Kakamakgalhtawakgew tiku putum kilhtamaku kamakgxtakgniyaw xalaksasti revistas
1. ¿Tuku xlakata kxkachikin Jehová kinkawanikanan pi wi tiku putum kilhtamaku kakaliniw xalaksasti revistas?
1 Lhuwata kata, kxkachikin Jehová kinkawanikanitan pi wi tiku kakalinitilhaw xalaksasti revistas, uma wamputun nakamakgxtakgniyaw tiku lakgatikgo likgalhtawakgakgo, pero ni kinkatakgalhtawakgaputunkgoyan. ¿Tuku xlakata? Xlakata tuku limin revista tlawa pi kakatsiputunkgolh tuku wan xTachuwin Dios (1 Ped. 2:2). Chu akxni nalikgalhtawakgakgo nalakgchan kxnakujkan chu uma natlawa pi nalakaskinkgo pi nakalimakgalhtawakgekan Biblia.
2. ¿Tuku natlawayaw xlakata latamanin tiku kaliniyaw revista tlakg nalakgatikgo?
2 Kataspitparaw akxni makgxtakgaw revistas. Ni kajwatiya nakamakgxtakgniyaw revistas wata nakatachuwinanaw xlakata natsuku lakgati. Komo chuna natlawayaw nakatsiyaw la wilakgolh, tuku lakgatikgo chu tuku kanajlakgo, uma nakinkamakgtayayan xlakata nakatsiyaw tuku nakalitachuwinanaw chu la natlawayaw (Prov. 16:23). Xlikana, uma talakaskin pi liwana nalakkaxtlawayaw tuku nawanaw. Kalaksakwi pulaktum tuku limin revista chu akgtum texto nema tlan nalitachuwinanaw tsinu. Chuna namunuwiliyaw tuku chaw kxnaku (1 Cor. 3:6). Ni napatsankgayaw natsokgaw tukuya fecha kilakglaw, tukuya likgalhtawakga mastaw, tukuya tema chu tukuya versículos litachuwinaw.
3. ¿Tukuya kilhtamaku tlan nakalakgtaspitaw latamanin tiku kamakgxtakgniyaw xalaksasti revistas?
3 Tukuya kilhtamaku nataspitaw. Tiku kamakgxtakgniyaw tlan nakalakganaw akgatunu papaʼ. Pero tlan nataspitaw maski nina takgatsi akgtum papaʼ, komo naʼakxilhaw pi lakgati chu komo kgalhi kilhtamaku. Max natitaxtu akgtum o akgtiy semana tlan nataspitaw chu nawaniyaw: «Kajwatiya xakmasiyaniputunan tuku klikgalhtawakgalh krevista nema kmakgxtakgnin». Max uma natlawa pi nalakgatikgo akgtum artículo. Komo wi tiku nakinkawaniyan pi likgalhtawakgalha, tlan nakgalhskinaw la akxilha chu nalitachuwinanaw uma tema. Chu tiku lakgatikgo kilikgalhtawakgakan, tlan namaxkiyaw maktum tratado, folleto chu libro nema tamastama uma papaʼ.
4. ¿Tuku tlan xtlawaw xlakata xmatsukiw akgtum takgalhtawakga tiku kamakgxtakgniyaw xalaksasti revistas?
4 Ni kalakpuwaw pi wi tiku nakinkawaniyan pi kamakgalhtawakgew. Wata Akinin kakawaniw. Maski xapulana ni xlakaskinkgo, max tlan xkamasiyaniw chu xkatalikgalhtawakgaw Makatsinina ksección «Takgalhskinin xlakata Biblia». Max chuna tlan xmatsukiw akgtum takgalhtawakga. Komo ni chuna xkitaxtulh, chuntiya kakaliniw revistas chu kakalitachuwinaw tuku lakgatikgo.