¿Liskujpat xlakata tlakg nalakgayawakana taskujut kcongregación?
1. ¿La akglit kata xlikgalhit chatum kgawasa xlakata namakgantaxti tuku wan 1 Timoteo 3:1?
1 Anta 1 Timoteo 3:1 wan: «Lapi wi nti mpuxkunaniputun xtaskujut Dios, lu wa tlan taskujut ntu mpuwaniy natlaway». Umakgolh tachuwin kamatliwakglha lakchixkuwin xlakata tlakg nalakgatayaputunkgo taskujut kcongregación. ¿Talakaskin nastakkgoya xlakata nalakgatayaya taskujut? Ni. Tlakg tlan nawan komo natsukuyata liskuja. La uku tlantiya natsukuya katsiniya chu nakgalhiya tayat nema talakaskin xlakata siervo ministerial nawana (1 Tim. 3:10). ¿Tamununitata? Kaʼakxilhwi tuku tlan natlawaya xlakata namakgtayanana kcongregación.
2. ¿Tuku militlawat xlakata namakgtayanamputuna chu tuku natlawaya xpalakata amakgapitsin?
2 Kamakgtayanamputu. Nikxni kalakpuwanti pi komo nalakgayawakana taskujut kcongregación tlakg xlakaskinka naʼakxilhkana, wata natlawaya «tlan taskujut», akgtum taskujut nema nakamakgtaya amakgapitsin. Xlakata tlan chuna natlawaya talakaskin lu nakamakgtayaputuna natalan. Tuku namakgtayayan wa nalilakapastaka xliʼakxilhtit Jesús (Mat. 20:28; Juan 4:6, 7; 13:4, 5). Komo tuwa makgkatsiya nakamakgtayaya amakgapitsin, kaskini kamakgtayan Jehová (1 Cor. 10:24). ¿Tlan nakamakgtayaya natalan tiku tatatlakgo o linkgoya kata? Na tlan namakgtayanana akxni wi tuku kaxtlawakan kPukgalhtawakga o nakaxtuya o nakaxtlawaya jardín. ¿Na tlan namakgtayanana Niku Masiyakan xlakata la Lichuwinankan Dios akxni ni min tiku lakgchan? Naʼakxilha pi tlakg nalipaxuwaya akxni nakamakgtayaya amakgapitsin (Hech. 20:35).
3. ¿Tuku tlakg xlakaskinka xlakata namakgtayanana kcongregación chu la tlan namakgantaxtiya?
3 Kamatliwakglhti mintakanajla. Ni kaj talakaskin lhuwa tuku nakatsiya xlakata namakgtayanana kcongregación, tlakg talakaskin tliwakga natawila mintakanajla. Chatum tiku tliwakga wi xtakanajla lakpuwan chuna la Jehová chu Jesús (1 Cor. 2:15, 16). Limasiya kmilatamat «xtatlaw espíritu» (Gál. 5:22, 23). Pulana wili kxlatamat xTamapakgsin Dios chu lu lichuwinan Dios (Mat. 6:33). Xlakata tliwakga natawila mintakanajla, talakaskin nakgalhiya akgtum programa xlakata mi akstu nakgalhtawakgaya: Nalikgalhtawakgaya Biblia chali chali, nalikgalhtawakgaya putum Makatsinina chu ¡Despertad! chu na nalikgalhtawakgaya putum tuku natamatitaxti ktamakxtumit chu nema nipara akgtum namakgatsankgaya (Sal. 1:1, 2; Heb. 10:24, 25). Akxni Pablo wanilh xʼamigo Timoteo xlakata xmatliwakglhli xtakanajla, wanilh: «Kuintaj natlawaya mintamasiyun» (1 Tim. 4:15, 16). Wa xlakata kalakkaxtlawa taʼakgchuwin nema lakgchanan Niku Masiyakan xlakata la Lichuwinankan Dios chu nachuna akxni pina lichuwinana Dios. Kalismani napina lichuwinana Dios. Kalakkaxwili la tlakg naskujnaniya Dios, max tlan precursor nawana, naskuja kBetel o napina Escuela niku kamasiyanikan xalak Biblia Lakchixkuwin tiku Ni tamakgaxtokgkgonit, chu kaliskujti xlakata namakgantaxtiya. Akxni namatliwakglha mintakanajla namakgtayayan xlakata ni natlawaya «xlipaks wa nitlan xtatlawaputukan nkaman» (2 Tim. 2:22).
