani pi tamunuputun xlakata paxki Jehová chu kgalhakgaxmatputun? Tlan nakawani pi kakatachuwinankgolh lakgkgolotsin xalak congregación xlakata naʼakxilhkgo komo makgatsi tuku taskin xlakata tlan natamunu.a Nachuna la amakgapitsin kstalaninanin Cristo tiku tamunukgo, chuntiya katsinitilhakgo tuku xtalakaskin Dios putum kilhtamaku (Rom. 11:33, 34).

¿TUKU TLAKG TLAN TAKGALHTAWAKGA NAKGALHI KINKGAWASA?

10, 11. 1) ¿Tuku lakpuwankgo makgapitsi natlatni? 2) ¿Tuku pulana xliwilitkan kxlatamatkan natlatni?

¹⁰ Makgapitsi natlatni lakpuwankgo pi xkgawasakan talakaskin pulana nakgalhi tlan takgalhtawakga chu naputsa akgtum tlan taskujut chu alistalh natamunu. Chu max tlan tuku lakpuwankgo. Pero ¿makgtayakgo xkamanankan tlan nakgalhikgo xaxlikana tapaxuwan? Chu tuku tlakg xlakaskinka, ¿wa uma tuku masiya Biblia? ¿Tuku lakaskin Jehová natlawayaw kkilatamatkan? (kalikgalhtawakga Eclesiastés 12:1).

¹¹ Xlakaskinka nalakapastakaw pi uma kakilhtamaku chu putum tuku anan ni wa tuku Jehová lakpuwan chu lakaskin (Sant. 4:7, 8; 1 Juan 2:15-17; 5:19). ¿Tuku namakgtaya chatum aktsu kgawasa xlakata ni nakgalhi talakpuwan nema kgalhi Satanás chu xkakilhtamaku? Wa pi lu tlan xʼamigo Dios nalitaxtu. Komo natlatni wa tlakg xlakaskinka naʼakxilhkgo tuku lhuwa nakgalhiputunkgo, max xkgawasakan nachuna natsuku lakpuwan pi tlakg xlakaskinka tuku anan kkakilhtamaku nixawa la natalalin Jehová. Xlikana, ni chatum xatlat lakaskin pi tuku xalak kakilhtamaku nalaktlawa tuku laksakkgonit natlawakgo xkamanankan. Tuku limin xaxlikana tapaxuwan wa pulana nawiliyaw Jehová kkilatamatkan (kalikgalhtawakga Salmo 1:2, 3).

¿CHU KOMO KINKGAWASA NATLAWA AKGTUM LANKA TALAKGALHIN?

12. ¿Tuku xlakata makgapitsi natlatni ni kamaxkikgo talakaskin xkamanankan natamunukgo?

¹² Chatum tala puskat wanilh xtsumat pi nina natamunu. ¿Tuku xlakata? Xla lichuwinan: «Lu kmaxanan xlakata xaklakpuwan pi xmilh kilhtamaku akxni kintsumat max xtamakxtuka kcongregación». Chuna la uma tala, makgapitsi natlatni lakpuwankgo pi tlakg tlan ni natamunukgo xkamanankan asta akxni naʼakchan xkatakan xlakata tlan liwana nalaksakkgo tuku natlawakgo (Gén. 8:21; Prov. 22:15). Max lakpuwankgo pi nila katitamakxtuka kcongregación xkgawasakan komo nina tamunu. Pero x’akstukan ta’akgskgawikgo. ¿Tuku xlakata? (Sant. 1:22).

13. Komo wi tiku nina tamunu, ¿kilhchanima uma pi ni katimastalh kuenta kxlakatin Jehová? Kalichuwinanti.

¹³ Akgatekgsaw pi natlatni lakaskinkgo pi xkamanankan natamakamastanikgo Jehová chu natamunukgo akxni la tlakg liwanaja lakapastaknankgo. Pero nitlan komo nalakpuwanaw pi ni katimaxkilh kuenta Jehová kaj xlakata nina tamunu. Minkgawasa lina kuenta kxlakatin Dios akxni katsi tuku tlan chu tuku nitlan (kalikgalhtawakga Santiago 4:17). Wa xlakata, ni kawani pi kamamakgapalilh xtamunut, xlakata xatlan natlatni liskujkgo xlakata tlan liʼakxilhtit nawilikgo. Lata aktsujku kamasiyanikgo xkamanankan pi lhuwa xtapalh naʼakxilhkgo xtastakyaw Jehová xlakata la linkan latamat (Luc. 6:40). Wa uma tuku tlan namakgtaya, xlakata namasta talakaskin pi wa uma tastakyaw napulalin (Is. 35:8).

TUKU TAMAKGTAY TLAN NAMASTAKGO AMAKGAPITSI NATALAN

14. ¿La namakgtayakgo lakgkgolotsin xalak congregación natlatni?

