¿Xatlan lakgastapu kgalhiya?
1. ¿Tuku wamputun nakgalhiyaw “xatlan lakgastapu”?
1 Wa tlawayaw tuku akxilhaw, wa xlakata lu xlakaskinka tachuwin nema wa Jesús: «Lapi wa milakgastapu, luwa tlan xwaj, xlipaks mimakni namakaxkgakganan» (Mat. 6:22). Akxni kilakgastapukan «luwa tlan», kaj pulaktum tuku lakaskin: tlawaputun xtalakaskin Dios. Uma wamputun, pi pulana wiliyaw xTamapakgsin Dios chu ni mastayaw talakaskin pi tuku ni lu maklakaskinaw o atanu natlawa pi nialh lu naskujnaniyaw Dios.
2. ¿Tuku max nalakgpali tuku lakpuwanaw chu tuku nakinkamakgtayayan?
2 ¿Kkgalhi xatlan lakgastapu? Xlakata tuku kastakan o xlakata tuku kgalhikgo amakgapitsi max lakgpalilh la akxilhaw tuku xlikana maklakaskinaw. Wa xlakata, akxni nina maklakaskinaw lhuwa kilhtamaku, tumin, litliwakga xlakata wi tuku natlawayaw o natamawayaw, tiku xaskgalala “pulana naputlakgay wa ntu nalimakgatsankganan” chu kgalhskinkan komo namakgtaya o ni namakgtaya la skujnani Dios (Luc. 14:28; Fili. 1:9-11). Na tlan namin kilhtamaku naʼakxilhaw tuku ni lu maklakaskinaw kkilatamatkan xlakata tlakg nalichuwinanaw Dios (2 Cor. 13:5; Efe. 5:10).
3. ¿Tuku kinkamasiyaniyan tuku tlawalh chatum tala xlakata ni lhuwa tuku xkgalhiputulh kxlatamat?
3 Chatum tala tiku precursora regular litaxtulh chuntiya tantaku tsukulh skuja maski xakchanilh komo ni tantaku kskujli. Alistalh xla wa: «Niti tlan naskujni chatiy malana. Klakgmakgalh tuku xaklakgati chu klakapastakli tuku xakmaklakaskin. Kaʼakxilhli pi tuku tlan nakgalhiya ni makgapala chu xkimakgatlakgwama xlakata xakkgalhiputun». Xlakata la xtatekgsa maxkilh talakaskin pi ni xputsalh tuku ni lu xmaklakaskin; lakgpalilh xtaskujut chu ama tlawalh pi chuntiya kskujli la precursora.
4. ¿Tuku xlakata la uku talakaskin nakgalhiyaw xatlan lakgastapu?
4 Xlakata xaʼawatiya kilhtamaku lamaw tlakg talakaskin nakgalhiyaw xatlan lakgastapu. Akgatunu kilhtamaku nema titaxtu tlakg kinkamalakatsuwiniyan xlisputni uma kakilhtamaku chu xasasti xkakilhtamaku Dios (1 Cor. 7:29, 31). Komo kkilatamatkan pulana nawiliyaw nalichuwinanaw Dios tlan nalakgtaxtuyaw chu nachuna tiku nakinkakgaxmatnikgoyan (1 Tim. 4:16).