¿Xkatsiyata?

¿Tuku xtlawa mayordomo makgasata?

MAKGASATA, skujni tiku xkapulalin putum skujnin nema xwilakgo kchiki na xlakgayawakan taskujut xlakata napulalin xchik o xpukuxtu xmalana.

Akxni José, xkgawasa Jacob, chatum skujni xlitaxtu kʼEgipto, xmalana lakgayawalh putum tuku xkgalhi o xmayordomo limaxtulh. Uma chixku «tlawalh pi wa xpulalilh putuminika xchik, chu lakgayawalh putum tuku xtapakgsini» (Gén. 39:2-6). Alistalh, akxni José xlichatiy mapakgsina litaxtulh kʼEgipto, nachuna xla wi tiku lakgayawalh putum tuku xkgalhi (Gén. 44:4).

Kxkilhtamaku Jesús, tiku xkgalhikgo laklanka putawilh xʼankgo latamakgo kʼakgtum lanka kachikin, chu xmakgxtakgkgo xpukuxtukan. Wa xlakata, xputsakgo chatum tiku napulalin taskujut nema xtlawakgo skujnin kxpukuxtu chu kxchik.

¿Tuku xlitlawat xwanit chatum mayordomo? Columela, chatum romano tiku xlama kxapulana siglo, tsokgwililh o lichuwinalh pi skujni tiku xkapulalilh skujnin kʼakgtum chiki o mayordomo xtalakaskin pi xkatsilh la tlawakan uma taskujut. Xtalakaskin pi uma chixku «liwana xʼakxilhli pi skujnin xmakgantaxtikgolh xtaskujutkan, pero nikxni xkatlawanilh tuku nitlan». Nachuna lichuwinampa: «Tuku tlakg xlakaskinka xliʼakxilhat chatum mayordomo wa pi ni xlakpuwa pi putum katsi chu xtalakaskin chuntiya nakatsini».

Anta kxTachuwin Dios talichuwinan taskujut nema tlawa chatum mayordomo xlakata nalichuwinankan taskujut nema tatlawa kxkachikin Jehová. Akgtum liʼakxilhtit, apóstol Pedro kamaʼakgpuwantinilh kstalaninanin Cristo pi xlimaklakaskinkgolh tuku xkamaxkinit Dios xlakata nalamakgtayakgo «chatunu chatunu chuna la laktlan skujnanin xla xtalakgalhaman Dios» (1 Ped. 4:10).

Jesús na lichuwinalh taskujut nema tlawa chatum mayordomo akxni lichuwinalh parábola nema tekgsaw kLucas 16:1-8. Nachuna, akxni kalitachuwinalh kstalaninanin tuku xʼamakgo likatsikgo pi Mapakgsina litaxtu kʼakgapun, kawanilh pi «skujni xatalipaw chu xaskgalala» xʼama kapulalin. Taskujut nema xʼamaka lakgayawakan skujni wa pi xkamaxkilh kstalaninanin Cristo liwat xaʼespiritual nema xmaklakaskinkgolh kxaʼawatiya kilhtamaku (Mat. 24:45-47; Luc. 12:42). Paxtikatsininanaw pi makglhtinanaw likgalhtawakga nema skujni xatalipaw lakkaxwili chu maʼakgpitsi kxlikalanka katiyatni xlakata namatliwakglhaw kintakanajlakan.