Tlakg kakatsini la nalichuwinana Dios: Komo tiku makgalhtawakgepat ni talakgpali, nialh kamakgalhtawakge

TUKU XLAKATA XLAKASKINKA. Latamanin xlimapakuwitkan Jehová xlakata nalakgtaxtukgo (Ro 10:13, 14). Pero ni putum tiku kamakgalhtawakgekan kgalhakgaxmatputunkgo Jehová. Wa xlakata, komo liwana maklakaskimputunaw kilhtamaku akxni lichuwinanaw Dios, kakamakgtayaw tiku xlikana lakgpaliputunkgo xlatamatkan xlakata makgapaxuwaputunkgo Jehová. Wa xlakata, komo tiku makgalhtawakgemaw ni limasiya pi lakgpaliputun xlatamat, tlakg tlan nialh namakgalhtawakgeyaw chu namaklakaskinaw kilitliwakgakan xlakata nakamakgtayayaw tiku Jehová tlawa pi natalakatsuwinikgo xla chu xkachikin (Jn 6:44). Pero komo tiku xmakgalhtawakgemaw talakgpali chu limasiya pi makgamakglhtinamputun «xaxlikana tuku masta latamat nema nikxni sputa», xatapaxuwan natsukuparayaw makgalhtawakgeyaw (Hch 13:48).

LA NATLAWAYAW

• Kawani tiku makgalhtawakgepat pi lu tlan tuku tlawama xlakata katsiniputun xaxlikana xalak Biblia (1Ti 2:4).

• Kamalakapastaka pi lu xlakaskinka nalilatama tuku katsininit (Lu 6:46-49).

• Lakatitum kalitachuwinanti milimakgalhtawakget parábola xla chanana chu kamakgpuwantini nalakputsanani tuku malaktlawima ni natlawa talakgpalit (Mt 13:18-23).

• Lakatitum kawani tuku xlakata nialh katimakgalhtawakge.

• Kawani pi namin kilhtamaku natachuwinana o nalakgapaxialhnana chu tlan namakgalhtawakgeparaya komo nalilatama tuku katsininit.

AKXNI AKXILHNITATA VIDEO KAKGALHTINANTI UMAKGOLH TAKGALHSKININ:

• ¿Tuku akxilhti nema limasiya pi tiku xmakgalhtawakgemaka ni kstakma xtakanajla?

• ¿Tuku tlawalh tala xlakata tlan xmakgtayalh xlimakgalhtawakget naʼakgatekgsa pi xtalakaskin xlakgpalilh xlatamat?

• ¿La wanilh tala xlimakgalhtawakget pi max tlan xmakgalhtawakgepa alistalh?