¿Tuku xlakata Dios ni kgalhti putum oraciones?
Jehová, kinTlatkan xalak akgapun lu kgaxmatputun kioracioneskan nema tlawayaw xliputum kinakujkan. Pero Dios ni kgalhti putum oraciones. ¿Tuku xlakata? ¿Tuku talakaskin kuenta natlawayaw akxni natlawayaw oración? Kaʼakxilhti tuku wan Biblia.
«Akxni natlawaya oración, ni watiya watiya tachuwin kawanti» (Mateo 6:7).
Jehová ni lakaskin pi watiya tachuwin nawanaw akxni natlawayaw kioracionkan o kaj nakalikgalhtawakgayaw kmaktum libro. Xla lakaskin pi xliputum kinakujkan katachuwinaw. Kalilakpuwanti pi kgalhiya chatum amigo tiku chali chali watiya tachuwin waniyan. ¡Nitlan katilimakgkatsi! Xaxlikana amigos xliputum xnakujkan latachuwinankgo chu lhuwa tuku lalitachuwinankgo. Akxni kiʼakstukan kintachuwinkan wanaw akxni tlawaniyaw oración Dios, limasiyaniyaw pi kiʼamigojkan liʼakxilhaw.
«Maski skinatit ni makglhtinanatit, xlakata kaj litlawaputunatit tuku nitlan» (Santiago 4:3).
Ni kalakpuwaw pi Dios nakgalhti kioracioneskan komo skiniyaw tuku katsiyaw pi ni tlan akxilha. Akgtum liʼakxilhtit, komo wi tiku nakgamanan kaj xlakata natlaja tumin chu skini Dios pi kamaxkilh suerte. ¿Nakgalhti Jehová xʼoración xlakata liwana kinkawaniyan pi ni kapaxkiw tumin chu ni kakanajlaniw suerte? (Isaías 65:11; Lucas 12:15). Jehová ni kgalhti umakgolh oraciones. Xlakata Dios nakinkakgalhtiyan, talakaskin liwana nakatsiyaw pi tuku nawanaw kkioracioneskan tatalakxtumi tuku wan kBiblia.
«Komo wi tiku ni kgalhakgaxmatputun limapakgsin, asta xʼoración lixkajnit» (Proverbios 28:9).
Makgasa, Dios ni xkgaxmata xʼoracioneskan tiku ni xmakgantaxtikgo xlimapakgsin, chu la uku nachuna (Isaías 1:15, 16; Malaquías 3:6). Komo lakaskinaw pi kakinkakgalhtin lu kiliskujatkan namakgantaxtiyaw xlimapakgsin. ¿Chu komo makgasa tlawaw tuku nitlan? ¿Wamputun pi Dios nikxni kintikakgaxmatnin? Nichuna. Xla nakinkatapatiyan komo nalimasiyaniyaw pi nitlan limakgkatsiyaw tuku tlawaw chu komo naliskujaw namakgantaxtiyaw xtalakaskin (Hechos 3:19).