¿Tiku nalakgati uma tema?
1. Akxni nalikgalhtawakgayaw kirevistaskan, ¿tuku kililakpuwanatkan chu tuku xlakata?
1 Revistas Makatsinina chu ¡Despertad! tlawaka xlakata nakamakgtaya putum latamanin. Wa xlakata lhuwa temas lichuwinan. Akxni likgalhtawakgayaw kirevistaskan xlakaskinka nalakpuwanaw tiku xmakgtayalh akgtum tema, chu nalakpuwanaw nalitachuwinanaw.
2. ¿Tukuya temas xla revistas nalakgatikgo max latamanin?
2 ¿Max waja nak Makatsinina akgtum tema nema milh kilhtamaku litachuwinaw tiku taskujaw ? ¿Akxilhnitawa akgtum artículo xla familia nema tlan namakgtaya kinparientejkan? ¿Max kgalhiya chatum pariente tiku kgalhi akgtum tajatat nema talichuwinalh nak ¡Despertad!? ¿O max wi maktum revista nema nalakgatikgo tiku skujmakgolh niku stanankgokan o tiku skujmakgolh kpumapakgsin niku wix lichuwinana Dios? Akgtum liʼakxilhtit, max akgtum revista nema lichuwinan taʼakglhuwit nema titaxtumakgolh tiku lakgkgolona nalakgatikan niku kuenta tlawakgokan lakgkgolotsin. Tiku kalakgayawakanit nawilikgo takaksni chu ni lhuwa naʼanan tiku tlawakgo tuku nitlan max nalakgatikgo revista nema lichuwinan tiku tlawakgo tuku nitlan.
3. Kalichuwinanti akgtum liʼakxilhtit nema limasiya pi lu xlakaskinka nakamaxkiyaw revista tiku max nalakgatikgo.
3 Tuku kitaxtulh. Akxni makglhtinankgolh revista ¡Despertad! xla octubre 2011 nema wanikan «Cómo criar hijos responsables», akgtum tamakgaxtokgat xalak Sudáfrica kakilhanilh puxamakitsis escuelas niku lichuwinankgo xTachuwin Dios. Puxamatiy escuelas makglhtinankgolh uma revistas chu maxkikgolh xʼalumnoskan. Akgtum tamakgaxtokgat tiku na anta xala nachuna tlawakgolh chu makgpitsikgolh uma revista klakalhuwa escuelas niku lichuwinankgo Dios. Kʼakgtum escuela makgalhtawakgananin asta, maklakaskinkgolh uma revista xlakata nalistakyawakgo xʼalumnoskan. Uma tamakgaxtokgat wanikgolh superintendente de circuito la makgpitsikgolh revistas chu uma superintendente kawanilh amakgapitsin congregaciones nachuna xtlawakgolh. Uma sucursal lhuwa cartas makglhtinalh niku xkaskinimaka revistas, xlakata nialh xʼanan, imprimirtlawaparakgolh.
4. ¿Tuku xlakata lakaskinaw pi lhuwa katamaʼakgpitsilh revistas?
4 Kirevistaskan lichuwinan tuku lama la uku kkakilhtamaku chu kamakgtaya tiku likgalhtawakgakgo xlakaskinka naʼakxilhkgo Biblia chu xTamapakgsin Dios. Kajwatiya uma likgalhtawakga nema «lichuwinan talakgmaxtut» (Is. 52:7). Wa xlakata lakaskinaw pi lhuwa latamanin kalikgalhtawakgakgolh. Xlakata tlan namakgpitsiyaw, kinkakgalhskinkan: «¿Tiku nalakgati uma tema?».