Katlawatit chuna la tlawakgolh palakachuwinanin: Jonás
1. ¿Tuku tayat xkgalhi Jonás?
1 ¿Tuku lakpuwanaw akxni lakapastakaw palakachuwina Jonás? Makgapitsi lakpuwankgo pi xapekua xwanit o ni xlakgalhamanan. Pero, xla xtaktuju, ni xpekuan chu tamakamastalh xpalakata amakgapitsin. ¿La tlan nachuna natlawayaw liʼakxilhtit nema kinkamakgxtakgnin? (Sant. 5:10.)
2. ¿La nalimasiyayaw pi taktujuyaw chuna la Jonás?
2 Xtaktuju. Akxni Jonás makgamakglhtinalh xtaskujut, tsalalh chu alakatanu alh. Chuna tlawalh, xlakata asirios lixkajni xlikatsikgo. Nínive limapakuwika «kachikin niku stajmakgankan kgalhni» (Nah. 3:1-3). Pero Jehová stakyawalh Jonás chu maxkilh talakaskin pi xlimasiyalh komo lakgachixkuwi, xla taktujulh chu lakgachixkuwilh (Prov. 24:32; Jon. 3:1-3). Maski xakgasiya ni xtlawaputun tuku wanika, Jonás tlawalh xtalakaskin Dios (Mat. 21:28-31). Chu akinin, ¿chuntiya lichuwinamputunaw xtachuwin Dios komo kinkastakyawakan o tuwa tamakgkatsi niku lichuwinanaw?
3. ¿Tuku xlakata talakaskin ni napekuanaw chu natamakamastayaw xlakata namakgantaxtiyaw kintaskujutkan?
3 Ni xpekuan chu tamakamastalh. Akxni Jonás akxilhli pi katuwa wililh xlatamatkan tiku xtajumakgolh kbarco, makamastalh xlatamat (Jon. 1:3, 4, 12). Ni lhuwa kilhtamaku titaxtulh, xtlawama xtaskujut kNínive, alh kxitat kachikin, xlakata anta niku tlan xkgaxmatnika tuku xʼama tlawa Jehová. Tama taskujut ni xtlawalh tiku xapekua, tlawa tiku ni pekuan (Jon. 3:3, 4). ¿Tuku kinkamasiyaniyan? Lakaskinaw nawaniyaw Dios nakinkamaxkiyan litliwakga xlakata chuntiya nalichuwinanaw xtachuwin niku tuwa tamakgkatsi (Hech. 4:29, 31). Na chuna kilimasiyatkan pi tamakamastayaw xlakata chuntiya nalichuwinanaw xTachuwin Dios namaklakaskinaw kinkilhtamakujkan chu tuku kgalhiyaw (Hech. 20:24).
4. ¿Tuku xlakata xlakaskinka nalilakpuwanaw xliʼakxilhtitkan makgapitsi palakachuwinanin?
4 Makgatunu akxni likgalhtawakgayaw tuku tlawakgolh xpalakachuwinanin Dios, kalakpuwanti pi wix. Kinkakgalhskinkan: «¿Tuku xaktlawalh? ¿La naktlawa xlakata na chuna nakkgalhi kintayat?» (Heb. 6:11, 12). La Natlawayaw xTaskujut Dios nema aku nataxtu anta natalakputsanani tuku kinkamasiyanikgoyan makgapitsi xpalakachuwinanin Dios.