Tapaxkit kinkamakgtayayan natayaniyaw akxni kinkasitsinikanan

1. Chuna la wan Mateo 24:9, ¿tuku xlakata ni kaks lilakawanaw pi kkakilhtamaku kinkasitsinikanan?

JEHOVÁ kinkatlawan xlakata tlan napaxkinanaw chu nakinkapaxkikanan. Wa xlakata lu kinkakatsaniyan chu asta max pekuanaw akxni wi tiku kinkasitsiniyan. Akgtum liʼakxilhtit, chatum tala xalak Europa tiku wanikan Georgina, lichuwinan: «Kintse xkisitsini xlakata xakskujnani Jehová. Akit xakkgalhi 14 kata, xakmakgkatsi pi xkilakgmakgan chu asta ktsukulh klakpuwan pi max akit nitlan xaklikatsi».b Chatum tala tiku wanikan Danilo, lichuwinan: «Akxni soldados kiwilinikgolh, kiwanikgolh ni laktlan tachuwin chu kiwanikgolh pi xʼamakgolh kintlawanikgo tuku nitlan xlakata xtatayana Jehová xaklitaxtu, lu kpekualh chu kmakgkatsilh pi xkimamaxanikgonit». Maski lu kinkakatsaniyan, ni kaks lilakawanaw pi kinkasitsinikanan, xlakata Jesús lichuwinalh pi chuna xʼamaka kinkalikatsinikanan (kalikgalhtawakga Mateo 24:9).

2, 3. ¿Tuku xlakata kkakilhtamaku kinkasitsinikanan?

² Kakilhtamaku kinkasitsiniyan xlakata xtachuna la Jesús, akinin ni makgtapakgsiyaw kkakilhtamaku (Juan 15:17-19). Wa xlakata, maski kamaxkiyaw kakni mapakgsinanin, ni kakakninaniyaw, na ni kakninaniyaw simbolos nema kalilakgapaskan o xbanderaskan. Kajwatiya Jehová tiku kakninaniyaw. Akinin kgalhmakgtayayaw pi kajwatiya Dios tiku lakgchan nakamapakgsi latamanin, nixawa Satanás chu tiku tatayakgo nema kajwatiya lakawanikgo xTamapakgsin Dios (Gén. 3:1-5, 15). Lichuwinanaw pi kajwatiya xTamapakgsin Dios namasputu putum taʼakglhuwit nema anan kkakilhtamaku chu nialh makgas nakamasputu xtalatlawananin (Dan. 2:44; Apoc. 19:19-21). Umakgolh lu laktlan tamakatsinin xpalakatakan tiku tlan likatsikgo, pero lu nitlan tamakatsinin xpalakatakan tiku nitlan likatsikgo (Sal. 37:10, 11).

³ Kakilhtamaku na kinkasitsiniyan xlakata makgantaxtiyaw xtastakyaw Dios kkilatamatkan, nema nipara tsinu tatalakxtumi tuku xlakan tlawakgo. Akgtum liʼakxilhtit, la uku lhuwa latamanin tlan akxilhkgo talismanin xlakata xalixkajnit talakgxtumit nema na wa tuku tlawalh pi Dios xkamalakgsputulh Sodoma chu Gomorra (Jud. 7). Lhuwa latamanin kinkalikgalhkgamanankgoyan chu kinkawanikgoyan pi malakatsaliyaw chu ni maxkiyaw kakni tuku xlakan tlawakgo xlakata lilatamayaw xtastakyaw Biblia (1 Ped. 4:3, 4).

4. ¿Tuku tayat nakinkamakgtayayan natayaniyaw akxni kinkasitsinikanan?

⁴ ¿Tuku tayat nakinkamakgtayayan natayaniyaw akxni kinkasitsinikanan chu kinkalikgalhkgamanankanan? Talakaskin tliwakga nakgalhiyaw kintakanajlakan chu liwana nakatsiyaw pi Jehová nakinkamakgtayayan. Takanajla xtachuna la akgtum escudo nema tlan nalimamixiyaw «putum xalakpasani xflechas Satanás» (Efes. 6:16). Pero ni kajwatiya maklakaskinaw takanajla, na maklakaskinaw tapaxkit. ¿Tuku xlakata? Xlakata tapaxkit «ni lakapala sitsi» chu kinkamakgtayayan natayaniyaw putum tuku kinkamakgapatinanan (1 Cor. 13:4-7, 13). Kaʼakxilhwi la kinkamakgtayayan tapaxkit nema kgalhiniyaw Jehová, kinatalankan chu asta kintalatlawananinkan xlakata tlan natayaniyaw akxni kinkasitsinikanan.

