1921 Titaxtunita Akgtum Ciento Kata

EDICIÓN 1 xla enero kata 1921 xla uma revista kxaʼinglés katlawanilh uma takgalhskinin xlikgalhtawakgananin Biblia: «¿Tuku taskujut akxilhatit pi kilitlawatkan uma kata?». Xlakata xkgalhtilh uma takgalhskinin maklakaskilh Isaías 61:1, 2, nema kamalakapastakalh pi xkalakgayawakanit nalichuwinankgo Dios: «Jehová kilaksaknit nakkalitachuwinan xatlan tamakatsin tiku lakmanso; [...] xlakata naklichuwinan kata akxni Jehová limasiya xtalakgalhaman, chu kilhtamaku akxni kiDioskan namalakgaxokgenan».

NI PEKUANKGO LA LICHUWINANKGO DIOS

Xlikgalhtawakgananin Biblia ni xlipekuanatkan xwanit xlakata tlan xmakgantaxtikgolh xtaskujutkan. Xʼamakgo kalitachuwinan «xatlan tamakatsin tiku lakmanso», chu “kilhtamaku akxni kiDioskan nakamalakgaxokge” tiku lixkajnit likatsikgo.

Tala John Hoskin tiku latamalh kCanadá ni pekualh akxni lichuwinalh Dios maski lakatakika. Akxni xtsukuma kata 1921, tachuwinalh chatum metodista tiku xlichuwinan Biblia chu tsukulh wani: «Lu tlan xwa komo ni xlatataʼakglhuwiw akxni xlichuwinaw Biblia. Asta maski ni lakxtum lakpuwanaw xlakata makgapitsi tuku lichuwinan. Tlan xatapaxuwan xkgalhchuwinaw chu chuntiya amigos xlitaxtuw». Pero uma nichuna kitaxtulh. Tala Hoskin lichuwinalh: «Ni lhuwa kilhtamaku xakchuwinanitaw akxni kkgaxmatli pi pixlanka limakawa malakcha, chu klakpuwa pi xvidrio malakcha xʼama tapakglha».

Uma chixku tiku xlichuwinan Biblia pixlanka wanilh tala: «Wa kakakitachuwinanti tiku ni kstalaninanin Cristo». Tala Hoskin nitu kgalhtilh, pero xla lakpuwa: «¡Akit chuna ktlawama!».

Lichali chuna kitaxtupa, akxni uma tiku xlichuwinan Biblia mastalh xtaʼakgchuwin. Tala Hoskin lakapastaka: «Kawanilh latamanin tuku nitlan kimpalakata. Pi akit chatum lanka akgsanina tiku xchinit kkachikin chu pi xlakgchan nakimakgnikan». Pero uma ni malakgachokgolh tala, xla chuntiya lichuwinalh Dios chu katachuwinalh lhuwa latamanin. Xla wampa: «Nikxni lhuwa xaklipaxuwanit chuna la klichuwinan Dios kʼakgatunu chiki. Makgapitsi latamanin kiwanikgolh: “Katsiyaw pi wix chatum kskujni Dios” chu kinkgalhskinkgolh komo tlan xkimakgtayakgolh xlakata nitu xkinkitsankganilh».

AKSTU KGALHTAWAKGAKAN CHU KFAMILIA

Xlikgalhtawakgananin Biblia maxtukgolh programas la likgalhtawakgakan Biblia krevista The Golden Age xlakata tlan nakamakgtayakan nastaka xtakanajlakan tiku tlakg xkatsiputunkgo.a Programa «Juvenile Bible Study» (Estudio bíblico para los jóvenes) xlimin takgalhskinin xlakata tlan nakatalakputsananikan kamanan. Natlatni «xkalitlawanitkan xwanit xkamanankan chu xkamakgtayakgolh natekgskgo xatakgalhtin anta kBiblia». Makgapitsi takgalhskinin chuna la uma, «¿La maklit libros litakgatsi Biblia?», ni laktuwa tuku xmasiya. Amakgapitsi, chuna la uma «¿Xlikgalhkgalhitkan putum xaxlikana kstalaninanin Cristo pi nakgalhikgo taputsastalanit?», xkamakgtaya lakkamanan xlakata ni xpekuankgolh akxni xlichuwinankgolh Dios.

