Katlawa pi nakanajla tiku masiyanipat
1. ¿Tuku talakaskin xlakata liwana namaklakaskinaw Biblia akxni nalichuwinanaw xtachuwin Dios?
1 Tiku liwana lichuwinankgo xtachuwin Dios chuna la apóstol Pablo, katsikgo pi xlakata “tanks namasiyukgo yama xaxlikana xtachuwin Dios” ni kajwatiya nakalikgalhtawakganikgo tuku wan Biblia (2 Tim. 2:15, Hua Xasasti Talaccaxlan [1999]). ¿La tlan natlawayaw xlakata nakanajla tiku masiyanimaw? (Hech. 28:23.)
2. ¿La natlawayaw xlakata tiku tachuwinamaw tlakg namaxki kakni xTachuwin Dios?
2 Kamastaw talakaskin pi Biblia nakamasiyani. Pulana, talakaskin nakalikgalhtawakganiyaw kBiblia xlakata namaxkikgo kakni xliskgalala Dios nema wi anta. Akxni nalimasiyayaw pi kanajlayaw tuku wan xTachuwin Dios, natlawa pi tiku tachuwinamaw kuenta natlawani texto nema nalikgalhtawakganiyaw (Heb. 4:12). Tlan nawanaw: «Akit lu kimakgtayanit nakkatsi tuku lakpuwan Dios xlakata uma. Kaʼakxilhti tuku wan Biblia». Akxni wi tiku natachuwinanaw kalikgalhtawakganiw Biblia xlakata chuna namastayaw talakaskin pi wa namasiyani.
3. Akxni likgalhtawakganitawa akgtum texto, ¿tuku tlan natlawayaw xlakata tiku tachuwinamaw naʼakgatekgsa?
3 Xlipulaktiy, kawaniw tuku kilhchani textos. Lhuwa latamanin lu tuwa makgkatsikgo naʼakgatekgskgo o natamakgachakgxi akgtum texto xalak Biblia akxni xlimakgtumku kgaxmatkgo. Wa xlakata lakaskinkgo pi nakawaniyaw la tatalakxtumi texto, tema nema litachuwinamaw (Luc. 24:26, 27). Tlakg liwana nawaniyaw tachuwin nema tlakg xlakaskinka. Nachuna, komo natlawaniyaw akgtum takgalhskinin nakinkamakgtayayan nakatsiyaw komo akgatekgsma tuku masiyanimaw (Pro. 20:5; Hech. 8:30).
4. ¿Tuku xlipulaktutu natlawayaw xlakata nakanajlakgo tiku nakamasiyaniyaw?
4 Kalimaklakaskiw Biblia xlakata naʼakgatekgsa tiku tachuwinamaw. Xlipulaktutu, tuku nawaniyaw namalakpuwani chu nalakgchan kxnaku. Kamakgtayaw xlakata naʼakxilha la makgtaya kxlatamat texto nema likgalhtawakganimaw. Komo namaklakaskinaw Biblia, max tlan natlawayaw pi nakanajla chu nalakgpali xtapuwan (Hech. 17:2-4; 19:8). Akgtum liʼakxilhtit, akxni likgalhtawakganitawa Salmo 83:18, tlan nawaniyaw pi xlakata tlan natalalinaw chatum lataman lu xlakakaskinka nalakgapasaw xtukuwani. Tlan xkgalhskiw: «¿Lakpuwana wix pi tlakg tlan natlawaya mioración komo namaklakaskina xtukuwani Dios?». Akxni natamalakxtumiyaw texto xlatamat tiku tachuwinamaw, limasiyayaw la makgtayanan ama texto. Akxni tlawayaw pi nakanajlakgo tuku wan Biblia, natlawa pi latamanin tiku xlikana katsiputunkgo nakakninanikgo Jehová, Dios xastakna chu xaxlikana (Jer. 10:10).