Kakuentajtlawaw kintalakapastaknikan
1. ¿Tuku xtema tamakxtumit xaʼakgtum kilhtamaku xla kata 2013, chu tuku xlakata natalichuwinan?
1 Chali chali titaxtuyaw nema litasiya komo kuentajtlawayaw kintalakapastaknikan. Xtema xalanka tamakxtumit xaʼakgtum kilhtamaku xla kata 2013, nema natsuku 1 xla septiembre kata 2012, wa uma «Kakuentajtlawaw kintalakapastaknikan» (1 Tim. 1:19, Traducción del Nuevo Mundo). Tuku natamatitaxti nakinkamalakpuwaniyan pi lu xlakaskinka naʼakxilhaw la namaklakaskinaw kintalakapastaknikan nema Dios kinkamaxkinitan.
2. ¿Tukuya takgalhskinin natakgalhti kprograma?
2 Takgalhskinin nema natakgalhtikgo. Kʼuma programa natakgalhti akgtujun takgalhskinin xlakata kintalakapastaknikan:
• ¿Tuku max nalaktlawa kintalakapastaknikan?
• ¿Tuku nakinkamakgtayayan liwana nalimaklakaskinaw kintalakapastaknikan?
• ¿Tuku natlawayaw xlakata ni nalinaw talakgalhin xlakata xkgalhni latamanin?
• ¿Tuku limasiyayaw akxni lilakapastakaw xtastakyaw Biblia chu mastayaw talakaskin pi nakinkapulalinan?
• ¿La natlawayaw xlakata ni nakatlawaniyaw tuku nitlan xtalakapastakni amakgapitsi?
• ¿Tuku natlawakgo lakgkgawasan xlakata natayanikgo akxni naliʼakxilhkan xtakanajlakan?
• ¿Tuku tlan kakitaxtuni tiku kgaxmatnikgo xtalakapastaknikan nema Biblia pulalin?
3. ¿Tuku kilitlawatkan xlakata tlakg liwana nakinkamakgtayayan lanka tamakxtumit xaʼakgtum kilhtamaku?
3 Satanás putum tlawama pi nalakxtlawa kintalakapastaknikan, pero Jehová kinkamakgtayayan natayaniyaw akxni kinkamatlawiputunan tuku nitlan. Xapaxkina kintlatikan Jehová limaklakaskin xtachuwin chu xkachikin chu kinkawaniyan: «Wa uma tiji. Anta katlawantit» (Is. 30:21). Pulaktu la Jehová kinkapulalinan wa maklakaskin lanka tamakxtumit xaʼakgtum kilhtamaku. Wa xlakata fuerza katlawa xlakata, putum kprogama anta natawilaya. Liwana kakgaxpatti chu kalakpuwanti la namakgantaxtiya kmilatamat. Nachuna, katalikgalhtawakga mi familia tuku nakatsiniya. Akxni tlawayaw tuku wan Biblia lu tlan talakapastakni kgalhiyaw chu ni mastayaw talakaskin pi xkakilhtamaku akgskgawini nakinkamatlawiyan xtalakaskin chu nialh natlawayaw xtalakaskin Jehová (1 Ped. 3:16).