¿La tlan namakgtayayan oración?
Pamela lu xtatatla chu putsalh tiku xmakuchilh. Pero nachuna tlawanilh oración Dios chu skinilh pi xmaxkilh litliwakga xlakata xtayanilh uma tuku lu tuwa xtitaxtuma. ¿Makgtayalh oración?
Xla kinkawaniyan: «Lu xakpekuan akxni xkimakuchikan xlakata xkinkgalhi cáncer. Pero, akxni xaktlawani oración Jehová, tlakg tlan xakmakgkatsi chu liwana xaklakapastaknan. Chuntiya kkgalhi takatsanajwat, pero akxni ktlawa oración lu kimakgtaya tlan tuku naklakpuwan. Akxni latamanin kinkgalhskinkgo komo tlan kwi, akit kkakgalhti: “Nitlan kwi, pero kpaxuwa”».
Xlikana, ni talakaskin pi wi tuku lu nitlan nakinkaʼakgspulayan xlakata natlawaniyan oración Dios. Kimputumkan titaxtuyaw taʼakglhuwit, maski laktsu o laklanka, chu maklakaskinaw tamakgtay xlakata chuntiya natayaniyaw. ¿Kinkamakgtayayan oración?
Biblia wan: «Kamakamaxki Jehová mintakuka, chu xla namakgtayayan. Nikxni katimastalh talakaskin pi nalhtuja tiku xaʼakgstitum» (Salmo 55:22). ¡Umakgolh tachuwin lu tlan mamakgkatsininan! Pero, ¿la tlan nakinkamakgtayayan oración? Akxni tlawaniyaw oración Dios chuna la xla lakaskin, nakinkamaxkiyan tuku maklakaskinaw xlakata tlan natayaniyaw tuku tuwa (kaʼakxilhti sección «¿Tuku tlan kitaxtu akxni tlawakan oración?»).