Jehová kinkamasiyaniyan xlakata natlawayaw kintaskujutkan
1. ¿Tuku tlawa Jehová akxni kalakgayawa taskujut kskujnin?
1 Akxni Jehová wi tuku kalakgayawa kskujnin, na kamakgtaya xlakata tlan namakgantaxtikgo. Akgtum liʼakxilhtit, akxni wanilh Noé pi xtlawalh arca maski xla nikxni xtlawanit, Jehová wanilh la xlitlawat xwanit (Gén. 6:14-16). Chu akxni Moisés, tiku kaj xkuentajtlawana borrego xwanit, Dios wanilh pi xkalakgalh lakgkgolotsin xalak Israel chu xʼalh kxlakatin Faraón, Jehová wanilh: «Akit nakmakgtayayan akxni nachuwinana chu nakmasiyaniyan tuku nawana» (Éxo. 4:12). La uku, Jehová kinkamakgtayayan taskujut nema kgalhiyaw xlakata lichuwinanaw xalakwan xalaksasti. Xla, kinkalimasiyaniyan tamakxtumit Niku Masiyakan xlakata la Lichuwinankan Dios chu Tamakxtumit xlakata xTaskujut Dios. ¿Tuku kilitlawatkan xlakata nakinkamakgtayayan umakgolh tamakxtumit?
2. ¿Tuku natlawayaw xlakata nakinkamakgtayayan Niku Masiyakan xlakata la Lichuwinankan Dios?
2 Niku Masiyakan xlakata la Lichuwinankan Dios. Kalikgalhtawakga kminchik tuku natalikgalhtawakga ktamakxtumit. Chuna, tlakg nakatsiniya namasiyaya akxni naʼakxilha la tamatitaxti kʼakgatunu taʼakgchuwin (Pro. 27:17). Nachuna, kalipi mi libro Benefíciese ktamakxtumit chu anta katsokgtilha tuku nakatsiniya. Akxni tiku pulalin uma tamakxtumit nalichuwinan pulaktum tuku wan klibro, akxni nasputtilha akgatunu taʼakgchuwin, kalhtitti tuku tlakg xlakaskinka nema namaklakaskimputuna chu katsokgti kxkilhpan mi libro. Pero, xlakata tlakg namakgtayayan uma tamakxtumit talakaskin pi na namastaya taʼakgchuwin. ¿Na mastayata taʼakgchuwin? Akxni nalakgchanan akgtum taʼakgchuwin, liwana kalakkaxtlawa chu katlawa tastakyaw nema namaxkikana. Alistalh, kalimaklakaskinti tuku katsini akxni nalichuwinana Dios.
3. ¿Tuku natlawayaw xlakata nakinkamakgtayayan Tamakxtumit xlakata xTaskujut Dios?
3 Tamakxtumit xlakata xTaskujut Dios. Xlakata tlakg liwana nalakapastakaw tastakyaw nema natamasta kʼuma tamakxtumit, pulana nalikgalhtawakgayaw kkinchikkan tuku natalikgalhtawakga chu nalakkaxwiliyaw kintakgalhtinkan. Komo ni lhuwa nachuwinanaw akxni namastayaw kintakgalhtinkan, nakamaxkiyaw talakaskin pi amakgapitsin na namastakgo xtakgalhtinkan. Kuenta katlawa liʼakxilhtit nema natamasta, chu katlawa tuku nawankan nema namakgtayayan tlakg liwana lichuwinana Dios. Komo likgalhtawakga La Natlawayaw xTaskujut Dios limin tuku nakinkamakgtayayan, kamaki xlakata tlan namaklakaskina.
4. ¿Tuku xlakata liwana kilimaklakaskinatkan tuku kinkamaxkiyan Jehová?
4 Chuna la taskujut nema maxkika Noé chu Moisés, na tuwa makgkatsiyaw akinin xlakata na lichuwinanaw xalakwan xalaksasti xlikalanka Katiyatni (Mat. 24:14). Maski chuna, tlan lipaxuw natlawayaw uma taskujut komo nalipawanaw Jehová, xaLanka Makgalhtawakgena chu komo liwana nalimaklakaskinaw tastakyaw nema kinkamaxkiyan (Isa. 30:20).