Min kilhtamaku talakaskin nakaputsayaw xlakata tlan nalichuwinanaw Dios
1. Niku anan lhuwa tachuwin, ¿tuku xlakata kalakgayawakan akgatunu congregación chuna la xtachuwinkan?
1 Kpaskua xla Petencostés kata 33, makglhtinankgolh espíritu santo kstalaninanin Jesús chu “tanu tachuwin tsukukgolh katachuwinankgo” tiku kaniwa xalanin xminkgonit (Hech. 2:4). Xlakata uma, max akgtutu mil latamanin tamunukgolh. Tlan nawanaw lhuwa tiku xminkgonit na max xchuwinankgo hebreo o griego. Maski chuna, Jehová kamakatsinilh xlakata xTamapakgsin kxtachuwinkan. Xlikana, chuna lalh xlakata akxni katachuwinankan kxtachuwinkan tlakg kgaxmatkgo. Wa xlakata, niku chuwinankan lhuwa tachuwin, kalakgayawakan congregaciones chuna la xtachuwinkan (kaʼakxilhti Organizados pág. 107 párrs. 1, 2). Akgtum grupo nema kgalhi tachuwin xalak atanu país lichuwinankgo Dios niku lakgchan congregación tiku kamakgtayama chu xla congregaciones nema lakatsu wilakgolh.
2. 1) ¿Tuku kilitlawatkan xlakata nakatsiyaw tiku chuwinankgo tanu tachuwin chu niku natalakaskin? 2) ¿La nalamakgtaya congregaciones niku pulaklhuwa tachuwin anan? 3) ¿Tuku natlawayaw komo tiku chuwinan atanu tachuwin nakinkakgaxmatniyan?
2 Niku kaj akgtum tachuwin anan tlan nalichuwinankan Dios kputum chiki. Pero talakgpali akxni kʼakgtum kachikin anan lhuwa tachuwin chu niku max lhuwa congregaciones na antiya lichuwinankgo Dios. Komo natekgskgo tiku chuwinan atanu tachuwin, nakgalhskinkgo xdirección xlakata natalan tiku chuwinankgo uma tachuwin nalakgapaxialhnankgo; pero kalakapastakwi pi tiku kalakgchan naputsakgo umakgo latamanin wa congregación o grupo xla uma tachuwin (kaʼakxilhti recuadro «Kalamakgtayaw»). Wa xlakata, congregación o grupo nakaputsakgo tiku chuwinankgo uma tachuwin. Uku naʼakxilhaw la natlawayaw.
3. ¿Tuku nalikatsiyaw la xlilhuwa kilhtamaku nakaputsayaw tiku chuwinankgo tanu tachuwin? ¿Lakxtum nalakgatsalakan putum niku lichuwinankan Dios?
3 La nakaputsayaw. Chuna la xlilanka niku nakaputsakan tiku chuwinankgo atanu tachuwin chuna xlilhuwa kilhtamaku nalimaxtukan. Akgtum liʼakxilhtit, ¿la xlilhuwa anankgo tiku chuwinankgo uma tachuwin? ¿La xlilhuwa tiku lichuwinankgo Dios? ¿La xlilhuwa dirección kgalhikgoya congregación o grupo? Ni talakaskin pi putum nalakgatsalakan; nakaputsakan niku tlakg lhuwa anankgo latamanin niku lakgchan congregación chu niku ni lu makgat. Pero, talakaskin liwana nalakkaxwilikan tuku natatlawa xlakata tlakg lhuwa latamanin na tlan namalankikgo xtukuwani Jehová (Rom. 10:13, 14).
4. 1) ¿La nalakkaxwilikan akxni natlawakan censo? 2) Kalichuwinanti makgapitsi la tlawakan akxni kaputsakan tiku chuwinankgo atanu tachuwin.
