Jehová kinkalakgmaxtuyan

1, 2. 1) ¿Tuku lilakgapaskan jubileo? (kaʼakxilhti recuadro «¿Tuku xwanit Jubileo?»). 2) ¿Tuku lichuwinalh Jesús kLucas 4:16-18?

KMAKGAPITSI kachikinin tlawakan akgtum paskua akxni chatum mapakgsina makgatsi tipuxamakaw kata lata tawilalh kpumapakgsin. Uma paskua lilakgapaskan jubileo. Uma paskua max makgapala akgtum kilhtamaku, akgtum semana o asta liwaka. Pero tapaxuwan ni makgapala xlakata lakapala titaxtu uma paskua.

² Anta k’Israel na xtlawakan akgtum paskua akxni xtakgatsi tipuxamakaw kata nema lu xlipaxuwakan nema xwanikan Jubileo, kilhtamaku akxni skujnin tlan xtaspitparakgo kxchikkan. ¿Tuku xlakata lu xlakaskinka uma kimpalakatakan? Xlakata kinkamalakapastakayan pulaktum tuku tlakg xlakaskinka kinkamaxkin Jehová xlakata tlan xlakgtaxtuw, akgtum lakgtaxtut nema Jesús nachuna lichuwinalh (kalikgalhtawakga Lucas 4: 16-18).

3. Chuna la wan Levítico 25:8-12, ¿la xlitamakgtayakgo israelitas paskua xla Jubileo?

³ Tlakg tlan naʼakgatekgsaw tuku xwamputun Jesús akxni lichuwinalh lakgtaxtut komo naʼakxilhaw tuku kalimapakgsilh Dios israelitas akxni xtlawakgo paskua xla Jubileo. Xla wa: «Kputum kachikin xasanto natlawayatit xlitipuxamakaw kata chu nawanatit pi putum skujnin tlan nataspitparakgo. Uma kilhtamaku akgtum paskua nalitaxtu kmimpalakatakan, chu chatunu chatunu namakglhtinampara xputawilh chu chatunu chatunu nakalakgtaspitparakgo xfamiliajkan» (kalikgalhtawakga Levítico 25:8-12). Kʼartículo nema titaxtulh, akxilhwi la tlan xkakitaxtuni israelitas akxni xkgalhakgaxmatkgo limapakgsin xlakata sábado. La uku, naʼakxilhaw la xlitamakgtayakgo Jubileo. Kalilakpuwaw pi chatum israelita xlaklin lhuwa tumin chu max stalh xputawilh xlakata naxokgo tuku xlaklin. Akxni xtlawakan paskua xla Jubileo, xmaxkiparakan xputawilh. Wa xlakata, uma chixku xmakglhtinampara tuku xkgalhi, chu chuna tlan xkamaxki xkamanan xputawilhkan. O kalilakpuwaw chatum israelita tiku max ni xkgalhi tumin chu, xlakata naxokgonan, xmasta chatum xkgawasa xlakata skujni nalitaxtu o asta xʼakstu kstakan. Akxni xlakgchan natlawakan paskua xla Jubileo, skujni tlan «xkalakgtaspitparakgo xfamilia». Chuna, skujnin tlan xkgalhikgo talakgalhaman pi nataspitparakgo kxchikkan. ¡Xlikana pi Jehová lu xkalilakgaputsa xlakskujnin!

4, 5. ¿Tuku xlakata la uku xlakaskinka kiliʼakxilhatkan paskua xla Jubileo nema xtlawakan kʼIsrael?

⁴ ¿Tuku atanu tlan xkakitaxtuni xlakata uma paskua? Jehová lichuwinalh: «Nipara chatum wixin limaxkgen xliwanat, xlakata Jehová nasikulunatlawa katiyatni nema Jehová miDioskan nakamaxkiyan xlakata milakan nawan» (Deut. 15:4). Uma nipara tsinu tatalakxtumi tuku akxilhaw kʼuma kakilhtamaku, niku latamanin tiku kgalhikgo tumin chuntiya tlakg kgalhikgo tumin chu tiku lakglimaxkgenin tlakg lakglimaxkgenin.