Programa «Advanced Studies in the Divine Plan of the Ages» (Estudios avanzados sobre el Plan Divino de las Edades) xlimin takgalhskinin nema xtakilhtiyanit kxapulana tomo xla Estudio de las Escrituras nema xkamakgtayalh xlilakpuwankgolh xLikgalhtawakgananin Biblia tiku xkatsikgoya tuku xwan Biblia. Lhuwa likgalhtawakgananin lhuwa tuku katsinikgolh kʼumakgolh akgtiy programas. Pero krevista The Golden Age 21 xla diciembre kata 1921, makatsininanka pi umakgolh programas nialh xʼamaka kamaxtukan. ¿Tuku xlakata tlawaka uma talakgpalit?

MAKTUM XASASTI LIBRO

Libro *El Arpa de Dios* xaʼinglés.

Separador niku xwan tuku xlakgchan nalikgalhtawakgakan.

Tarjetas niku limin takgalhskinin.

Natalan tiku xpulalinkgo taskujut akxilhkgolh pi tiku aku xtsukumakgolh likgalhtawakgakgo Biblia xlikatsinitkan xwanit pulakatunu pulakatunu tuku ni laktuwa xmasiya Biblia. Wa xlakata, noviembre kkata 1921 maxtuka libro The Harp of God (kkata 1925 maxtuka xaʼespañol nema wanikan El Arpa de Dios). Latamanin tiku xmakgamakglhtinankgo uma libro xkalhkanukan xlakata xmakglhtinankgolh akgtum takgalhtawakga xalak Biblia, nema xwanikan The Harp Bible Study Course. Uma takgalhtawakga kamakgtayalh latamanin nakatsikgo pi Dios «lakpuwanit nakamaxki latamanin latamat nema ni kgalhi xlisputni». ¿La xtlawakan?

Akxni chatum lataman xmakgamakglhtinan maktum libro, na xmakgamakglhtinan maktum tarjeta niku xwan asta niku páginas xlikgalhtawakgalh. Atanu semana, xmakgamakglhtinan atanu tarjeta nema xlimin makgapitsi takgalhskinin nema xtakilhtinit tuku xlikgalhtawakganita, antiya xwani tuku xlikgalhtawakgalh semana nema xmima.

Akgkutiy semana, xlikgalhtawakgana Biblia akgatunu semana xmakglhtinan maktum tarjeta nema xmalakgachani kcorreo akgtum congregación nema lakatsu xwi. Umakgolh tarjetas xmalakgachakgo natalan tiku xlinkgoya kata o tiku nila xʼankgo lichuwinankgo Dios kʼakgatunu chiki. Akgtum liʼakxilhtit, Anna Gardner, xalak Millvale (Pensilvania, Estados Unidos), lakapastaka: «Akxni maxtuka libro makgtayalh Thayle, kintala tiku nila xtlawan, xlakata tlakg lhuwa xlichuwinalh Dios. Tlan xmalakgacha akgatunu semana tarjetas nema xliminkgo takgalhskinin». Akxni tiku xlikgalhtawakgama Biblia xmasputu xtakgalhtawakga, natalan xlakgapaxialhnankgo xlakata tlan xmakgtayakgolh chuntiya tlakg xkatsinilh xlakata Biblia.

ANANKU LHUWA TASKUJUT

Akxni ksputmaja kata, tala Joseph Rutherford kamalakgachanilh cartas putum congregaciones. Anta wa: «Lu lhuwa lichuwinanitaw Dios uma kata chu tlakg lhuwa latamanin kamakgtayanitaw nixawa kata nema titaxtukgonit». Xlakata xlilakpuwama kkilhtamaku nema aku xmima, wampa: «Chuntiya anan lhuwa taskujut nema xlitatlawat. Kakamakgpuwantinitit amakgapitsin xlakata namakgtlawakgo uma lu stlan taskujut». Liwana tasiya pi xlikgalhtawakgananin Biblia tlawakgolh tuku kawanika. Kkata 1922 tlakg lichuwinankgolh xTamapakgsin Dios nixawa amakgapitsi kata chu ni pekuankgolh akxni chuna tlawakgolh.

Amigos tiku ni pekuankgo

Xlikgalhtawakgananin Biblia limasiyakgolh tapaxkit akxni lamakgtayakgolh xchatunukan. Litaxtukgolh amigos tiku ni pekuankgo akxni analh «talakgaputsit», chuna la masiya tuku aku nalichuwinanaw (Prov. 17:17).

Martes 31 xla mayo kkata 1921 tsukulh kTulsa (Oklahoma, Estados Unidos) tuku lilakgapaska Masacre Racial de Tulsa akxni chatum xatsitsekge chixku tamaknuka kpulachin chu limawakaka pi xtlawaninit tuku nitlan chatum xalhmumokgo puskat. Liwaka akgtum mil xalakglhmumokgon lakchixkuwin katalalakatawakakgolh ni lhuwa lakchixkuwin xalakgtsitsekgen, uma taʼakglhuwit lakapala talakgatumilh pi asta chalh niku xwilakgo tiku xalakgtsitsekgen xalak Greenwood, niku kgalhananka kliwaka 1,400 chiki chu niku stanankan. Wanka pi 36 tiku nikgolh, pero max akgtutu ciento latamanin tiku nikgolh.

