Kakamakgtayaw tiku nila liwana kgalhtawakgakgo
1. ¿Tuku xlakata tuwa kamasiyanikan xaxlikana tuku wan Biblia latamanin, tiku nila liwana kgalhtawakgakgo?
1 Makgapitsi latamanin tiku kalitachuwinanaw Dios tlakg katsiputunkgo, pero komo nila liwana kgalhtawakgakgo, tuwa makgkatsikgo nalikgalhtawakgakgo Biblia o atanu libros. Wa xlakata komo tunkun nakamaxkiputunaw libro ¿Tuku xlikana masiyay Biblia? max ni lu tlan katikitaxtulh. ¿La nakamaxkiyaw tamakgtay xaʼespiritual ama latamanin? Kakgalhskinkanit kliwaka akgpuxam países makgapitsi natalan tiku lu katsinikgo makgalhtawakgenankgo, wa uma tuku wankgolh.
2. ¿Tuku likgalhtawakga kgalhiyaw xlakata tlan nakalimakgtayayaw latamanin tiku ni liwana kgalhtawakgakgo?
2 Komo tiku makgalhtawakgemaw nila liwana kgalhtawakga o nila kgalhtawakga, tlan nalimatsukiniyaw folleto Kakgalhakgaxpatti Dios o Kakgalhakgaxpatti Dios chu nalatapaya putum kilhtamaku. Chatum precursor xalak Estados Unidos masiyani tiku tachuwinama maktiy folletos chu kgalhskin tuku folleto lakaskin. Sucursal xalak Kenia wan pi lu kamakgtayanit uma likgalhtawakga, africanos lismanikgonit nakalimasiyanikan tuku lanit makgasa chu ni lismanikgonit nakakgalhskinkan chu xlakan nakgalhtinankgo. Chatum lataman tiku kgalhi takgalhtawakga max ni tuwa nakgalhtawakga chu namasta xtakgalhtin, pero tiku ni lu kgalhtawakganit tuwa namakgkatsi. Komo tiku makgalhtawakgemaw katsini kgalhtawakga tsinu, lhuwa tiku lichuwinankgo Dios limaklakaskinkgo folletos Lakwan tamakatsin masta Dios o Tlan x’amigo Dios nawana, o maklakaskinkgo Ki libro xla takgalhtawakga xalak Biblia.
3. ¿Tuku nalakapastakaw xlakata liwana nakamasiyaniyaw tiku ni lu katsinikgo kgalhtawakgakgo?
3 Kakawani lakwan tachuwin. Tiku nila kgalhtawakgakgo max maxanankgo chu nalakpuwankgo pi nitu litaxtukgo. Talakaskin xatapaxuwan namakgkatsikgo akxni nakamakgalhtawakgeyaw, wa uma pulana talakaskin akxni nakamasiyaniyaw xaxlikana. Lhuwa latamanin tiku ni katsinikgo kgalhtawakgakgo lakgskgalalan chu lakapala katsinikgo. Wa xlakata, kakalimasiyaniw pi xlakaskinka kaʼakxilhaw (1 Ped. 3:15). Chuntiya nakgalhtawakgaputunkgo komo naʼakxilhkgo pi katsinimakgolh chu stakma xtakanajlakan. Wa xlakata putum kilhtamaku kakawani pi tlan tuku tlawamakgolh.
Tiku nila kgalhtawakgakgo max maxanankgo chu nalakpuwankgo pi nitu litaxtukgo. Talakaskin xatapaxuwan namakgkatsikgo akxni nakamakgalhtawakgeyaw, wa uma pulana talakaskin akxni nakamasiyaniyaw xaxlikana.
4. ¿La nakamakgtayayaw tiku ni lu katsinikgo kgalhtawakgakgo xlakata nalakkaxwilikgo tuku nakamasiyaniyaw alimakgtum?
