Katlawatit chuna la tlawakgolh palakachuwinanin: Nahúm
1. ¿Tuku kinkamasiyaniyan tuku tsokgli Nahúm?
1 Niku xwi xamakgan Nínive limasiya pi, chuna la lichuwinalh Nahúm, Jehová katalakkaxlalh xtalatlawananin. Ni para akgtum kachikin nema lu tliwakga tlan xtalalakatakilh (Nah. 1:2, 6). Liwana likgalhtawakgakan tuku lichuwinanit Nahúm, lu xlakaskinka tuku kinkamasiyaniyan akxni lichuwinanaw Dios.
2. ¿Tuku xlakata wanaw pi tlan tamakatsin kaliniyaw latamanin?
2 Kamastaw takgalhkgalhin chu tlan kakamamakgkatsiniw. Akxni likgalhtawakgakan libro nema tsokgli Nahúm, takgatekgsa pi Nínive kaj malakgaxokgeputunkan, kachikin nema xtapakgsini xamakgan Asiria chu tlankajwa xmakgkatsikan (Nah. 1:1; 3:7). Pero, ama tachuwin lu tlan tamakatsinin kakitaxtunilh xkachikin Jehová. Nahúm, uma tukuwani wamputun «tlan Mamakgkatsininan», kawanilh judíos pi xtalatlawananin nialh makgas xʼamaka masputukan. Nachuna, kawanilh pi «Jehová tlan likatsi, makgtayanan akxni anan talakgaputsit» (Nah. 1:7). Akxni kalitachuwinanaw Dios latamanin, na kaliniyaw lakwan tamakatsinin chu kawaniyaw pi wa kalitatsekgkgolh Jehová (Nah. 1:15).
3. Chuna la Nahúm, ¿la nalimaklakaskinaw liʼakxilhtit akxni anaw lichuwinanaw Dios?
3 Kalimaklakaskiw liʼakxilhtit. Jehová malakpuwanilh Nahúm xlakata xlimaklakaskilh Tebas (o No-amón) la akgtum liʼakxilhtit, kachikin nema xtapakgsini Egipto chu nema asirios xmalakgsputukgonit, xlakata tuku xʼama akgspula Nínive (Nah. 3:8-10). Akxni nakalitachuwinanaw latamanin xlakata namalakgsputukan uma kakilhtamaku, kalimaklakaskiw tuku lichuwinanit Biblia xlakata nalimasiyayaw pi Jehová putum makgantaxti tuku lichuwinan. Akgtum liʼakxilhtit, akxni babilonios chu medos xʼamakgolh malakgsputukgo Nínive kata 632 akxni nina xmin Jesús. Xlakata lhuwa senalh tlawalh pi kgalhtuchokgo nema wanikan Tigris xtatsamalh chu tlawalh pi xlakxlalh makgapitsi patsaps nema xlitamakgstilinit kachikin. Chu lakapala akgchipaka Nínive, chuna la Jehová xlichuwinanit (Nah. 1:8; 2:6).
4. ¿La tlan liwana nachuwinanaw chu nataʼakgatekgsa akxni nalichuwinanaw Dios?
4 Liwana kachuwinaw chu kataʼakgatekgsli. Tuku tsokgli Nahúm, liwana taʼakgatekgsli tuku lichuwinalh (Nah. 1:14; 3:1). Nachuna, akxni nachuwinanaw talakaskin liwana nataʼakgatekgsa tuku wanaw (1 Cor. 14:9). Akxni xapulana lakgapaxialhnanaw chatum lataman, nawaniyaw tuku xlakata lakgamaw. Kakamakgtayaw tiku kalimakgalhtawakgemaw Biblia xlakata nalipawan Jehová chu xTachuwin chu la namakgtaya tuku katsinima (Rom. 10:14).
5. ¿Tuku liwana kinkalitachuwinanan xlibro Nahúm?
5 Nahúm xkanajla pi xʼama kgantaxtu tuku Jehová xlichuwinanit, uma litasiya libro nema lin xtukuwani. Talakatsuwima xlisputni uma xkakilhtamaku Satanás, chu akinin tlan kinkamamakgkatsiniyan takgalhkgalhin nema kinkamaxkinitan Jehová: «Nialh katiʼanalh talakgaputsit» (Nah. 1:9).