Katlawatit chuna la tlawakgolh palakachuwinanin: Amós
1. ¿La nakinkamatliwakglhan xliʼakxilhtit palakachuwina Amós?
1 ¿Minit kilhtamaku lakpuwanita pi nila lichuwinana Dios xlakata wix ni xkgalhiya tumin o ni lhuwa kgalhtawakganita? Komo chuna, xliʼakxilhtit palakachuwina Amós tlan namakgtayayan. Xla xkuentajtlawana borrego xwanit chu na atanu tuku xliskuja, pero Jehová maxkilh akgtum lanka talakgalhaman xlakata xʼama lichuwinan akgtum lu xlakaskinka tamakatsin (Amós 1:1; 7:14, 15). La uku Jehová kamaklakaskin latamanin tiku ni kgalhikgo tumin (1 Cor. 1:27-29). ¿Tuku atanu xliʼakxilhtit nakinkamakgtayayan palakachuwina Amós, akxni nalichuwinanaw Dios?
2. ¿Tuku xlakata ni nataxlajwaniyaw maski ni nakinkakgaxmatniputunkanan akxni nalichuwinanaw Dios?
2 Ni taxtlajwanilh maski niti kgaxmatniputulh. Akxni Amós lichuwinalh tuku xʼama akgspula tamapakgsin xalak norte xaʼakgkaw tribu xla Israel, Amasías sacerdote tiku xmaxki kakni laktsu toros, wanilh pi xʼalh chu ni xmakglhuwilh kachikin, xlakata xkgalhikgoya xtakanajlakan (Amós 7:12, 13). Xlakata mapakgsina Jeroboán ni xmaxkilh talakaskin Amós xlichuwinalh xtamakatsin Jehová, Amasías lakgpalilh xtachuwin palakachuwina (Amós 7:7-11). Pero Amós ni pekualh. La uku, makgapitsi tiku pulalinkgo ni xaxlikana takanajla putsakgo xtamakgtaykan políticos xlakata nakatlawanikgo tuku nitlan xkachikin Dios. Pero, Jehová kinkawaniyan pi putum tuku nakinkalichipaputunkanan, nitu kintikatlawanin (Is. 54:17).
3. ¿Tuku pulaktiy tamakatsin lichuwinanaw la uku?
3 Lichuwinalh akxni Dios xʼama katatlawa kuenta chu tasikulunalin nema xʼama min. Maski Amós lichuwinalh pi xʼamaka tatlawakan kuenta akgkaw tribus xalak Israel, akxni masputulh libro nema lin xtukuwani lichuwinalh pi Dios xʼama lakkaxwili xkachikin chu ksikulunatlawalh (Amós 9:13-15). Akinin na lichuwinanaw pi «Dios natatlaway kuinta xlipaks wanti lixkajnit tilatamakgolh», pero uma kaj tsinu tuku «xatlan tamakatsinin xla tapakgsin» nema kilimakatsininatkan (2 Ped. 3:7; Mat. 24:14). Akxni Jehová nakamalakgsputu tiku nitlan likatsikgo kʼArmagedón, uma natlawa pi natawila akgtum paraíso kKatiyatni (Sal. 37:34).
4. ¿Tuku likatsiyaw pi tlan namakgantaxtiyaw xtalakaskin Jehová?
4 Lichuwinankan tamakatsin xla xtamapakgsin Dios akxni ni kinkamaxkikanan talakaskin, uma tlawa pi nalimasiyayaw komo xlikana namakgantaxtiyaw tuku waniw akxni tamakamastaniw, chu komo xlikana tlawaputunaw xtalakaskin (Juan 15:19). Maski chuna, liwana katsiyaw pi chuntiya nakinkamakgtayayan xlakata namakgantaxtiyaw xtalakaskin, chuna la tlawalh Amós (2 Cor. 3:5).