4 Xlakata ni makglhuwa natlawakan taskujut, lakgkgolotsin chu tiku pulalin xtaskujut Dios kcongregación liwana nalakkaxwili chu naʼakxilhtilha niku tlawamaka censo (1 Cor. 9:26). Akxni nakaputsakan tiku chuwinankgo tachuwin xalak atanu país, lakgkgolotsin xalak congregación tiku makgtayanamakgo nalakgayawakgo chatum tala tiku tlakg katsi, tlakg tlan nawan komo chatum kgolotsin o siervo ministerial xlakata napulalin taskujut. Lhuwa congregaciones chu grupos katsikgoya la natlawakgo censo. Max naputsakgo kdirectorio o kInternet tukuwani nema tamaklakaskin kxtachuwinkan. Alistalh, katachuwinankgo kteléfono o kalakgankgo xlakata nakatsikgo tukuya dirección nalakgchan xcongregacionkan. Komo lakgkgolotsin xalak congregación tiku kamakgtayamakgo tlan akxilha, nalakkaxwilikgo xlakata namin kilhtamaku nakatatlawakgo censo (kaʼakxilhti recuadro «Tuku tatlawa xlakata nakaputsakan tiku chuwinankgo atanu tachuwin»).
5. 1) ¿Tuku tlan xtlawaw akxni natlawayaw censo? 2) ¿Tuku tlan nakawaniyaw latamanin?
5 Ni kilitlawatkan censo komo ni katsiyaw tuku lakgamaw. Pulana, liwana kililhakganatkan chuna la akxni anaw lichuwinanaw Dios xlakata uma na xtaskujut Dios. Nachuna, akxni makgatawakgakan la nakatachuwinankan chu chuwinankan uma tachuwin akxni tlawakan censo makgtayanan xlakata ni nataxlajwanikan chu tlakg nakatsinikan tachuwin. Na putlekgekan kilhtamaku akxni tlawakan censo, pero ni taputlekgekan akxni tlawakan mapas chu listas. Akxni natekgskan tiku kaputsamaka, nalitachuwinankan Dios. Maski nakgaxmata o ni nakgaxmata, tunkun namakatsiniyaw tiku pulalin xtaskujut Dios kcongregación o tiku lakgayawakanit uma taskujut xlakata natsokga xdirección. Kalakapastakwi pi maski xlakaskinka natlawayaw censo, kuenta kilitlawatkan chu ni kajwatiya uma natlawaputunaw, na nalichuwinanaw Dios (kaʼakxilhti recuadro «Tuku wankan akxni tlawakan censo»).
6. ¿La xlituwa kaputsakan tiku nila kgaxmatkgo?
6 La nakaputsayaw tiku nila kgaxmatkgo. Uma taskujut tuwa chu talakaskin chuntiya naliskujaw. Ni xtachuna la atanu tachuwin, xlakata nipara xtukuwani, chuna la lhakganan ni litasiya komo nila kgaxmata. Chu xlakata xfamilia o xʼamigos lu kakuentatlawakgo, max ni katimaxkikgolh tuku nakgalhskininankgo tiku lichuwinan Dios. Umakgolh tlan nakamakgtaya tiku putsakgo tiku ni kgaxmatkgo chu tiku chuwinankgo atanu tachuwin.
7. 1) ¿Tuku tlan nawankan akxni nakaputsakan tiku nila kgaxmatkgo? 2) ¿La natlawayaw xlakata latamanin nitu nalapuwankgo?
7 Congregaciones o grupos xla lengua xla señas kgalhskininankgo komo lakgapaskgo chatum tiku nila kgaxmata. Max lakgapaskgo chatum xtalakatsukan o tiku taskujkgo o tiku taʼankgo kʼescuela o asta chatum xpariente tiku nila kgaxmata. Max akxilhkgonit akgtum letrero ktiji niku wan pi kuenta katlawakgolh tiku matlawanikgo xputlawkan xlakata wilakgo laktsu kamanan tiku nila kgaxmatkgo. Pero kalakapastakwi pi akxni wi tiku chuna nakgalhskinaw max ni kintikawaniputun. Pero komo nakatsiniyaw la nawanaw, ni lhuwa tuku nawanaw, xlakan nitu katilakpuwankgolh. Wi tiku kamakgtayanit akxni linkgo DVD xalak Biblia o atanu likgalhtawakga chu kawanikgo pi kamasiyaniputunkgo takgalhkgalhin nema masta Biblia tiku nila kgaxmatkgo. Akxni wi tiku ni mastaputun xtukuwani, tlan namakgxtakgniya mi dirección o kapsnat niku wan akxni tatlawa tamakxtumit xlakata namaxki tiku lakgapasa.
