«Xkilhtamaku namaxkikgoy ntu nawakgoy»
1. ¿La makgtayan xaʼawatiya tamakxtumit xaʼakgtum kilhtamaku? ¿La kamakgtayanit amakgapitsi?
1 Akxni kitaspitaw ktamakxtumit xaʼakgtum kilhtamaku wanaw: «¡Wa uma tuku xmaklakaskimaw!». Chatum superintendente xla circuito wa pi makgapitsi natalan akxni kgaxmatkgolh xaʼawatiya taʼakgchuwin xla tamakxtumit wankgolh pi tlakg namaliwakakgo la skujnimakgo Dios. Atanu na wa: «Kinkamakgtayan xlakata liwana nakakxilhaw tukuya kilhtamaku lamaw chu naʼakxilhparayaw tuku laksaknitaw natlawayaw kkilatamatkan». Achatum nawa «Lhuwa tiku lichuwinankgo Dios wankgolh pi kamakgtayalh xlakata naʼakxilhkgo pi xtaskujut Dios wa tuku tlakg xlakaskinka xlitlawatkan.» Chu wix, ¿la makgtayan xaʼawatiya tamakxtumit xaʼakgtum kilhtamaku?
2. ¿Tukuya temas nalichuwinankan ktamakxtumit nema natsuku septiembre asta agosto kata 2011?
2 Tamakxtumit nema natsuku septiembre asta agosto kata 2011 na xkilhtamaku nakinkamaxkikanan tuku nawayaw. Tema takilhtinit Salmo 118:8, 9, chu makgapitsi taʼakgchuwin nalichuwinankgo xlakata la Jehová kinkamatliwakglhan akxni kgalhiyaw talakgaputsit, la nakamakgtayayaw amakgapitsi xlakata nalitamakgtayakgo Jehová, la tlan natlawayaw la Jehová chu la nakamakgtayayaw amakgapitsin, la limasiyakgo lakgkgawasan pi lipawankgo Jehová chu tuku xlakata tekgsaw tamakgtay kparaíso xaʼespiritual.
3. ¿La tlan liwana nalitamakgtayayaw tamakxtumit xaʼakgtum kilhtamaku?
3 Xlakata nalitamakgtayayaw. Akxni nawankan tukuya kilhtamaku natawila tamakxtumit, kalakkaxwili xlakata napina chu na kakawani tiku kamakgalhtawakgaya. Kalakapastakti pi tiku «kgalhiy xatawakat» wa tiku makikgo tuku kgaxmatkgo (Luc. 8:15). Wa xlakata, kuenta katlawa tamakxtumit chu katsokgti tuku tlakg xlakaskinka chu tastakyaw nema lakpuwanita nalimaklakaskina kmilatamat chu akxni nalichuwinana Dios. Akxni nasputa tamakxtumit, kalimaxtutit kilhtamaku xlakata nalichuwinanatit kmifamiliajkan tuku lichuwinanka ktamakxtumit chu chatunu chatunu kawa la nalilatama tuku katsinilh.
4. ¿Tuku xlakata xatapaxuwan kgalhkgalhimaw tamakxtumit xaʼakgtum kilhtamaku nema aku nakgalhiyaw?
4 Tuku nalichuwinankan ktamakxtumit xaʼakgtum kilhtamaku xla uma kata lu xatapaxuwan lakkaxtlawakanit chu lakpuwankanit la tlan nakinkamakgtayayan, la akxni tlawakan xakgama liwat chu matliwekglhnan. Jehová kasikulanatlawalh tuku tlawapat xlakata tlan napina chu nalitamakgtayaya nema “namaxkikana ntu nawaya”, xlakata nakinkalimatliwekglhkanan akinin kstalaninanin Cristo (Mat. 24:45).