⁵ Akinin kstalaninanin Cristo nialhtu lilamaw xLimapakgsin Moisés. Uma kilhchanima pi ni tlawayaw tuku xwankanit xlakata nakamakgxtakgkan skujnin, nakatapatikan tiku laklinkgo tumin chu namaxkiparakan xputawilh chatum lataman (Rom. 7:4; 10:4; Efes. 2:15). Pero, wi tuku lu xlakaskinka kinkamasiyaniyan paskua xla Jubileo. ¿Tuku xlakata? Xlakata tlan nalipaxuwayaw akgtum talakgmaxtut tuku kinkamalakapastakayan Jubileo nema xtlawakgo israelitas.

JESÚS LICHUWINALH AKGTUM LAKGTAXTUT

6. ¿Tuku xlakata maklakaskinaw pi xkinkalakgmaxtukan?

⁶ Kimputumkan maklakaskinaw pi xkinkalakgmaxtukan xlakata talakgalhin xtachuna la komo xatachin kinkawilinitan. Wa xlakata, kgolonaw, tatatlayaw chu niyaw. Katsiyaw pi chuna tatakgsaw akxni anaw kpumakuchin xlakata tatatlayaw. Nachuna lu lilakgaputsayaw akxni max tlawayaw akgtum talakgalhin. Apóstol Pablo lichuwinalh: «Tachin kiwilinit talakgalhin nema wi kkimakni». Chu wampa: «¡Kgoxota chixku akit! ¿Tiku nakilakgmaxtu xlakata nima kimakni?» (Rom. 7:23, 24).

7. ¿Tuku lichuwinalh Isaías xlakata talakgmaxtut?

⁷ Jehová lakkaxwililh la tlan xkinkalakgmaxtukan ktalakgalhin. Chu limaklakaskilh Jesús xlakata uma tlan xkgantaxtulh. Ksiglo akgtsayan akxni nina xmin Cristo, palakachuwina Isaías lichuwinalh pi xʼama min kilhtamaku akxni putum latamanin tlan xlakgtaxtukgolh, nixawa tuku xtlawakan kpaskua xla Jubileo kxamakgan Israel. Xla lichuwinalh: «Xʼespíritu Malana Jehová tiku lakgchan namapakgsinan kintawi, xlakata Jehová kilaksaknit xlakata nakkalitachuwinan xalakwan xalaksasti tiku lakmansos. Kimalakgachalh xlakata nakkamakgoxamixi tiku nitlan makgkatsikgo kxnakujkan, xlakata naklichuwinan pi nakamakgxtakgkan tiku kachilinkanit» (Is. 61:1). Kaʼakxilhwi tiku xlichuwinama akxni wa umakgolh tachuwin.

8. ¿Tuku xkilhchanima tuku wa palakachuwina Isaías xlakata talakgmaxtut?

⁸ Uma lu xlakaskinka tachuwin xlakata lakgtaxtut tsukulh kgantaxtu akxni Jesús matsukilh xtaskujut xlakata nalichuwinan xTachuwin Dios. Akxni alh ksinagoga nema xwi kNazaret, niku xmakgastakkanit, likgalhtawakgalh umakgolh xtachuwin Isaías kxlakatinkan judíos tuku anta xwilakgolh. Chu wa: «Jehová kimaxkinit xʼespíritu, xla kilaksakli xlakata nakkamakatsini lakglimaxkgenin xalakwan tamakatsinin. Kimakamilh xlakata nakwan pi kakamakgxtakgka tiku xatachin wilakgolh chu xlakata nakkamalakawani tiku nila lakawanankgo, xlakata nakamakgxtakgkan tiku patinamakgolh chu xlakata naklichuwinan kata nema Jehová nakasikulunatlawa» (Luc. 4:16-19). ¿La makgantaxtilh Jesús umakgolh tachuwin?

XAPULANA TIKU KALAKGMAXTUKA

9. ¿Tukuya lakgtaxtut xkgalhkgalhimakgolh latamanin tiku xlamakgolh kxkilhtamaku Jesús?

⁹ Kxapulana siglo, tsukuka kalakgmaxtukan latamanin tiku xkalichuwinanit Isaías chu xlakata tuku likgalhtawakgalh Jesús. Xla chuna lichuwinalh akxni wa: «Uma kilhtamaku kgantaxtu uma tuku xTsokgwilikanit nema aku kgaxpattit» (Luc. 4:21). Lhuwa latamanin tiku kgaxmatnikgolh Jesús max xlakaskinkgo pi xtalakgpalilh mapakgsina xlakata nialh wa xkamapakgsikgolh Roma. Max nachuna xlakpuwankgo la chatiy lakchixkuwin tiku wankgolh: «Akinin xakkgalhkgalhimaw pi wa xla tiku xʼama lakgmaxtu Israel» (Luc. 24:13, 21). Pero liwana katsiyaw pi Jesús ni kawanilh kstalaninanin pi xtalalakatawakakgolh Romanos maski nitlan xkalikatsinikan. Wata kawanilh pi xmaxkikgolh «César tuku xla César» (Mat. 22:21). Wa xlakata, ¿la kalakgmaxtulh Jesús latamanin tiku xlamakgolh amacha kilhtamaku?