TAPAXKIT NEMA KGALHINIYAW JEHOVÁ KINKAMAKGTAYAYAN NATAYANIYAW AKXNI KINKASITSINIKANAN

5. ¿Tuku tlan tlawalh Jesús xlakata tapaxkit nema xkgalhini xTlat?

⁵ Katsisni akxni xʼamaka makgnikan Jesús, kawanilh kstalaninanin tiku ni xmakgxtakgkgo: «Xlakata kakilhtamaku nakatsi pi kpaxki xaTlat, ktlawama chuna la xaTlat kilimapakgsinit pi naktlawa» (Juan 14:31). Tapaxkit nema Jesús xkgalhini Jehová maxkilh litliwakga xlakata tlan natayani putum tuku xʼama titaxtu. Nachuna, tapaxkit nema kgalhiniyaw Jehová na nakinkamakgtayayan.

6. Chuna la wan Romanos 5:3-5, ¿la makgkatsiyaw xlakskujnin Jehová akxni kakilhtamaku kinkasitsiniyan?

⁶ Tapaxkit nema kgalhinikan Dios ankgalhin kamakgtayanit xlakskujnin Dios xlakata natayanikgo akxni kaputsastalanikan. Akgtum liʼakxilhtit, akxni mapakgsinanin judíos kawanikgolh apóstoles pi nialh xlichuwinankgolh Dios, tapaxkit nema xlakan xkgalhinikgo Jehová kamakgpuwantinilh “nakgalhakgaxmatkgo Dios chuna la xmapakgsinakan nixawa lakchixkuwin” (Hech. 5:29; 1 Juan 5:3). Watiya uma tapaxkit nema kgalhikgo Dios na kamakgtayanit lhuwa kinatalankan chuntiya naskujnanikgo Jehová maski lakgtliwakgan mapakgsinanin kaputsastalanikgonit. Akxni kakilhtamaku kinkasitsiniyan ni taxlajwaniyaw, wata lipaxuwayaw (Hech. 5:41; kalikgalhtawakga Romanos 5:3-5).

7. ¿Tuku kilitlawatkan akxni tiku xalak kifamiliajkan nakinkaputsastalanikgoyan?

⁷ Pulaktum tuku tuwa tayanikan wa akxni tiku xalak kifamiliajkan kinkaputsastalanikgoyan. Akxni akxilhkgo pi akinin skujnaniputunaw Jehová, max makgapitsi kintalilakgapasnikan nalakpuwankgo pi kaj kinkaʼakgskgawikan o max nalakpuwankgo pi kaj akgwitimaw (katamalakxtupi Marcos 3:21). Asta max nakinkatlawaniputunkgoyan tuku nitlan. Pero ni kaks lilakawanaw uma, xlakata Jesús wa: «Xtalatlawananin chixku anta kxfamilia naminkgoyacha» (Mat. 10:36). Maski tiku xalak kifamiliajkan nakinkaputsastalanikgoyan, nikxni kinkalisitsinitkan. Wata tlakg nakapaxkiyaw: akxni tlakg paxkiyaw Jehová, tlakg kapaxkiyaw amakgapitsin (Mat. 22:37-39). Xlikana, uma ni wamputun pi nialh nakgalhakgaxmataw xtastakyaw Biblia xlakata kajwatiya nakamakgapaxuwaputunaw amakgapitsin.

8, 9. ¿Tuku makgtayalh chatum tala tliwakga nakgalhi xtakanajla maski xputsastalanimaka?

⁸ Georgina, tiku lichuwinaw kpárrafo 1, tayanilh akxni xtse lu nitlan xlikatsini. Xla lichuwinan: «Kinchatiykan tsukuka kinkalimakgalhtawakgekanan Biblia. Pero akgchaxan papaʼ alistalh, akxni akit xakkamputun ktamakxtumit, xla lakapala talakgpalilh. Kkatsilh pi xkatakgalhchuwinan apóstatas, chu xmaklakaskin tuku xmasiyakgo apóstatas akxni xkintachuwinan. Nachuna, xkiwani ni laktlan tachuwin, xkiʼakgwachi, xkimpixpita chu xkimakgani kilikgalhtawakga. Akxni kmakgatsilh 15 kata, ktamunulh. Xlakata xtlawaputun pi nialh xakskujnanilh Jehová, kimatamaknuninalh niku xkatamaknukan lakgkgawasan tiku nitlan xlikatsikgo. Makgapitsi xmaklakaskinkgo drogas chu xtlawakgo tuku nitlan. Tlakg lu tuwa tamakgkatsi akxni tiku nitlan likatsiniyan wa tiku kgalhkgalhiya pi namakgtakgalhan chu napaxkiyan».

