Ni kamakgapekuan maski lhuwa taskujut kgalhiya
1. ¿Tuku xlakata makgapitsi ni malaknukgo takgalhtawakga xalak Biblia?
1 Wi tiku ni mastaputunkgo takgalhtawakga xalak Biblia, xlakata lhuwa taskujut kgalhikgo. Xlikana pi akxni makgalhtawakgenana lin kilhtamaku: talakaskin pulana nakgalhtawakgaya, natakgalhtawaya lataman chu namakgtayaya natayani tuku tuwa natitaxtu. Apóstol Pablo wa pi mastalh putum xkilhtamaku xlakata nakamasiyani tuku xaxlikana xalak Tesalónica (1 Tes. 2:7, 8). ¿La nalimaxtuyaw kilhtamaku xlakata namastayaw takgalhtawakga xalak Biblia?
2. ¿La namaklakaskinaw kinkilhtamakujkan xlakata paxkiyaw Jehová?
2 Skujnanikan Jehová talakaskin kilhtamaku. Kakninanikan Dios talakaskin lhuwa tuku natlawayaw. Akgatunu semana limaxtuyaw kilhtamaku xlakata naʼanaw ktamakxtumit, nalichuwinanaw Dios, nalikgalhtawakgayaw Biblia chu natlawayaw oración. Kalilakpuwaw puskat tiku tamakgaxtokgnita, maski lu lhuwa taskujut kgalhi, xatapaxuwan limaxtu xkilhtamaku xlakata namaxki tuku maklakaskin xchixku. Akinin komo lu paxkiyaw Jehová, xatapaxuwan kilimaxtutkan kilhtamaku xlakata nakakninaniyaw (Efes. 5:15-17; 1 Juan 5:3). Jesús wa pi nakamakgalhtawakgayaw amakgapitsin, na wa likakninaniyaw Dios (Mat. 28:19, 20). Komo chuna nalakpuwanaw nakinkamakgtayayan namakgantaxtiyaw kintaskujutkan.
3. ¿La tlan chuntiya namakgalhtawakgenanaw maski wi tuku laktlawa kinkilhtamakujkan?
3 Pero ¿tuku xlalh komo nila tlakg naskujniyaw Dios xlakata wi tuku laktlawa kinkilhtamakujkan la tajatat, taskujut o xalak congregación? Xlakata makgapitsi tatatlakgo, kaskinikgo xtamakgalhtawakgen kamilh kxchikan. Makgapitsi tiku lichuwinankgo Dios max wi niku ankgo pero chuntiya makgalhtawakgenankgo kteléfono o kcomputadora. Chu makgapitsi natalan katachuwinankgonit tiku kalipawankgo xalak congregación xlakata kakamakgalhtawakgelh xtamakgalhtawakgen akxni nila ankgo.
4. ¿Tukuya tasikulunalin namakgamakglhtinanaw komo namastayaw takgalhtawakga?
4 Pablo lu paxuwalh xlakata mastalh xkilhtamaku chu xlitliwakga xlakata kamakgtayalh amakgapitsin nalakgapaskgo xaxlikana (Hech. 20:35). Akxni akxilhli tuku tlan kitaxtulh xlakata xtaskujut kTesalónica paxtikatsinilh Jehová (1 Tes. 1:2). Komo ni namastayaw talakaskin pi xlakata lhuwa taskujut kgalhiyaw nialh namakgalhtawakgenanaw, chuna tlakg nalipaxuwayaw la lichuwinanaw Dios.