4. ¿Tuku xlakata xlakaskinka liwana namakgantaxtiyaw tuku kinkalakgayawakanan chu nakinkalipawankanan?
4 Kamakgantaxti tuku lakgayawakana chu tlan nalipawankana. Kxapulana siglo analh tatsinkstat chu congregación na lipatinalh. Xlakata xmapitsikgolh liwat, apóstoles laksakkgolh lakchixkuwin «wa nti ntamaxkikgoy nkakni», uma wamputun tiku xkalilakgapaskan pi xmakgantaxtikgo tuku xkalakgayawakan chu tlan xkalipawankan. Xlakata xkatsikgo pi tlan xʼamakgolh tlawakgo xtaskujutkan apóstoles tlawakgolh tuku tlakg xlakaskinka (Hech. 6:1-4). ¿Tuku masiyaniyan uma? Pi akxni wi tuku nalakgayawakana talakaskin liwana namakgantaxtiya. Katlawa chuna la Noé tiku tlawalh chuna la wanika pi xtlawalh arca (Gén. 6:22). Jehová tlakg xlakaskinka akxilha liwana namakgantaxtiya tuku lakgayawakana chu limasiya pi tliwakga wi mintakanajla (1 Cor. 4:2; kalikgalhtawakga recuadro «Lu xlakaskinka namasiyakan»).
5. ¿Tuku xlakata lakgkgawasan xliskujatkan xlakata wi tuku nalakgatayakgo kcongregación?
5 Chuna la xlichuwinankanit, Jehová xʼama malakapali xlakata xmastokgka tiku xkakninanikgolh (Is. 60:22). Akgatunu kata max tamunukgo 250,000. Xlakata lhuwa tiku tanumakgolh kxkachikin Jehová, talakaskin lakchixkuwin tiku tliwakga wi xtakanajlakan chu tlan nalakgatayakgo taskujut kcongregación. La uku tlakg anan taskujut kxkachikin Jehová (1 Cor. 15:58). Wa xlakata lakgkgawasan tiku liskujkgo xlakata wi tuku nakalakgayawakan kcongregación lu tlan tuku tlawakgo.
[Tuku wan página 2]
Xlakata lhuwa tiku tanumakgolh kxkachikin Jehová, talakaskin lakchixkuwin tiku tliwakga wi xtakanajlakan chu tlan nalakgatayakgo taskujut kcongregación
[Recuadro xla página 3]
Lu xlakaskinka namasiyakan
Lakgkgawasan tiku tlan linkgo xlatamatkan kamakgtaya akxni lakgkgolotsin kalakgayawakgo taskujut chu kamasiyanikgo namakgantaxtikgo. Akgtum liʼakxilhtit, chatum superintendente xla circuito wan pi akxni sputli tamakxtumit tatamakgxtakgli kplataforma chatum tiku lichuwinan Dios xlakata natachuwinan chu namatliwakglha. Alistalh akxilhli chatum aktsu kgawasa tiku anta lakatsu xya, chu kgalhskilh komo xkgalhkgalhima xlakata natachuwinan. Aktsu kgawasa wanilh pi wa xlakgayawakanit namatitaxti aspiradora kplataforma akxni nasputa tamakxtumit. Xnatlatni xʼamakgolha pero xla ni xʼamputun xlakata nina xtlawa tuku xlakgayawakanit. Superintendente xatapaxuwan tapanulh kplataforma. Alistalh wa: «Lakgkgolotsin xalak uma congregación skgalalh xwilakgolh xlakata xkamakgtayakgolh lakgkgawasan tiku tliwakga xwi xtakanajla xlakata wi tuku xkalakgayawakgolh kcongregación. Wa xlakata makgatunu akxni xaklakgapaxialhnan uma congregación, xaktsokgnan xlakata chatum kgawasa tlan siervo ministerial xlitaxtulh».