⁹ Georgina lichuwinan tuku makgtayalh natayani, xla wan: «Akxni kintse tsukulh kintlawani tuku nitlan, uma kilhtamaku akit xaklikgalhtawakgakgonit putuminika Biblia. Liwana xakkatsinit pi xaktekgsnit xaxlikana chu xakmakgkatsi pi lu lakatsu xakwilanilh Jehová. Ankgalhin xaktlawani oración chu xla xkinkgaxmatni. Akxni xakwilacha niku xkimatamaknunanit kintse, chatum tala kiwanilh pi xaktaʼalh kxchik, chu kinchatiykan akxtum xaklikgalhtawakgayaw Biblia. Umakgolh kilhtamaku, natalan lu kimatliwakglhkgolh. Kimamakgkatsinikgolh pi xakmakgtapakgsi kxfamiliajkan. Kakxilhli pi Jehová tlakg tliwakga nixawa tiku kinkaputsastalanikgoyan asta maski tiku xalak kifamiliajkan».

10. ¿Tuku tlan liwana nakatsiyaw?

¹⁰ Apóstol Pablo tsokgli pi nitu katitlawalh pi «Dios nialh nakinkapaxkiyan xpalakata Cristo Jesús kiMalanakan» (Rom. 8:38, 39). Maski namin kilhtamaku napatinanaw, Jehová nikxni kintikamakgxtakgni. Ankgalhin nakinkamakgoxamixiyan chu nakinkamatliwakglhan. Chu chuna la masiya tuku titaxtulh Georgina, na nakinkamakgtayayan akxni nakamaklakaskin kinatalankan.

TAPAXKIT NEMA KAKGALHINIYAW KINATALANKAN KINKAMAKGTAYAYAN NATAYANIYAW AKXNI KINKASITSINIKANAN

11. ¿La xʼama kamakgtaya kstalaninanin Cristo tapaxkit nema talichuwinan kJuan 15:12, 13? Kawili akgtum liʼakxilhtit.

¹¹ Katsisni akxni nina xmakgnikan Jesús, kawanilh kstalaninanin pi xlapaxkikgolh xchatunukan (kalikgalhtawakga Juan 15:12, 13). Xla xkatsi pi uma xʼama kamakgtaya makxtum natawilakgo chu xtayanikgolh maski kkakilhtamaku xkasitsinika. Kalilakpuwaw congregación xalak Tesalónica, nema kaputsastalanika asta maski akxni kajku xlakatsukuma. Umakgolh kstalaninanin Cristo lanka liʼakxilhtit litaxtukgolh xlakata ankgalhin limasiyakgolh tapaxkit chu ni makgxtakgkgolh Dios (1 Tes. 1:3, 6, 7). Pablo kamakgpuwantinilh pi «chuntiya tlakg» xmastakakgolh tapaxkit nema xlakgalhinikgo (1 Tes. 4:9, 10). Tapaxkit xʼama kamakgpuwantini nakamakgoxamixikgo chu nakamakgtayakgo tiku kxlajwanankgo (1 Tes. 5:14). Chu xlakan chuna makgantaxtikgolh, katsiyaw uma xlakata akxni xtitaxtunita akgtum kata, Pablo kamalakgachanilh xlimaktiy xcarta chu kawanilh: «Talhuwima mintapaxkitkan nema lakgalhiniyatit mimputumkan» (2 Tes. 1:3-5). Tapaxkit kamakgtayalh natayanikgo taʼakglhuwit chu taputsastalanit.

12. ¿La lalimasiyanikgolh tapaxkit natalan xalak akgtum país akxni xlama guerra?

