¿Tuku tlan natlawayaw akxni nina lakgchan natalakapastaka akxni tinilh Cristo?

Lata uma kata tlakg nakgalhiyaw kilhtamaku xlakata nalitakaxaw akxni nalakapastakaw akxni tinilh Cristo. Akxni kxitat semana nalakgchan, ni katitlawaka tamakxtumit xla Xlatamat chu xtaskujut kstalanina Cristo, chu akxni nalakgchan ksputat semana ni katitlawaka tamakxtumit niku matitaxtikan akgtum taʼakgchuwin chu likgalhtawakgakan Makatsinina. ¿Tuku tlan natlawayaw xlakata tlan namaklakaskinaw uma kilhtamaku? La uku, chuna la kxapulana siglo, wi tuku kililakkaxwilitkan xlakata uma lu xlakaskinka kilhtamaku (Lu 22:7-13; km 3/15 1). Pero nachuna, putum kilimakaxatkan kinakujkan. ¿La tlan chuna natlawayaw?

• Nalilakpuwanaw la xlilakaskinka naʼanaw (1Co 11:23-26).

• Natlawaniyaw oración Jehová chu nalilakpuwanaw la talalinaw (1Co 11:27-29; 2Co 13:5).

• Nalikgalhtawakgayaw chu nalilakpuwanaw tuku takilhtinit kBiblia nema lichuwinan tuku kilhchanima lakapastakkan akxni tinilh Cristo (Jn 3:16; 15:13).

Makgapitsi natalan likgalhtawakgakgo chu lilakpuwankgo tuku lakgchan akxni nalakapastakkan Cristo nema min kfolleto Texto nema Nalikgalhtawakgayaw chali chali. Amakgapitsi likgalhtawakgakgo textos nema min kprograma ktipakgalhu. Chu amakgapitsi likgalhtawakgakgo artículos xla Makatsinina nema lichuwinankgo akxni talakapastaka Cristo chu tapaxkit nema Jehová chu Jesús kinkalimasiyanikgon. Kaxatukawa tuku wix naputsananiya, namakgtayayan tlakg natalakatsuwiniya Jehová chu xKgawasa.