8. ¿La tlan nakamakgtayakan congregación xla señas?
8 Makgtum o makgtiy akgatunu kata, akgtum congregación xla señas tlan naskini atanu congregación nema tlakg lakatsu wi xlakata nakatatlawa censo niku lhuwa wilaka. Tamakxtumit nema tatlawa akxni lichuwinankan Dios, napulalin chatum tiku xalak congregación xla señas, nakawani la natlawakgo chu natamatitaxti akgtum liʼakxilhtit. Komo kʼakgatunu putlaw nakamalakgachakan, xliʼanat chatum tiku xalak congregación xla señas chu xlilinat akgtum mapa xlakata nakatsi niku natlawakgo censo.
9. ¿Tuku tlan natlawayaw xlakata nakgalhiyaw xdireccionkan tiku nila kgaxmatkgo akxni wi niku ankgo?
9 Na tlan naʼankan niku ankgo paxialhnankgo tiku nila kgaxmatkgo o niku tamakxtumikgo o akxni tamawanankgo. Tiku lichuwinankgo Dios xlilhakganatkan chuna la niku naʼankgo. Ni naʼankgo niku lhuwa wilaka, tlakg tlan nawan komo nalakgankgo tiku kaj xakstu wi o chatiy. Komo nakgaxmatkgo tiku natachuwinankgo, tlan nalamaxki xdireccionkan.
10. ¿La nakaputsayaw knegocios tiku nila kgaxmatkgo?
10 Na tlan natsokgaw kmapas niku wilakgo negocios xlakata naʼanaw atanu hora. Kʼakgtum mapa tlan natsokgaw niku wi gasolineras; kʼamakgapitsi mapas natsokgaw niku wi tintorerías, lavanderías, restaurantes, hoteles chu atanu. Komo kʼakgatunu mapa nawilikan pulakatunu negocios nema anankgo, tiku lichuwinankgo Dios tlakg nakatsinikgo chu tlakg tlan tuku nawankgo. Akgtum liʼakxilhtit, akxni natachuwinankan tsinu tiku makgamakglhtinanan khotel, tlan namaxkikan akgtum paquete niku nalimin DVD chu maktum invitación xla tamakxtumit xlakata nakamaxki tiku nila kgaxmatkgo nema wilakgo khotel. Kmakgapitsi negocios, kajwatiya tlan nakgalhskininanaw komo tiku skuja anta o tiku tamawanankgo chuwinankgo lenguaje xla señas. Komo niku lichuwinanaw Dios anan akgtum escuela niku ankgo tiku nila kgaxmatkgo, tlan namastayaw makgapitsi DVD xlakata nakgalhikgo kxbibliotekajkan.
11. ¿Tuku xlakata tlawakan censo na lu xlakaskinka xlakata lichuwinankan Dios?
11 Lu xlakaskinka taskujut. Max lu tuwa nakitaxtu akxni nakaputsayaw tiku chuwinankgo atanu tachuwin. Nachuna, xlakata talakgpalitilha la xlilhuwa wilakgo latamanin niku lichuwinanaw Dios uma tlawa pi nila liwana nakatsiyaw la xlilhuwa wilakgo tiku nakalakganaw. Pero, wi niku tlakg xlakaskinka akxilhkan natlawakan censo. Jehová tiku kinkalimapakgsiyan nalichuwinanaw, ni laksakpaxkinan (Hech. 10:34). Lakaskin pi «paks naa kgaputaxtukgoy, chu nalakgapaskgoy talulokgtat» (1 Tim. 2:3, 4). Wa xlakata, kamakgtayaw Jehová chu kinatalankan xlakata nakaputsayaw putum latamanin tiku «ntlan xnaku, chu aktanks» (Luc. 8:15).