¹² Kaʼakxilhwi tuku titaxtulh Danilo, tiku lichuwinaw kxapulana párrafo. Akxni kpaís niku xlamakgolh tsukulh guerra, xla chu xpuskat chuntiya xʼankgo ktamakxtumit, xtlawakgo putum tuku xmatlanikgo xlakata chuntiya nalichuwinankgo Dios chu xkatatapapitsikgo liwat xnatalankan. Akgtum kilhtamaku, makgapitsi soldados tiku xlinkgo tuku limakgninankan tanukgolh kxchik Danilo. Xla lichuwinan: «Kiwanikgolh pi xakmakgxtakgli kintakanajla. Xlakata kkawanilh pi akit ni xakkama makgxtakga kintakanajla, kiwilinikgolh chu kiwanikgolh pi xʼamakgolh kimakgnikgo, pero kaj kkiʼakgstipun mapankgakgolh xlitalankan. Akxni nina xʼankgo, kiwanikgolh pi xʼamaparakgolh taspitkgo xlakata nalikgamanankgo kimpuskat. Ni lhuwa kilhtamaku titaxtulh, kinatalankan kinkamalakgachakgon ktren alakatanu kachikin. Nikxni ktipatsankgalh tapaxkit nema kinkalimasiyanikgon. Akxni kchaw alakatanu kachikin, kinatalankan xalak uma kachikin kinkamaxkikgon liwat chu kinkamakgtayakgon naktekgsaw akgtum taskujut chu niku naktamakgxtakgaw. Xlakata uma, titaxtulh kilhtamaku akinin nachuna tlan kkamakgtayaw natalan tiku xtsalataxtukgonitancha kxkachikinkan xlakata xʼanan guerra». Tuku titaxtukgonit lhuwa kinatalankan chuna la Danilo, limasiya pi tapaxkit nema lakgalhiniyaw kstalaninanin Cristo tlan nakinkamakgtayayan natayaniyaw akxni kinkasitsinikanan.

TAPAXKIT NEMA KAKGALHINIYAW KINTALAMAKGASITSINKAN KINKAMAKGTAYAYAN NATAYANIYAW AKXNI KINKASITSINIKANAN

13. ¿La kinkamakgtayayan espíritu santo chuntiya naskujnaniyaw Jehová maski latamanin kinkasitsinikgoyan?

¹³ Jesús kinkawanin pi kinkalipaxkitkan kintalatlawananinkan (Mat. 5:44, 45). Uma lakgachunin tuwa tamakgkatsi, pero xlakata xtamakgtay xʼespíritu santo Jehová tlan nakapaxkiyaw. Tuku litakgatsi xtawakat espíritu santo tlan nakinkamakgtayayan natayaniyaw akxni wi tiku kinkasitsiniyan, chuna la tapaxkit, ni lakapala sitsikan, tlan likatsikan, kgalhikan tsatata naku chu machokgokan tuku tlawaputunkan (Gál. 5:22, 23). Lhuwa tiku pulana nitlan xlikatsikgo, lakgpalikgolh xtapuwankan xlakata xpuskatkan, xchixkukan, xkamanankan o tiku lakatsu katawilakgolh kalimasiyanikgolh umakgolh tayat. Asta lhuwa la uku xtatayananin Jehová litaxtukgo. Wa xlakata, komo lu tuwa makgkatsiyaw nakapaxkiyaw tiku kinkasitsinikgoyan kaj xlakata kintakanajlakan, kaskiniw Jehová pi kakinkamaxkin xʼespíritu santo (Luc. 11:13). Liwana kakatsiw: ankgalhin tlan kitaxtu komo natlawayaw tuku Jehová lakaskin (Prov. 3:5-7).

14, 15. ¿La makgtayalh chatum tala tuku lichuwinan Romanos 12:17-21 xlakata nalimasiyani tapaxkit xchixku maski xla lu nitlan la xlikatsini?

¹⁴ Kaʼakxilhwi tuku titaxtulh Yasmín, tiku lama kʼOriente Medio. Akxni xtatayana Jehová litaxtulh, xchixku lakpuwa pi kaj xʼakskgawikanit chu xtlawaputun pi nialh kskujnanilh Dios. Wanilh laklixkajnit tachuwin chu kaskinilh tiku xtalilakgapasni xwankgonit, chatum xpulalina takanajla chu asta chatum skuwana pi xwanikgolh ni laktlan tachuwin chu xlimawakakgolh pi xmapapitsima xfamilia. Asta kilalh kʼakgtum tamakxtumit chu tsukulh kawani ni laktlan tachuwin natalan. Yasmín lu xtasa xlakata lu nitlan la xlikatsini.

¹⁵ Anta ktamakxtumit, natalan lu makgoxamixikgolh chu matliwakglhkgolh Yasmín. Lakgkgolotsin wanikgolh pi xlitsakgsalh tastakyaw nema lichuwinan Romanos 12:17-21 (kalikgalhtawakga). Yasmín lichuwinan: «Tuwa kmakgkatsilh naktlawa tuku wan Biblia, pero kskinilh Jehová pi xkimakgtayalh chu lu kliskujli xlakata nakmakgantaxti. Wa xlakata, akxni kinchixku xmakaxkajwi kcocina, akit xakkaxaka. Akxni xkiwani laklixkajni tachuwin, nitu xakwani chu ni xaksitsi akxni xakkgalhti, chu akxni xtatatla, akit kuenta xaktlawa».

