«Nkamakgaxkgakganalh mixkgakganatkan»
1. ¿Tukuya lanka talakgalham kgalhiyaw?
1 Akxni taxtu chu asta akxni tsankga xtaxkgakget chichini malanki Jehová. Pero ni wa taxkgakget tuku tasiya nema Jesús kawanilh kstalaninanin nakgalhikgo wata xkawanima nakgalhikgo «xkgakganat xla latamat» (Juan 8:12). Katsikan xlakata Dios lu lanka talakgalhaman nema tlawa pi lhuwa taskujut nakgalhiyaw. ¿Tuku taskujut? Jesús kinkakgalhtiyan: «Na chuna nama nkamakgaxkgakganalh mixkgakganatkan kxlakatin nchixkuwin»; uma wamputun xlakata nalimaklakaskinaw nakalimakgtayayaw amakgapitsin (Mat. 5:16). Lu xlakaskinka la uku chuna natlawayaw, xlakata lhuwa latamanin ni lakgapaskgo Dios. ¿La tlan namasiyayaw la tlawalh Cristo?
2. ¿La limasiyalh Jesús pi lu xlakaskinka nakatsikan xaxlikana xlakata Dios?
2 Akxni lichuwinanaw Dios. Jesús maklakaskilh xkilhtamaku, xlitliwakga chu tuku xkgalhi xlakata xkalitachuwinalh xtachuwin Dios kxchikkan latamanin, kplazas, kkasipijni... kaniwa niku xtawilakgolh. Liwana xlakgapasa tasikulunalin nema limin akxni katsiniyaw xaxlikana xlakata Dios (Juan 12:46). Nachuna, xlakata tlakg lhuwa latamanin xkatsikgolh tuku xaxlikana Jesús kamasiyanilh kstalaninanin «xkgakganat xala katuxawat» o kakilhtamaku xwankgolh (Mat. 5:14). Chu xlakan masiyakgolh xtaxkgakgetkan, xlakata kamakgtayakgolh latamanin chu kamasiyanikgolh xaxlikana xlakata Dios.
3. ¿La tlan nalimasiyayaw pi xlakaskinka akxilhaw wantuku xaxlikana?
3 La uku, kstalaninanin Dios lu xlakaskinka akxilhkgo la “nti xala kxkgakganat nalatamakgo”, wa xlakata kalitachuwinankgo Dios latamanin kaniwa niku wilakgo (Efe. 5:8). Min kilhtamaku, xlakata natsukuyaw katachuwinanaw latamanin kaj natsukuyaw likgalhtawakgayaw Biblia o atanu likgalhtawakga xla kstalaninanin Cristo niku tlan nakinkaʼakxilhkgoyan amakgapitsi ktaskujut o kʼescuela. Chatum tala tsumat chuna matsukilh akgtum takgalhtawakga chu kamaxkilh libro kgalhakutiy xcompañeros.
4. ¿Tuku xlakata lu xlakaskinka tlan tayat nakgalhiyaw xlakata nalimasiyayaw xkgakganat?
4 Natlawayaw tuku xatlan. Xlakata nalimasiyayaw xkgakganat natalakaskin nakgalhiyaw tlan tayat (Efe. 5:9). Ktaskujut, kʼescuela chu kaniwa niku natawilayaw, kstalaninanin Cristo litalakgapaskgo xlakata kgalhikgo tlan tayat chu uma tlawa tlan nalichuwinanaw tuku wan Biblia (1 Ped. 2:12). Akgtum liʼakxilhtit, xatlan xtayat chatum aktsu kgawasa tiku kgalhi akgkitsis kata tlawalh pi xmakgalhtawakgena xkatachuwinalh xnatlatni. Xla kawanilh: «¡Nikxni kakxilhnit chatum aktsu kgawasa tiku liwana katsi tuku tlan chu tuku nitlan!». Xlikana, akxni anaw lichuwinanaw Dios chu xlakata xatlan tayat kgalhiyaw tlawa pi latamanin natalakatsuwikgo «xkgakganat xla latamat» chu nakakninanikgo Dios.