4 Maski tiku makgalhtawakgepat tuwa makgkatsi kgalhtawakga, kawani pi kalikgalhtawakgalh tuku naʼakxilhatit alimakgtum. Makgapitsi natalan xalak Sudáfrica kawanikgo tiku makgalhtawakgemakgolh pi kskinikgolh tamakgtay chatum xfamiliajkan tiku katsini kgalhtawakga o chatum xʼamigoskan. Xlakata lakaskin pi nachuna natlawakgo, chatum tala xalak Gran Bretaña kamasakwani xlibro tiku kamakgalhtawakgema chu naʼakxilhkgo xtakgalhtin kxlibro nema talhtitnit, xlakata naʼakxilhkgo pi ni tuwa tekgskan xtakgalhtin akxni talakalhtitnita. Chatum tala xalak India kawani pi kaʼakxilhkgolh xadibujos nema wi klección nema aku naʼakxilhkgo chu kalilakpuwankgolh asta akxni nakamakgalhtawakgeparakan.
5. ¿Tuku natlawayaw xlakata ni lakapala nasitsiyaw akxni namakgalhtawakgenanaw?
5 Ni lakapala kasitsi. Kamasiyani tuku tlakg xlakaskinka nema limakgalhtawakgepat chu kamakgtaya liwana naʼakgatekgsa. Max xapulana ni lhuwa kilhtamaku nalitachuwinana, kaj akgkaw o akgkukitsis minutos. Ni lhuwa kalikgalhtawakgatit, kaj tsinu párrafos akxni makgatunu natakgalhtawakgaya. Ni lakapala kasitsi komo tiku makgalhtawakgepat lakatsuku kgalhtawakga. Max natlawa pi tlakg nakatsiniputun liwana nakgalhtawakga, chuna la tlakg napaxkitilha Jehová. Xlakata nastaka xtapaxkit, xlakaskinka nawaniyaw tiku makgalhtawakgemaw pi naʼan ktamakxtumit.
6. ¿La namasiyaniya chatum lataman xlakata nakatsini kgalhtawakga?
6 Tiku makgalhtawakgemaw tlakg lakapala staka xtakanajla akxni liwana katsini kgalhtawakga (Sal. 1:1-3). Lhuwa natalan kalimakgtayakgo akxni limaklakaskinkgo folleto Kaliskujti xlakata nakgalhtawakgaya chu natsokgnana akxni makgalhsputukgo xtakgalhtawakgakan. Komo tiku makgalhtawakgemaw nataxlajwani, max tlan nawaniya tuku katsininit. Kawani pi Jehová nasikulunatlawa tuku tlawanit chu kawani pi kaskinilh tamakgtay kʼoración (Prov. 16:3; 1 Juan 5:14, 15). Makgapitsi natalan xalak Gran Bretaña kawanikgo tiku makgalhtawakgemakgolh pi kalakpuwankgolh tuku tlan namakgantaxtikgo, akgtum liʼakxilhtit, nalakgapaskgo letras, natekgskgo chu nalikgalhtawakgakgo versículos xalak Biblia chu alistalh nalikgalhtawakgakgo kilikgalhtawakgakan knixatuwa tachuwin. Akxni kamasiyanikan latamanin talakaskin nakawaniyaw lakwan tachuwin xlakata xakstukan nakgalhtawakgaputunkgo.
7. ¿Tuku xlakata nakamasiyaniyaw latamanin tuku xaxlikana tiku nila liwana kgalhtawakgakgo?
7 Jehová ni kalakgmakgan tiku ni lhuwa takgalhtawakga kgalhi (Job 34:19). Xla akxilha tuku wi kxnakujkan (1 Crón. 28:9). Wa xlakata putum kakamasiyaniw tiku ni liwana kgalhtawakgakgo. Lhuwa likgalhtawakga kgalhiyaw nema tlan nalimatsukiyaw. Akxni nakatsini kgalhtawakga tlan nalimaklakaskinaw libro ¿Tuku xlikana masiyay Biblia?, xlakata tiku makgalhtawakgemaw tlakg liwana naʼakgatekgsa tuku tlakg tsinu laktuwa xalak Biblia.