16, 17. ¿Tuku masiyaniyan xliʼakxilhtit Yasmín?

¹⁶ Yasmín lichuwinan pi lu tlan kitaxtulh xlakata limasiyanilh tapaxkit xchixku. Xla wan: «Tlakg tsukulh kilipawan xlakata xkatsi pi akit nikxni xakkama akgskgawi. Xkinkgaxmatni akxni xaklitachuwinan xlakata kintakanajla chu litayalh naliskuja xlakata kkinchikkan naʼanan takaksni. Chu la uku asta kimakgpuwantini nakkan ktamakxtumit. Tlakg tlan klatalalinaw la uku chu xlikana klipaxuwayaw takaksni. Kkgalhkgalhi pi akgtum kilhtamaku namakgamakglhtinan xaxlikana chu akxtum naskujnaniyaw Jehová».

¹⁷ Xliʼakxilhtit Yasmín kinkamasiyaniyan pi tapaxkit «putum tayani», «putum kilhtamaku kgalhkgalhinan» chu «nitu makgatlaja» (1 Cor. 13:4, 7). Tasitsi tliwakga, pero tapaxkit tlakg tliwakga. Tasitsi lu kinkamakgawiyan, pero tapaxkit tlawa pi tlan nalatalalinkan. Akxni limasiyayaw tapaxkit makgapaxuwayaw Jehová. Pero maski kintalamakgasitsinkan chuntiya nakinkasitsinikgoyan, akinin tlan chuntiya napaxuwayaw. Kaʼakxilhwi la tlan natlawayaw.

TLAN NAPAXUWAYAW MASKI KINKASITSINIKANAN

18. ¿Tuku xlakata tlan napaxuwayaw maski latamanin nakinkasitsinikgoyan?

¹⁸ Jesús lichuwinalh: «Paxuwayatit wixin akxni latamanin ni nakaʼakxilhputunkgoyan» (Luc. 6:22). Xlikana, ni putsamaw pi latamanin nakinkasitsinikgoyan o ni tlan nakinkalikatsinikanan. Pero ¿tuku xlakata tlan napaxuwayaw maski latamanin nakinkasitsinikgoyan? Kaʼakxilhwi pulaktutu tuku xlakata. Pulana, xlakata akxni tayaniyaw tlawa pi Dios tlan nakinkaʼakxilhan (1 Ped. 4:13, 14). Xlipulaktiy, xlakata kintakanajlakan tlakg tliwakga wan (1 Ped. 1:7). Chu xlipulaktutu, xlakata namakgamakglhtinanaw akgtum tasikulunalin nema ni anan tuku xtachuna: latamat nema nikxni sputa (Rom. 2:6, 7).

19. ¿Tuku xlakata apóstoles lu xpaxuwamakgolh maski xkawilinikanit?

¹⁹ Akxni Jesús xlakastakwananita, apóstoles makgkatsikgolh tapaxuwan nema xla xkalitachuwinanit. Maski kawilinika chu kawanika pi nialh xlichuwinankgolh Dios, xlakan xpaxuwamakgolh «xlakata xkaminini nalipatinankgo xpalakata xtukuwani Jesús» (Hech. 5:40-42). Xlakan xpaxkikgo xMalanakan nixawa la xkapekuanikgo xtalamakgasitsinkan. Chu limasiyakgolh uma tapaxkit akxni «chuntiya» xmasiyamakgolh xalaktlan tamakatsinin. La uku, lhuwa kinatalankan na chuntiya skujnanimakgolh Jehová maski tuwa tuku titaxtumakgo. Liwana katsikgo pi Jehová nikxni katipatsankgalh tuku tlawakgo chu tapaxkit nema limasiyakgo xpalakata xtukuwani (Heb. 6:10).

20. ¿Tuku naʼakxilhaw kʼatanu artículo?

²⁰ Xlakata nina malakgsputukan uma kakilhtamaku, chuntiya talakaskin natayaniyaw tasitsi nema kinkakgalhinikgoyan latamanin (Juan 15:19). Pero ni kilipekuanatkan. Chuna la naʼakxilhaw kʼatanu artículo, Jehová nakamatliwakglha chu nakakuentajtlawa xlakskujnin tiku ni makgxtakgkgo (2 Tes. 3:3). Wa xlakata, chuntiya kapaxkiw Jehová, kinatalankan chu asta kintalamakgasitsinkan. Komo chuna natlawayaw, makxtum natawilayaw chu kintakanajlakan tliwakga nawan, namalankiyaw Jehová chu nalimasiyayaw pi tapaxkit tlakg tliwakga nixawa tasitsi.