Ni kapekuanti
1. ¿Tuku kilhtamaku tlakg talakaskin ni napekuana chu tuku xlakata?
1 ¿Minit kilhtamaku ni lichuwinanita Dios kʼescuela xlakata pekuana nalikgalhkgamanankana? Xlakata tlan nalichuwinana Dios talakaskin ni napekuana, tlakg chuna talakaskin komo wix ni lu chuwinana. Kaʼakxilhwi tuku tlan namakgtayayan.
2. Akxni nalichuwinana Dios kʼescuela, ¿la nalimasiyaya pi liwana lakapastaka?
2 Liwana kalakpuwanti tiku natachuwinana. Maski tlan nalichuwinana Dios kʼescuela, kalakapastakti pi ni talakaskin nakatalichuwinana xlakata Biblia putum tiku anta wilakgo, la akxni lichuwinana Dios akgatunu chiki. Liwana kalakpuwanti tuku kilhtamaku nalichuwinana Dios (Ecl. 3:1, 7). Max nakgalhiya akgtum tarea niku tlan nalichuwinana tuku wix kanajlaya. O max chatum compañero nakgalhskinan tuku xlakata wix ni makgtanuya makgapitsi tuku tlawakan kʼescuela. Makgapitsi kstalaninanin Cristo akxni tanukgo kʼescuela kawanikgo xmakgalhtawakgenanin pi xlakan xtatayananin Jehová chu kamaxkikgo likgalhtawakga niku wan tuku akinin kanajlayaw. Chu makgapitsi wilikgo likgalhtawakga kxbancajkan xlakata xcompañeros natlawanikgo takgalhskinin.
3. ¿Tuku militlawat xlakata tlan nalichuwinana Dios kʼescuela?
3 Kalakkaxwili tuku nawana. Komo nalakkaxwiliya tuku nawana ni katipekuanti (1 Ped. 3:15). Kalakpuwanti tuku takgalhskinin max natlawanikana chu la xkgalhtinanti (Pro. 15:28). Komo tlan kalipi maktum Biblia, libros Los jóvenes preguntan o Razonamiento, chu makgapitsi likgalhtawakga nema lichuwinan la tlawaka tuku anan, xlakata tlan namaklakaskina akxni natalakaskin. Nachuna, kakaskini minatlatni pi kamasiyanikgon la tlan natlawaya akxni kakninaniyatit Dios kfamilia.
4. ¿Tuku xlakata chuntiya nalichuwinana Dios kʼescuela?
4 Kalakpuwanti pi tlan nakitaxtu. Ni kalakpuwanti pi mincompañeros putum kilhtamaku nalikgalhkgamanankgoyan akxni nalichuwinana Dios. Max makgapitsin kaks nalilakawankgo xlakata ni pekuana chu asta nakgaxmatnikgoyan. Pero komo niti nakgaxmatniyan, ni kalitaxlajwani. Jehová lu nalipaxuwa xlakata tuku tlawa (Heb. 13:15, 16). Chuntiya kaskini tamakgtay xlakata ni nakgalhiya “tamakpuwan nalichuwinanana xtachuwin” (Hech. 4:29; 2 Tim. 1:7, 8). Kalakpuwanti la xlilhuwa napaxuwaya akxni wi tiku nakgaxmatniyan. Ni katsiyaw komo ama tiku tachuwinampat chatum kskujni Jehová nawan.