Akgtum ciento kata lata talichuwinama xTamapakgsin Dios
1. Xlakata takgatsima akgtum ciento kata, ¿tuku wanika ama kilhtamaku xkachikin Jehová pi natlawa?
1 «¡Kaʼakxilhtit, Mapakgsina mapakgsinamaja! Wixin tiku namakatsininanatit. Wa xlakata, kalichuwinantit, kalichuwinantit, kalichuwinantit Mapakgsina chu xtamapakgsin.» Uma tachuwin nema xlakaskinka lichuwinanka takgatsimaja akgtum ciento kata, tala Rutherford kawanilh xkachikin Jehová nalichuwinankgo tamakatsin xla xTamapakgsin xlikalanka Katiyatni. ¡Chu makgantaxtinitaw! Chuna la xapulana kstalaninanin Cristo, lichuwinanitaw xalakwan xalaksasti xla Tamapakgsin «xlipaks nchixkuwin nti wilakgo nkatuxawat» (Col. 1:23). ¿Tuku tlawanitaw lata titaxtulha akgtum ciento kata xlakata natalichuwinan xTamapakgsin Dios? ¿La natlawayaw xlakata chuntiya nalichuwinanaw lata takgatsitilhama akgtum ciento kata lata kilhtsukulh?
2. ¿La lichuwinankanit xTamapakgsin Dios kkilikgalhtawakgakan?
2 Kaʼakxilhwi tuku titaxtulha. Kilikgalhtawakgakan akglhuwata kata lichuwinama xTamapakgsin Dios. Lata kata 1939, kilikgalhtawakgakan wanikan Makatsinina. Lichuwinan xTamapakgsin Jehová. Uma revista tlakg lichuwinan xlakata xTamapakgsin chu tuku natlawa. ¡Despertad! nachuna lichuwinan xlakata kajwatiya xTamapakgsin Dios tlan nakalakgmaxtu latamanin. ¡Lu paxuwayaw xlakata uma maktiy revistas nema tlakg tamatitaxtinit lhuwa tachuwin chu tamakgpitsinit xlikalanka katiyatni! (Rev. 14:6.)
3. Kawanti la tlawanitaw xlakata nalichuwinanaw xTamapakgsin Dios.
3 Xkachikin Jehová lakgpalitilhanit la lichuwinanit xlakata xTamapakgsin Dios. Xapulana xmaklakaskinkan putlaw nema xkgalhi bocinas, chu xmatitaxtikan kradio chu gramófonos nema tlan nalipina. Uma tuku xtlawakan lu makgtayanalh, xlakata lhuwa latamanin nakatsikgo xalakwan xalaksasti akxni ni lu xʼanan tiku nalichuwinankgo xTamapakgsin Dios (Sal. 19:4). Lata umakgolh kata lhuwa likgalhtawakga kwilinitaw kpágina jw.org, chuna katsimakgolh lhuwa latamanin xlakata xTamapakgsin Dios, asta kachikinin niku ni mastakan talakaskin nalichuwinankan Dios.
4. ¿Tuku lakkaxwilinitaw xlakata la nalichuwinanaw Dios?
4 Xkachikin Jehová na lakkaxwilikgonit xlakata tlakg natalichuwinan xTamapakgsin Dios. Akgtum liʼakxilhtit, lata kxitat kata 1990, tlakg liskujmaw xlakata nalichuwinanaw Dios kʼakgatunu chiki, kparques, niku wilikgokan putlaw chu niku stanankan. Nina makgas kilhtamaku talakkaxwililh pi xtalichuwinalh Dios anta ktiji chu uma tatlawama klaklanka kachikin kxlikalanka katiyatni. Nachuna, lhuwa congregaciones makglichuwinankgo Dios ktiji anta niku kalakgchan, chu wilikgo mesas chu niku kawilikan likgalhtawakga anta tayakgo niku titaxtukgo lhuwa latamanin. Maski chuna tlawamaw, chuntiya xlakaskinka akxilhaw nalichuwinanaw xTamapakgsin Dios kʼakgatunu chiki (Hech. 20:20).
5. ¿Tuku tlan naliskujaw akxni natsuku septiembre?
5 Kkakxilhwi tuku aku namin. Akxni natsuku septiembre, lhuwa naliskujkgo la precursores regulares. ¿Na naliskuja? Komo ni namatlaniya, ¿lakpuwanita natlawaya precursorado auxiliar maski kaj lakgachunin? Komo matlaniya o ni, Jehová nasikulunatlawa taskujut tuku natlawaya komo naliskuja namakglichuwinana xTamapakgsin (Mal. 3:10).
6. ¿Tuku xlakata octubre kata 2014 lu xlakaskinka?
6 Octubre kata 2014 natakgatsi akgtum ciento kata akxni lakatsukulh Tamapakgsin. Wa xlakata, Makatsinina nema kamaxkiyaw latamanin xla uma papaʼ putum wa nalichuwinan xTamapakgsin Dios. Lhuwa kaliskujwi xlakata tlakg lhuwa latamanin nakamaxkiyaw uma likgalhtawakga. Kilhtamaku nema aku mima, chuntiya «[kakalitachuwinaw] xatlan tamakatsinin xla xtapakgsin Dios» tiku nakinkakgaxmatniputunkgoyan (Hech. 8:12).