Kinkalilakgapaskanan xlakata ni makgxtakgaw la lichuwinanaw Dios
1. ¿La limasiyanit Jehová pi kinkapaxkiyan latamanin?
1 Dios litalakgapasa pi kakgalhkgalhi latamanin (Éxo. 34:6; Sal. 106:41-45; 2 Ped. 3:9). Pulaktum la tlakg kinkalimasiyaniyan pi kinkapaxkiyan, wa xlakata pi talichuwinama xlikalanka kkatiyatni xTamapakgsin. Jehová atsinu ni chan 2,000 kata la kamakgtayama latamanin chu chuntiya tlawama pi latamanin nalakgtalakatsuwikgo (Juan 6:44). ¿La tlan na nakalimasiyaniyaw latamanin pi likatsiyaw la Jehová akxni lichuwinanaw xTamapakgsin?
2. ¿La tlan limasiyayaw pi tayaniyaw akxni lichuwinanaw Dios niku kinkalakgchanan?
2 Akxni lichuwinanaw Dios akgatunu chiki. Akinin limasiyayaw pi nachuna likatsiyaw la Jehová akxni «ni jaxaw» chu masiyayaw xlimapakgsin anta niku latamanin ni kgaxmatputunkgo (Hech. 5:42). Akinin tayaniyaw akxni ni kinkakgaxmatniputunkanan, akxni kinkalikgalhakgamanankanan chu akxni kinkaputsastalanikanan xlakata lichuwinanaw Dios (Mar. 13:12, 13). Na limasiyayaw pi chuntiya kamakgtayayaw latamanin nakatsikgo xaxlikana maski tuwa nakatekgsaw tiku nakgaxmatputunkgo.
3. ¿Tuku xlakata chuntiya nakalakganaw tiku kgaxmatputunkgolh xla Dios chu tiku makgalhtawakgamaw?
3 Tiku kalimakgalhtawakgemaka Biblia. Xlakata namakgastakaw kgantum xanat talakaskin nakgalhkgalhiyaw. Wi tuku tlan nalimakgastakaw pero nila tlawayaw pi lu lakapala nastaka (Sant. 5:7). Nachuna, nila tlawayaw pi lakapala nastaka xtakanajla tiku makgalhtawakgamaw (Mar. 4:28). Max tiku kamakgalhtawakgamaw tuwa namakgkatsikgo namakgxtakgkgo nixaxlikana takanajla o talismanin nema ni takilhti kBiblia. Ni namalakapaliputunaw tiku makgalhtawakgamaw xlakata namakgxtakgkgo tuku nitlan; tlakg tlan nawan kakamaxkiw kilhtamaku chu namastayaw talakaskin pi xʼespíritu Dios nakamakgtaya (1 Cor. 3:6, 7).
4. ¿La limasiyayaw pi chuntiya kalitachuwinanaw Dios kifamiliajkan tiku ni xtatayana Jehová?
4 Kifamiliajkan tiku ni xtatayananin Jehová. Maski xlikana pi akinin lakaskinaw pi kifamiliajkan kakatsinikgolh tuku xaxlikana, kakgalhkgalhiw kilhtamaku akxni tlan nakalitachuwinanaw kintakanajlakan, pero akxni chuna natlawayaw ni lhuwa tuku nakawaniyaw (Ecl. 3:1, 7). Akxni nina chuna tlawayaw, kawiliniyaw liʼakxilhtit, skgalalh tawilayaw xlakata naʼakxilhaw akxni tlan nakalitachuwinanaw tuku kanajlayaw, liwana kawaniyaw chu ni nakalimakgasitsiyaw (1 Ped. 3:1, 15). Kinkalilakgapaskanan xlakata ni makgxtakgaw la lichuwinanaw Dios chu chuna namakgapaxuwayaw kinTlatikan xalak akgapun.