“Ven, sé mi seguidor”
1. Papaʼ nema mimakgo, ¿tuku tlan natlawayaw kTakgalhtawakga nema takilhtinit kBiblia kCongregación?
1 Akgtati Evangelios liwana lichuwinankgo xlatamat xKgawasa Dios kKatiyatni. Chu xlakata «nastalaniy[aw] lantla ntlawanit», xlikana pi liwana nalikgalhtawakgayaw chu lu kuenta natlawayaw kTakgalhtawakga nema takilhtinit kBiblia kCongregación, nema natsukuyaw likgalhtawakgayaw libro “Ven, sé mi seguidor” 25 xla octubre (1 Ped. 2:21; Mar. 10:21). Tlakg liwana naʼakxilhaw tuku nakinkamatliwakglhan xlakata la lichuwinanaw Dios.
2. ¿La kinkamakgtayayan xlakata la tayanilh Jesús?
2 Xliʼakxilhtit Jesús. ¿La makgkatsiya akxni wi tiku ni kgaxmatputun akxni lichuwinana Dios akgatunu chiki? Max lakapastaka xtachuwin Jesús: «Lapi kintalatlawakanit nkit, na nakatalatlawakanatit» (Juan 15:20). Pero akxni wi tiku ni kgaxmatputun ni wamputun pi kaj kinkatalatlawaman. Maski lhuwa tuku lipatinalh Jesús, makgtayalh tuku xmalaknuninit Dios. Nachuna, komo wa nalakapastakaw pi makgapaxuwamaw Jehová chu tuku nakinkamaxkiyan xlakata ni makgatsankgananimaw, na nakgalhiyaw litliwakga xlakata ni nataxlajwaniyaw (Heb. 12:2, 3; Pro. 27:11). Komo chuntiya naliskujaw xlakata nalichuwinanaw Dios, nakinkamakgtayayan Cristo Jesús (Mat. 28:20).
3. ¿La tlan na naʼakxilhaw lichuwinankan Dios chuna la xakxilha Jesús?
3 «Wa yuma nkilimakaminkanit.» Jesús pulana wililh kxlatamat nalichuwinan xTamapakgsin Dios (Luc. 4:43). Xla putum kilhtamaku lichuwinalh Dios. Xlakata lu xlakaskinka xakxilha, lakputsalh la nalichuwinan xTamapakgsin Dios. Nachuna, uku akinin kstalaninanin. ¿Tuku kinkamatlawiyan xliʼakxilhtit? ¿Wilakgo latamanin tiku tlan nakalitachuwinanaw xalakwan xalaksasti chali chali? Xtapaxkit Cristo kakinkamakgtayan xlakata lhuwa nalichuwinanaw xalakwan xalaksasti chuna la tlan tlawayaw (2 Cor. 5:14).
4. ¿La natlawayaw xlakata tlakg tlan nalichuwinanaw Dios?
4 «Ti ni chatum nchixku achuwinan xtachuna lantla yuma nchixku lichuwinan.» Kaks xkamalakawani putum latamanin chuna la xmasiya Jesús (Juan 7:46; Mat. 7:28, 29). ¿Tuku xlakata? ¿Tuku xtlawa Jesús nema ni xtlawakgo amakgapitsi makgalhtawakgananin? Xpaxki tuku xmasiya, xkapaxki latamanin tiku xkamasiyani chu pulaklhuwa tuku xlimaklakaskin akxni xkamasiyani. Akxni tlawayaw la xtlawa xaLanka Makgalhtawakgena, tlakg tlan nalichuwinanaw Dios (Luc. 6:40).
5. ¿Tuku nalakpuwanaw natlawayaw akxni nalikgalhtawakgayaw libro “Ven, sé mi seguidor”?
5 Wantuku akxilhwi uku, kaj makgapitsi tuku lu xlakaskinka kinkamasiyaniyan xlatamat Jesús. ¿Tuku atanu lu xlakaskinka tlan nakatsiniya? Anta kTakgalhtawakga nema takilhtinit kBiblia kCongregación kalakpuwanti pi “nalakgapasa xtapaxkit nCristo” akxni nachuwinana chu natlawaya chuna la tlawalh (Efe. 3:19).