¹⁴ Lakgkgolotsin xalak congregación tlan namakgtayakgo xanatlatni. ¿La natlawakgo? Tlan nalichuwinankgo tuku kitaxtu akxni tlakg skujnanikan Jehová. Chatum tala lakapastaka pi akxni xkgalhi akgchaxan kata, tala Russell limaxtulh akgkukitsis minuto xlakata nalitachuwinan xlakata la tlakg naskujnani Jehová. Uma tala liskujli la precursora liwaka 70 kata. Uma kinkamalakpuwaniyan pi tlan kitaxtu akxni wi tiku makgpuwantiniyaw chu waniyaw lakwan tachuwin (Prov. 25:11). Atanu tuku tlan natlawakgo lakgkgolotsin wa nakawanikgo xanatlatni chu xkamanankan pi kamakgtayanankgolh xlakata taskujut nema anan kPukgalhtawakga, nachuna laktsu kamanan nakamaxkikan taskujut nema tlantiya natlawakgo.

15. ¿Tuku tlan natlawakgo amakgapitsi natalan xlakata tlan nakamakgpuwantinikgo kamanan?

¹⁵ Chu ¿la namakgtayanankgo amakgapitsi natalan? Nalimasiyakgo pi kalilakgaputsakgo kamanan. Nachuna kuenta natlawakgo komo chuntiya tatliwakglhtilhama xtakanajlakan. Akgtum liʼakxilhtit, ¿mastalh xtakgalhtin ktamakxtumit chatum kgawasa nema liwana xlakkaxwilinit? ¿Wi tuku matitaxtilh ktamakxtumit? ¿Tayanilh akgtum taputsan xlakata xtakanajla? ¿Limaxtulh kilhtamaku xlakata nalichuwinan Dios kʼescuela? Komo chuna, xliputum kinakujkan kakawaniw lakwan tachuwin. Kaliskujwi xlakata nakatachuwinanaw kamanan akxni sputa tamakxtumit o akxni nina tsuku. Uma nakamakgtaya tlan namakgkatsikgo pi makgtapakgsikgo kxalanka congregación (Sal. 35:18).

KAMAKGTAYA MINKGAWASA XLAKATA NAMATLIWAKGLHA XTAKANAJLA CHU NATAMUNU

16, 17. 1) ¿Tuku xlakata lu xlakaskinka pi kamanan natamunukgo? 2) ¿Tukuya tapaxuwan namakgkatsikgo natlatni tiku skujnanimakgo Dios? (Kaʼakxilhti xapulana dibujo).

¹⁶ Kamakgastakkan kamanan «kxtastakyaw chu kxtalakapastakni Jehová» wa pulaktum taskujut nema lu xlakaskinka kgalhi chatum xatlat tiku skujnani Dios (Efes. 6:4; Sal. 127:3). Akxni xlakachinkgo laktsu kamanan israelitas, xmakgtapakgsikgoya kʼakgtum kachikin nema xtamakamastaninit Dios. Pero laktsu kamanan tiku lakachinkgo kfamilia niku xtatayananin Jehová, nichuna. Nachuna tapaxkit nema kgalhinikan Jehová chu tuku xaxlikana ni katikgalhi akxni nalakachitana. Kilhtamaku akxni lakachin chatum aktsu skgata, xanatlatni naliskujkgo xlakata namakgtayakgo kstalanina Cristo nalitaxtu, natamakamastani Dios chu natamunu. Wa uma tuku lu xlakaskinka. ¿Tuku xlakata? Xlakata komo natamakamastani Dios, natamunu chu naskujnani namakgtaya nalakgtaxtu klanka takatsanajwat (Mat. 24:13).

¹⁷ Kxapulana párrafo lichuwinaw tala tiku wanikan Blossom Brandt. Akxni kawanilh xnatlatni pi xtamunuputun, xlakan xkatsiputunkgo komo xlikana liwana xlakpuwanit natlawa uma tuku lu xlakaskinka kxlatamat. Akxni liwana katsikgolh, xnatlatni makgtayakgolh natlawa tuku xlaksaknit. Katsisni la nina xtamunu, xtlat wi tuku lu tlan tlawalh. Blossom lichuwinalh: «Kinkawanin pi kimputumkan xaktatsokgostaw chu alistalh tlawalh oración. Wa pi lu xlipaxuwa xlakata xtsumat xlaksaknit namakamaxki xlatamat Jehová». Akxni titaxtulh liwaka 60 kata, xla lichuwinalh: «Komo chuntiyaku klama ankgalhin naklakapastaka tuku lalh ama katsisni». Lakaskinaw pi putum xanatlatni nalipaxuwakgo akxni naʼakxilhkgo xkamanankan pi tamakamastanikgonit Jehová chu tamunukgonit.