Kalipaxuwa akxni lichuwinana xalakwan tamakatsin

¿Minit kilhtamaku tuwa makgkatsinita napina lichuwinana Dios? Lhuwa tiku chuna kinka’akgspulayan. ¿Tuku xlakata? Max xlakata latamanin niku lichuwinanaw Dios ni kinkakgaxmatnikgoyan o maxananaw katiwa tiku natachuwinanaw. Umakgolh tlan natlawa pi nialh napaxuwayaw, pero kakninaniyaw xapaxuwana Dios chu xla lakaskin xatapaxuwan naskujnaniyaw (Sl 100:2; 1Ti 1:11). ¿Tuku pulaktutu tlawa pi xatapaxuwan nalichuwinanaw Dios?

Pulaktum, lichuwinanaw akgtum tamakatsin xla takgalhkgalhin. Maski kkinkilhtamakujkan latamanin ni kgalhikgo takgalhkgalhin, tlan namakgapaxuwayaw xnakujkan akxni kalitachuwinanaw «xalakwan tamakatsin pi tlakg tlan tuku mima» (Is 52:⁠7). Nachuna, xalakwan tamakatsin xla xTamapakgsin Dios tlan nakinkamakgapaxuwayan. Akxni nina pina lichuwinana Dios, kalilakpuwanti tasikulunalin nema nalimin xTamapakgsin Dios kKatiyatni.

Pulaktiy, tamakatsin nema lichuwinanaw kamakgtaya latamanin kxlatamatkan chu kxtakanajlakan, xlakata katsinikgo lakgmakgankgo nixatlan tayat chu makglhtinankgo takgalhkgalhin pi tlan putum kilhtamaku nalatamakgo (Is 48:​17, 18; Ro 1:16). Tlan nalilakpuwanaw pi akinin kamakgtayayaw latamanin akxni titaxtukgo tuku tuwa. Maski makgapitsi ni lakaskinkgo nakalakgmaxtukan, chuntiya kaputsaw tiku lakaskinkgo (Mt 10:​11-14).

Pulaktutu, wa tuku tlakg xlakaskinka: taskujut nema tlawamaw malanki Jehová. Lhuwa xtapalh akxilha pi lichuwinanaw (Is 43:10; Heb 6:10). Nachuna, xatapaxuwan kinkamaxkiyan xʼespíritu santo xlakata namakgantaxtiyaw uma taskujut. Wa xlakata, kaskiniw Jehová tapaxuwan, pulaktum xtawakat espíritu santo (Gál 5:22). Xtamakgtay Jehová natlawa pi tlan natayaniyaw tuku tuwa chu ni napekuanaw nalichuwinanaw (Hch 4:31). Wa xlakata, maski nakgaxmatkgo o ni nakgaxmatkgo, nalipaxuwayaw pi lichuwinanaw Dios (Eze 3:⁠3).

KAKXILHTI VIDEO LA XATAPAXUWAN KTSUKUPA SKUJNANI JEHOVÁ, CHU ALISTALH KAKGALHTI UMAKGOLH TAKGALHSKININ:

• ¿Tuku xlakata lu xlakaskinka nakgalhtawakgayaw maski akglhuwa hora limaxtuyaw nalichuwinanaw Dios akgatunu papaʼ?

• ¿La tlan nastalaniya xliʼakxilhtit María?

• ¿Tukuya kilhtamaku limaxtuya nalilakpuwana xTachuwin Dios?

• ¿Tuku tlakg makgapaxuwayan akxni lichuwinana xalakwan tamakatsin?