10. ¿La kalakgmaxtulh Jesús latamanin?

¹⁰ Jesús milh kKatiyatni xlakata pulaktiy la kamakgtayalh latamanin xlakata tlan nalakgtaxtukgo. Pulana, kamakgtayalh xlakata tlan xlakgmakgankgolh nixatlan xtamasiykan tiku xpulalinkgo takanajla. Lhuwa judíos xtachuna la komo xatachin xkawilinit talismanin chu nixaxlikana takanajla (Mat. 5:31-37; 15:1-11). Tiku xwankgo pi xpulalinkgo takanajla nixlikana kskujnanikgo Dios, wa xlakata xtachuna la komo nila xlakawanankgo. Akxni lakgmakgankgolh Mesías chu kxkgakganat xaʼespiritual, o xtamasiy, chuntiya kxakapukswa tamakgxtakgkgolh chu talakgalhin chuntiya xatachin kawililh (Juan 9:1, 14-16, 35-41). Jesús kamasiyanilh latamanin tiku tlan xlikatsikgo la tlan xlakgtaxtukgolh xlakata nialh tachin xkawililh nixaxlikana tamasiy chu kawilinilh lu xatlan liʼakxilhtit (Mar. 1:22; 2:23–3:5).

11. ¿Tuku xlipulaktiy kalakgmaxtulh Jesús latamanin?

¹¹ Xlipulaktiy, Jesús kalakgmaxtulh latamanin xlakata la talakgalhin xatachin xkawilinit. Xlakata xtamakamastan Jesús, Dios tlan katapati xtalakgalhinkan latamanin tiku xlikana kanajlanikgo xtamakamastan Jesús chu limasiyakgo kxlatamatkan (Heb. 10:12-18). Jesús lichuwinalh: «Komo xaKgawasa nakalakgmaxtuyan, xaxlikana nalakgtaxtuyatit» (Juan 8:36). Uma lakgtaxtut tlakg tlan xwanit chu tlakg lhuwa tiku xlitamakgtayakgolh nixawa israelitas akxni xtlawakan paskua xla Jubileo. Akgtum li’akxilhtit, chatum lataman tiku xtaspitpara kxchik akxni xtlawakan paskua xla Jubileo, tlan skujni xlitaxtupara. Nachuna, alistalh xnilh.

12. ¿Tiku xapulana litamakgtayakgolh lakgtaxtut nema Jesús lichuwinalh?

¹² Pentecostés kkata 33, Jehová kalilaksakli x’espíritu santo apóstoles chu amakgapitsin latamanin. Kalaksakli xlakata xlakkamanan nalitaxtukgo, wa xlakata x’ama kamaxki latamat k’akgapun xlakata xtamapakgsinankgolh Jesús (Rom. 8:2, 15-17). Umakgolh latamanin wa tiku pulana litamakgtayakgolh lakgtaxtut nema Jesús lichuwinalh ksinagoga xla Nazaret. Xlakan nialh xatachin xkawilinit nixaxlikana tamasiy chu talismanin nema xtlawakgo xpulalinanin takanajla nema xlakatsala xTachuwin Dios. Dios nachuna xkalakgmaxtunit klinin, nema limin talakgalhin. Lakgtaxtut nema tsukulh kkata 33 akxni kalilaksakka espíritu santo kstalaninanin Cristo, nasputa akxni na nasputa xTamapakgsin Cristo. ¿Tuku tlan nakitaxtu?

KALAKGMAXTUKAN LHUWA MILLÓN LATAMANIN

13, 14. ¿Tiku atanu litamakgtayakgo lakgtaxtut nema lichuwinalh Jesús?

