KILATAMATKAN LA KSTALANINANIN CRISTO
Kaʼakxilhka chuna la Jehová akxilhan
«Xkachikin Jehová lu makgapaxuwa» (Sl 149:4). Maski makglakgalhinanin akinin, Jehová akxilha xalaktlan kintayatkan chu tuku tlan tlawayaw. Maski chuna, min kilhtamaku akinin nila kinkaʼakxilhkanan chuna la kinkaʼakxilhan Jehová. Chu max chuna la kinkalikatsinikgoyan amakgapitsin o tuku nitlan tlawanitaw nakinkamamakgkatsiniyan pi nitu litaxtuyaw o ni kinkalakgchanan pi Jehová nakinkapaxkiyan. Komo minit kilhtamaku chuna makgkatsinita, ¿tuku tlan namakgtayayan?
Kalakapastakti pi Dios ni akxilha tuku tlawayaw chuna la latamanin akxilhkgo (1Sa 16:7). Uma wamputun pi akxni xla kinkaʼakxilhan, akxilha tuku asta akinin nila akxilhaw. Biblia kinkamakgtayayan nakatsiyaw tuku akxilha Jehová. Komo nakalikgalhtawakgaya xliʼakxilhtitkan tiku kalichuwinankan kBiblia, tlakg naʼakgatekgsa la xlilhuwa kapaxki Jehová xlakskujnin.
AKXNI AKXILHNITATA NAWAN VIDEO KAMAKANAJLI MINAKU PI DIOS PAXKIYAN, KAKGALHTI UMAKGOLH TAKGALHSKININ:
¿Tuku kinkamasiyaniyan xlakata la kinkaʼakxilhan Jehová xliʼakxilhtit kgawasa tiku kgosnan chu xtlat?
Komo wi tiku tlawalh akgtum talakgalhin pero lakgtaspitpa Jehová, ¿tuku tlan natlawa xlakata namakanajli xnaku pi Dios paxki? (1Jn 3:19, 20).
¿La makgtayalh tala akxni likgalhtawakgalh chu lilakpuwa xliʼakxilhtitkan David chu Jehosafat?