¿Kkatsini la naklichuwinan Dios?
1. ¿Tuku xlakata ni nalakpuwanaw pi nila lichuwinanaw Dios?
1 Komo chuna lakpuwampat, ¡nitu kapuwanti! Ni wa tuku masiyakan kʼescuela o tuku tlakg tlan tlawayaw nema nakinkamakgtayayan xlakata tlan naskujnaniyaw Dios. Kalakapastakti pi makgapitsi xapulana kstalaninanin Cristo kawanika pi «kaj xalakchunata chixkuwin xwankgonit, ni xakgalhtawakganin», pero xlakan lu tlan xlichuwinankgo xalakwan xalaksasti. ¿Tuku xlakata? Xlakata liwana xlaksakkgonit nastalanikgo xliʼakxilhtit Jesús (Hech. 4:13, Hua Xasasti Talaccaxlan [1999]; 1 Ped. 2:21).
2. Kawanti makgapitsi la xmasiya Jesús.
2 La masiyalh Jesús. Akxni xmasiya Jesús ni xmaklakaskin lhuwa tachuwin, tuku xwan xmakgtayanan chu ni tuwa xtaʼakgatekgsa o xtamakgachakgxi. Ni lhuwa tuku xlimatsuki xtakgalhchuwin, liʼakxilhtit chu takgalhskinin nema xtlawa xkgaxmatputunkgokan (Mat. 6:26). Na lu xlikana xkamakgtayaputun latamanin (Mat. 14:14). Nachuna, akxni xchuwinan na xlimasiya pi xkgalhi limapakgsin chu xkatsi pi xaxlikana tuku xwan xlakata xkatsi pi Jehová xmakgtaya chu xmalakgachanit natlawa uma taskujut (Luc. 4:18).
3. ¿La kinkamakgtayayan Jehová liwana nalichuwinanaw xalakwan xalaksasti?
3 Jehová kinkamakgtayayan. Jehová Tlakg xaLanka Makgalhtawakgena limaklakaskin xTachuwin chu xkachikin xlakata nakinkamasiyaniyan liwana nalichuwinanaw xalakwan xalaksasti (Isa. 54:13). Jehová matsokgwilinalh la xmasiya Jesús nema tlan nalikgalhtawakgayaw chu nachuna natlawayaw. Kinkamaxkiyan xespíritu santo chu kinkalimasiyaniyan tamakxtumit xalak congregación (Juan 14:26). Nachuna, kinkamaxkiyan natalan tiku lhuwata katsikgo lichuwinankgo Dios xlakata nakinkamasiyanikgoyan tlakg liwana namasiyayaw.
4. ¿Tuku xlakata liwana katsiyaw pi tlan nakalitachuwinanaw xalakwan xalaksasti amakgapitsi?
4 Wa xlakata, ni nalakpuwanaw pi ni katikatsiw la nalichuwinanaw Dios “porque lata tu tlawayaw Dios kinkapulaniyan” (2 Cor. 3:5, Xasasti Talaccaxlan xalak Papantla). Komo naskiniyaw xtamakgtay Jehová chu liwana nalimaklakaskinaw tuku kinkamaxkinitan “chuna nitu nakinkakitsankganiyan nti skujnaniyaw Dios, paks tlan nakatsiyaw lantla natlawayaw xlipaks ntu tlan” (2 Tim. 3:17).