Katlawatit chuna la tlawakgolh palakachuwinanin: Sofonías
1. ¿La xwanit kilhtamaku akxni palakachuwina litaxtulh Sofonías chu tuku xlakata tlan liʼakxilhtit kinkawilinin?
1 Kxitat siglo akgtujun, akxni nina xmin Jesús, anta kkachikin Judá ni kaj tsekg xkakninanikan Baal. Mapakgsina Amón tiku lixkajni xlikatsi nina makgas xmakgnikanit chu Josías tiku kgawasaku xwanit mapakgsina litaxtulh (2 Crón. 33:21–34:1). Ama kilhtamaku Jehová laksakli Sofonías xlakata xlichuwinalh tuku xʼama tlawa. Maski Sofonías max xfamilias xwankgonit tiku xmapakgsinankgo kJudá, ni lakputsalh tachuwin nema tlan xkamamakgkatsinilh mapakgsinanin xalak Judá xlakata tuku Jehová xʼama tlawa (Sof. 1:1; 3:1-4). Akinin, nachuna tlawayaw la uma palakachuwina, ni pekuanaw chu ni mastayaw talakaskin pi kifamiliajkan nakinkamalaktlawikgoyan la kakninaniyaw Jehová (Mat. 10:34-37). ¿Tuku tamakatsinin mastalh Sofonías, chu la kitaxtulh?
2. ¿Tuku kilitlawatkan xlakata nakinkamatsekgkanan akxni namin xtasitsi Jehová?
2 «Kaputsatit Jehová.» Kajwatiya Jehová tiku tlan nakalakgmaxtu latamanin akxni nalimin xtasitsi. Wa xlakata, Sofonías kawanilh latamanin xalak Judá pi xputsakgolh Jehová, chu xputsakgolh xaʼakgstitum chu ni tlankajwa xwankgolh xlakata xwijku kilhtamaku (Sof. 2:2, 3). La uku nachuna wi kakilhtamaku. Chuna la Sofonías, kawaniyaw latamanin pi kaputsakgolh Dios, pero akinin nachuna kilitlawatkan, chu nawiliyaw kkintapuwankan nikxni namakgxtakgaw Jehová (Sof. 1:6). Putsayaw Jehová akxni liwana likgalhtawakgayaw xTachuwin chu skiniyaw pi wa kakinkapulalin. Limasiyayaw pi putsayaw tuku xaʼakgstitum akxni tlan tayat kgalhiyaw kkilatamatkan. Putsayaw tataktujut akxni xatapaxuwan kgalhakgaxmataw tuku kinkawaniyan xkachikin Jehová.
3. ¿Tuku xlakata talakaskin tlan tapuwan nakgalhiyaw akxni nalichuwinanaw Dios?
3 Tuku tlan kitaxtu. Tamakatsinin nema mastalh Sofonías kgaxmatkgolh makgapitsin latamanin xalak Judá, pero wa Josías tiku xlikana kgaxmatli, tsukulh putsa Jehová akxni kgawasaku xwanit. Alistalh, Josías tlawalh pi xmasputuka ni xaxlikana takanajla kJudá (2 Crón. 34:2-5). La uku maski makgapitsi talhtsi xla Tamapakgsin ktiji tamakgoyacha, kkachiwixni o kxlakgstipan lhtukun, makgapitsi tamakgoyacha niku wi tlan tiyat chu mastakgo xtawakat (Mat. 13:18-23). Liwana katsiyaw pi Jehová chuntiya nasikulunatlawa kintaskujutkan, xlakata chuntiya liskujmaw la makgawanimaw talhtsi xla Tamapakgsin (Sal. 126:6).
4. ¿Tuku xlakata skgalalh kilitawilatkan akxni nakgalhkgalhiyaw xkilhtamaku Jehová?
4 Makgapitsin latamanin xalak Judá xlakpuwankgo pi Jehová nitu xʼama tlawa. Pero Jehová kawanilh pi xkilhtamaku lakatsu xwi (Sof. 1:12, 14). Kaj watiya xlakgtaxtukgolh tiku xlipawankgolh (Sof. 3:12, 17). Maski kgalhkgalhimaw Jehová, chuntiya kalipaxuwaw xtaskujut nema tlawamaw, chuna la amakgapitsi kinatalankan (Sof. 3:8, 9).