Tlan liʼakxilhtit xtakanajlakan
1. ¿Tuku natalikgalhtawakga kTakgalhtawakga nema takilhtinit kBiblia kCongregación ksemana 19 xla octubre?
1 Ksemana 19 xla octubre kata 2015 natsukuyaw likgalhtawakgayaw libro Tlan liʼakxilhtit xtakanajlakan kTakgalhtawakga nema takilhtinit kBiblia kCongregación. Uma libro lichuwinan 14 lakchixkuwin chu lakpuskatin tiku ni makgxtakgkgolh Dios. Akxni likgalhtawakgayaw lu xaxlikana kaʼakxilhaw tiku kalichuwinan, xtaʼakglhuwitkan chu tuku tuwa titaxtukgolh xlakata ni makgxtakgkgolh Jehová. Nachuna, kinkamasiyaniyan tuku nakinkamakgtayayan kkilatamatkan (Heb. 6:12).
2. Kalichuwinanti makgapitsi tuku kgalhi libro Tlan liʼakxilhtit xtakanajlakan.
2 Tuku limin libro. Pulaktiy tuku makgtayanan nema kgalhi libro wa kata nema titaxtukgonit chu mapas, nema limasiyakgo kilhtamaku chu niku latamakgolh tiku kalichuwinan. Akgatunu capítulo limin sección «Kalilakapastakti uma...», nema kinkamakgtayayan nalakapastakaw tuku lichuwinankan chu nalilatamayaw tuku katsiniyaw. Nachuna, kgalhi lhuwa lakstlan dibujos, liwana kalakkaxwilikanit, xlakata namakgkatsiyaw pi anta wilaw.
3. ¿La tlakg tlan nalitamakgtayayaw ktakgalhtawakga uma libro?
3 La tlan nalitamakgtayayaw. Lakgkgolotsin tiku Pulalinkgo xTatayananin Jehová, kcarta nema wi niku tsuku libro, kinkawaniyan tuku natlawayaw: «Kalilakapastaktit xlakata tlan naʼakxilhatit chu namakgkatsiyatit tuku titaxtukgolh tiku talichuwinan, chu kalakpuwantit tuku xtlawatit komo nachuna xtitaxtutit». Akxni lilakapastakaw ni wamputun pi kaj wa tuku akinin lakpuwanaw xlakata tuku lichuwinan Biblia; wata, nalilakapastakaw chu namakgkatsiyaw pi akinin chuna titaxtumaw. Uma wamputun pi namakgataxtiyaw kilhtamaku xlakata nalilakapastakaw (Neh. 8:8). Komo tuku natalikgalhtawkaga kʼakgtum semana natsuku kxʼitat capítulo, tala tiku pulalin uma tamakxtumit nalichuwinan kaj akgtum minuto tuku talikgalhtawakgalh semana nema titaxtulh. Na tlan natlawa akgtum o akgtiy takgalhskinin xlakata tuku taʼakxilhli, komo tuku lakgchan ni limin sección «Kalilakapastakti uma...».
4. ¿Tuku xlakata xlakaskinka nalikgalhtawakgayaw libro Tlan liʼakxilhtit xtakanajlakan?
4 Xkakilhtamaku Satanás chali chali maxlajwaniputun kintakanajlakan o lhuwa tuku limaklakaskin xlakata nalaktlawa. Uma libro chu artículos nema na watiya lichuwinan xla revista Makatsinina, tamaskiwin nema kinkamaxkiyan Jehová xlakata namatliwakglha kintakanajlakan (Sant. 1:17). Ni kamakgatsankgaw Takgalhtawakga nema takilhtinit kBiblia kCongregación chu na namastayaw kintakgalhtinkan xlakata lu nalitamakgtayayaw uma libro.