KILATAMATKAN LA KSTALANINANIN CRISTO
Jehová kalakgmaxtu tiku makgkatsikgo pi katlajama xtaʼakglhuwitkan
Kimputumkan min kilhtamaku lipuwanaw. Lipuwankan ni kilhchanima pi ni tliwakga kintakanajlakan. Asta min kilhtamaku Jehová na lipuwan (Gé 6:5, 6). Pero ¿tuku tlan natlawayaw komo lu snun lipuwanaw o komo putum kilhtamaku lu lipuwanaw?
Kaskini Jehová pi kamakgtayan. Xla lu lilakgaputsa tuku makgkatsiyaw chu tuku lakpuwanaw. Liwana katsi komo lipuwamaw o paxuwamaw. Chu asta akgatekgsa tuku xlakata chuna makgkatsiyaw chu tuku xlakata chuna lakpuwanaw (Sl 7:9b). Chu tuku tlakg xlakaskinka, Jehová tlan nakinkamakgtayayan akxni lu lipuwamaw, xlakata lu kinkalilakgaputsayan (Sl 34:18).
Kakuentajtlawa mintalakapastakni. Tuku nitlan makgkatsiyaw ni kajwatiya tlawa pi nalipuwanaw, wata max na nalaktlawa chuna la talalinaw Jehová. Wa xlakata lu xlakaskinka nakuentajtlawayaw kinakujkan, uma wamputun chuna la likatsiyaw, tuku lakpuwanaw chu tuku makgkatsiyaw (Pr 4:23).
AKXNI AKXILHNITATA NAWAN VIDEO KINATALANKAN KGALHIKGO TAKAKSNI MASKI KGALHIKGO TAJATAT XLA TALIPUWAN, KAKGALHTI UMAKGOLH TAKGALHSKININ:
¿Tuku tlawalh Nikki xlakata tajatat xla talipuwan ni xmakgatlajalh?
¿Tuku xlakata Nikki lakgalh makuchina? (Mt 9:12).
¿La putsalh Nikki xtamakgtay Jehová?