[Recuadro xla página 5]
Kalamakgtayaw
Komo akgtum congregación o grupo lakaskin kakataputsaka tiku chuwinankgo atanu tachuwin, tiku pulalin la lichuwinankan Dios, nakatachuwinan lakgkgolotsin xalak congregaciones nema lakatsu wilakgolh. Tlakg tlan nawan komo naskinikgo tamakgtay congregaciones nema ni lu makgat wilakgo chu niku tlakg anankgo tiku chuwinankgo atanu tachuwin. Nakawanikan natalan pi komo natekgskgo tiku chuwinankgo uma tachuwin, natsokgkgo xdirección chu namaxkikgo tiku pulalin xtaskujut Dios xalak kxcongregación xlakata xla nakamaxki grupo o congregación nema skinkgolh tamakgtay. Tiku pulalinkgo xtaskujut Dios xalak congregación nema tlawamakgo uma taskujut, liwana nalakkaxwilikgo xlakata ni tuwa nalakgatsalakgo niku natlawakgo censo chu tiku kgaxmatkgo tlan nakalinkgo kcongregación o grupo niku kalakgchan.
Nachuna, komo chatum tala natekgsa chatum tiku katsiputun tuku litachuwinanka chu chuwinan atanu tachuwin (o tiku nila kgaxmata), xlimalakgatsamat formulario Sírvase visitar (S-43-S) chu xlimaxkit secretario xalak kxcongregación. Uma natlawa pi tiku kgaxmatli tunkun namasiyanikan xalak Biblia (kaʼakxilhti km 5/11 pág. 3).
[Recuadro xla página 6]
Tuku tatlawa xlakata nakaputsakan tiku chuwinankgo atanu tachuwin
• Nakakgalhskinkan tiku kamakgalhtawakgamaka, familias, tiku kataskuja chu amakgapitsi latamanin.
• Naputsayaw kdirectorio tukuwani nema tamaklakaskin kxtachuwinkan. Na wi niku naputsayaw xtukuwanikan latamanin komo katsiyaw xdirección chu tlan natekgsaw kInternet o tiku stakgo teléfono.
• Nakgalhskininanaw niku ankgo, la kbibliotecas, kpuchuwin chu kescuelas.
• Naʼakxilhaw kperiódico komo wi tuku natatlawa tiku chuwinankgo uma tachuwin.
• Naʼanaw niku stanankan chu knegocios niku ankgo.
• Naskinaw permiso xlakata tlan nawiliyaw lekgalhtawakga knegocios, kuniversidades o niku chankgo tren o autobús niku ankgo latamanin tiku chuwinankgo uma tachuwin.
• Komo mastakgo talakaskin mapakgsinanin, natamawaya directorio o naxokgoyaw akgtum programa o tuku liputsakan kInternet.
[Recuadro xla página 7]
Tuku wankan akxni tlawakan censo
Komo xatapaxuwan nakatachuwinanaw chu ni lhuwa tuku nakawaniyaw nitu katilakpuwankgolh. Makgtayanan akxni pulana namasiyaniyaw likgalhtawakga nema anan kxtachuwin.
Akxni chuwinantita tlan nawaniya: «Kkaputsamaw tiku chuwinankgo ______ xlakata nakkamasiyaniyaw takgalhkgalhin nema masta Biblia. ¿Lakgapasa chatum tiku chuwinan uma tachuwin?».
Akxni nakaputsaya tiku nila kgaxmatkgo tlan nakawaniya: «Tlen. ¿Kimaxkiya talakaskin nakmasiyaniyan uma video? [Wantuku liʼakxilhkan DVD, kalimasiyani akgtum versículo xalak Biblia klenguaje xla señas.] Uma akgtum versículo xalak Biblia Traducción del Nuevo Mundo klenguaje xla señas. Kkgalhiyaw lhuwa videos nema ni taxokgo xlakata nakalimakgtayakan kxtakanajlakan tiku nila kgaxmatkgo. ¿Lakgapasa tiku nila kgaxmata o wi tuku maklakaskin xlakata liwana nakgaxmata?». Komo nila lakapastaka, kawani pi max wilakgo niku skuja, kescuela o kxtalakatsu, chu max anta wi tiku akxilhnit.