¿Tuku wanikan Dios?

Max tuku pulana tlawayaw akxni wi tiku lakgapasputunaw kgalhskinaw: «¿Tuku wanikana?». Komo tlan xtlawaniw uma takgalhskinin Dios, ¿tuku xkinkakgalhtin?

«Akit Jehová. Wa uma kintukuwani» (Isaías 42:8).

¿Xkgaxpatnita uma tukuwani? Max ni, xlakata tiku matitaxtikgonit Biblia kʼatanu tachuwin ni lhuwa maklakaskinkgonit o ni maklakaskinkgonit. Makglhuwa lakgpalikgo chu wilikgo MALANA. Maski chuna, xtukuwani Dios min liwaka akgtujun mil xlimakglit ktachuwin nema xapulana tsokgka Biblia. Uma tukuwani limin akgtati consonantes xahebreo YHWH o JHVH, chu lhuwa kata tamatitaxtinit kxaʼespañol, la «Jehová».

Xtukuwani Dios min ktatsokgni hebreo chu klhuwa traducciones xalak Biblia.

¿TUKU XLAKATA XLAKASKINKA XTUKUWANI DIOS?

Dios xlakaskinka akxilha. Niti laksaknilh uma tukuwani; xʼakstu laksakli. Jehová wan: «Wa uma kintukuwani putum kilhtamaku, chu chuna nakililakgapasatit xliputum kilhtamaku» (Éxodo 3:15). Anta kBiblia, xtukuwani Dios tlakg makglhuwa tatekgsa nixawa tuku lilakgapaskan la, Tiku kgalhi putum litliwakga, Tlat, Malana o Dios, chu tlakg makglhuwa nixawa tukuwani la, Abrahán, Moisés, David o Jesús. Chu Jehová lakaskin pi kalakgapaswi xtukuwani. Biblia wan: «Xlakata latamanin nakatsikgo pi wix, tiku wanikan Jehová, kajwatiya wix tiku tlakg Lanka xlikalanka katiyatni» (Salmo 83:18).

Jesús xlakaskinka akxilha. Kʼoración nema lilakgapaskan padre nuestro, Jesús kamasiyanilh kstalaninanin la natlawanikgo oración Dios akxni wa: «Katamasantujlilh mintukuwani» (Mateo 6:9, Traducción del Nuevo Mundo, TNM). Chu Jesús wa uma tuku wanilh Dios kʼoración: «Tlat, kamalanki mintukuwani» (Juan 12:28, TNM). Jesús lu xlakaskinka xʼakxilha namalanki xtukuwani Dios. Wa xlakata tlan wa: «Akit kkamasiyaninit mintukuwani, chu chuntiya nakmasiya» (Juan 17:26, TNM).

Tiku lakgapaskgo Dios xlakaskinka akxilhkgo. Kskujnin Dios xala makgasa xkatsikgo pi xtukuwani Dios lu xlakaskinka xwanit xlakata nitu xkaʼakgspulalh chu xlakgtaxtukgolh. Chatum kskujni Dios wa: «Xtukuwani Jehová akgtum torre nema tliwakglh ya. Anta lakapala an tiku xaʼakgstitum, chu makgtayakan». Chu atanu na wa: «Chu putum tiku namapakuwi xtukuwani Jehová nalakgtaxtu» (Proverbios 18:10; Joel 2:32). Biblia masiya pi xtukuwani Dios wa tuku xʼamakgo litalakgapaskgo kskujnin. «Putum kachikinin, xlakan nalatamakgo kxtukuwani xdioskan; pero akinin, nalatamayaw kxtukuwani Jehová kiDioskan xliputum kilhtamaku» (Miqueas 4:5; Hechos 15:14).

¿TUKU MASIYA UMA TUKUWANI?

Kajwatiya Dios minini. Lhuwa tiku lu kgalhtawakgakgonit wankgo pi tukuwani Jehová wamputun «Xla Tlawa pi chuna Kakitaxtulh». Chuna la maklakaskilh akxni tachuwinalh Moisés kinkamakgtayayan naʼakgatekgsaw tuku kilhchanima xtukuwani. Dios wa: «Akit naklitaxtu tuku akit naklitaxtuputun» (Éxodo 3:14). Wa xlakata, xtukuwani kinkamasiyaniyan pi xla Malakatsukina, tiku tlawa pi putum kaʼanalh. Na kinkamasiyaniyan pi xla tlan nalitaxtu tuku natalakaskin o tlan natlawa pi xtamalakatsukin nalitaxtu tuku natalakaskin xlakata namakgantaxti tuku lakpuwanit. Maski tuku lilakgapaskan limasiya tuku litaxtu, xlimapakgsin o xlitliwakga, kajwatiya xtukuwani, Jehová, masiya putum tuku xla litaxtu chu tuku tlan nalitaxtu.

Limasiya pi Dios kinkalilakgaputsayan. Tuku kilhchanima xtukuwani Dios limasiya pi kapaxki putum xtamalakatsukin, asta akinin. Xlakata kinkawaniyan xtukuwani wamputun pi lakaskin kalakgapaswi. Wa tiku pulana kinkawanin tuku wanikan akxni nina akstu xkinkakgalhskinkanan tuku wanikan. Uma limasiya pi Dios ni lakaskin nalakpuwanaw pi nila lakgapaskan o makgat kinkawilanin, wata xlikana wi chu tlan nalakgtalakatsuwiyaw (Salmo 73:28).

Akxni maklakaskinaw xtukuwani, limasiyayaw pi xlikana lakgapasputunaw. Kalakpuwanti pi wi tiku miʼamigo limaxtuputuna chu waniya pi kalimapakuwin mintukuwani. ¿La xmakgkatsi komo ni chuna xtlawalh? Max xlakpuwanti pi ni xlikana mi’amigo litaxtuputun. Nachuna kitaxtu xpalakata Jehová. Xla kinkawaninitan xtukuwani chu lakaskin pi kamaklakaskiw. Akxni chuna tlawayaw limasiyaniyaw pi talakatsuwiniputunaw. Biblia wan pi Dios katsi tiku lilakpuwankgo xtukuwani (Malaquías 3:16).

Xlakata tlan nalakgapasaw Dios lu xlakaskinka nakatsiyaw tuku wanikan. Pero ni kajwatiya uma talakaskin. Talakaskin nalakgapasaw tiku lin uma tukuwani, nakatsiyaw la likatsi.