¹³ La uku, lhuwa millón latamanin tiku taktujukgo «amakgapitsi borregos» litaxtukgo (Juan 10:16). Jehová nitu kalaksaknit xlakata natamapakgsinankgo Jesús k’akgapun, wata kgalhkgalhikgo tuku kamalaknuni Biblia, pi nakgalhikgo latamat nema nikxni katisputli unu kKatiyatni. ¿Na wa tuku kgalhkgalhimaw?

¹⁴ La uku lipaxuwayaw tsinu tuku lipaxuwakgo tiku natamapakgsinankgo Jesús k’akgapun. Akgtum li’akxilhtit, tlan naskinaw pi kakinkatapatikan kintalakgalhinkan xlakata kanajlaniyaw xtamakamastan Cristo. Wa xlakata, tlan talalinaw Dios chu kintalakapastaknikan xaskulunku wi (Efes. 1:7; Apoc. 7:14, 15). Nachuna kalilakpuwaw la kinkamakgtayayan xlakata nialh xatachin kinkawilinitan nixaxlikana tamasiy nema xkanajlayaw makgasata. Jesús lichuwinalh: «Nakatsiyatit tuku xaxlikana chu tuku xaxlikana nakalakgmaxtuyan» (Juan 8:32). Uma lu kinkamakgapaxuwayan xlakata nialh xatachin kinkawilinitan.

15. ¿Tuku nialh katiʼanalh kilhtamaku nema aku mima, chu tukuya tasikulunalin nalipaxuwayaw?

¹⁵ Kkilhtamaku nema aku mima lhuwa tuku nialh katiʼanalh nema la uku xatachin kinkawilinitan. Nialh makgas, Jesús nakamasputu putum nixaxlikana takanajla chu putum tamapakgsin nema tlawamakgo tuku nixatlan. Dios kuenta nakatlawa «lhuwa latamanin» tiku xlakskujnin litaxtukgo chu nakamaxki lhuwa tasikulunalin kʼakgtum paraíso unu kKatiyatni (Apoc. 7:9, 14). Nachuna, nakamalakastakwanipara lhuwa millón latamanin tiku nikgonita, nema xtachuna la xatachin kawilinit linin xpalakata xtalakgalhin Adán (Hech. 24:15).

16. ¿Tuku nialh xatachin katikawililh latamanin?

¹⁶ Akxni Jesús namapakgsinan Akgtum Mil Kata, xla chu tiku natamapakgsinankgo k’akgapun nakamakgtayakgo tiku nalatamakgo unu kKatiyatni xlakata nialh nakgalhikgo talakgalhin chu liwana natalalinkgo Dios. Uma kilhtamaku, akxni nalakkaxwiliparakan putum kakilhtamaku, xtachuna nawan la paskua nema xtlawakan kxamakgan Israel. Chu putum tiku ni makgxtakgkgo Jehová nialh katikgalhikgolh talakgalhin. Talakgalhin nialh xatachin katikawililh.

17. ¿La lichuwinan Isaías 65:21-23 pi nalatamakgo xlakskujnin Dios? (Kaʼakxilhti xmakni revista).

¹⁷ Isaías 65:21-23 (kalikgalhtawakga) lichuwinan la nawan latamat unu kKatiyatni. Xlakskujnin Dios ankgalhin wi tuku tlan natlawakgo. Biblia lichuwinan pi nakgalhikgo taskujut nema lu nakamakgapaxuwa. Liwana katsiyaw pi akxni nasputa Akgtum Mil Kata «putum tamalakatsukin nakalakgmaxtukan xlakata xatachin wilakgolh chuna la skujnin chu nalipaxuwakgo lakgtaxtut nema nakgalhikgo xlakkamanan Dios» (Rom. 8:21).

18. ¿Tuku xlakata liwana katsiyaw pi nalipaxuwayaw lu xatlan latamat?

¹⁸ Jehová kawanilh israelitas pi tlan kskujkgolh chu xjaxkgolh, chu nachuna xlakskujnin tiku nalatamakgo akxni Cristo namapakgsinan Akgtum Milh Kata tlan naskujkgo chu najaxkgo. Xlikana pi putum kskujnin nakgalhikgo kilhtamaku xlakata xtakanajlakan. Chuna la uku lu xlakaskinka nakakninaniyaw Dios, nachuna ama kilhtamaku lu xlakaskinka nawan pi nakakninaniyaw Dios xlakata tlan napaxuwayaw. Putum tiku ni makgxtakgkgo Jehová napaxuwakgo xlakata nakgalhikgo taskujut nema tlan nakamamakgkatsini chu naskujnanikgo.