Tala Richard Hill, chatum xatsitsekge chixku tiku xlikgalhtawakgana Biblia xlitaxtu chu xlama kʼGreenwood, lichuwinalh tuku lalh: «Uma katsisni akxni xlamakglhuwimaka, xaklikgalhtawakgamaw Biblia chuna la ankgalhin xaktlawayaw. Akxni xakmakgasputunitawa kintakgalhtawakgakan kkgaxmatwi pi xlatalamaka kxpuʼitat kachikin chu chuntiya kkgaxmatwi asta akxni kkaw lhtatayaw». Xlichali, 1 xla junio, tlakg taliwakalh taʼakglhuwit: «Makgapitsi latamanin minkgolh chu kinkawanikgon pi komo xaktamakgtayaputunaw, kilianatkan xwanit kʼakgtum Auditorio Municipal». Wa xlakata tala Hill, xpuskat chu kgalhkitsis xkamanan, ankgolh kʼAuditorio Municipal xla Tulsa. Soldados xalak país nema xmalakgachanit gobierno xlakata xlakkaxtlawakgolh taʼakglhuwit nema xʼanan, makgamakglhtinankgolh max 3,000 xalakgtsitsekgen lakchixkuwin chu lakpuskatin.

Max watiya kilhtamaku, tala Arthur Claus tiku lhmumokgo xwanit, tlawalh tuku limasiyalh pi ni xpekuan. Xla lichuwinalh: «Akxni kkgaxmatli pi xʼanankgo latamanin tiku xkgalhanamakgo chu klhkuyumakgolh chiki anta kʼGreenwood, klakpuwa nakan akxilha kiʼamigo Hill».

Arthur Claus kalimakgalhtawakgelh Biblia 14 kamanan chu maklakaskilh libro El Arpa de Dios.

Akxni chalh, tatanokglhi chixku tiku xalhmumokgo xtalakatsu Hill tiku xchipanit akgtum rifle. Uma chixku, tiku na xʼamigo xwanit Hill, lakpuwa pi Arthur na xmakgkgalhanama chu pixlanka wanilh: «¡¿Tuku lakgtanita unu?!».

Arthur lakapastakli: «Komo tuku xakkgalhtilh ni xlakgatilh, xkintalalh. Liwana kwanilh pi tala Hill kiʼamigo xwanit chu makglhuwa xakminit kxchik». Arthur chu xtalakatsu tala Hill kuentajtlawakgolh chiki xlakata niti xtanulh chu xkgalhanalh.

Arthur lakapala katsilh pi tala Hill chu xfamilia xwilakgolh kʼAuditorio Municipal. Wi tiku wanilh pi xalakgtsitsekgen latamanin nila xtaxtukgolh anta komo general Barret, ni xfirmarlilh maktum kapsnat. Arthur lichuwinalh: «Tuwa kitaxtulh naktachuwinan general. Akxni kwanilh tuku xaktlawaputun, kinkgalhskilh: “¿Wix nakuentajkatlawaya uma familia chu nakamaxkiya tuku namaklakaskinkgo?”. Kkgalhtilh, chuna, chu xatapaxuwan chuna naktlawa».

Akxni xmaxkikanita kapsnat, Arthur lakapala alh kʼAuditorio Municipal. Akxni chalh, masiyanilh chatum soldado tiku wa: «¡Uma firmarlinit general! ¿Katsiya pi wix xapulana tiku natamakxtu chatum lataman unu?». Arthur chu soldado lakapala tekgskgolh tala Hill chu xfamilia. Lakapala tawakakgolh kxputlaw Arthur chu alistalh ankgolh kxchik tala Hill.

Tala Claus kuenta tlawalh xlakata tala Hill chu xfamilia nitu xkaʼakgspulalh. Xatlan xliʼakxilhtit xlakata ni pekualh chu tapaxkit nema limasiyalh kamakgtayalh amakgapitsin. Arthur wa: «Xtalakatsu Hill tiku makgkuentajtlawalh xchik tala, tlakg tlan liʼakxilhtit kaliʼakxilhli xtatayananin Jehová. Chu lhuwa latamanin katsiputunkgolh xlakata xTamapakgsin Dios xlakata akxilhkgolh pi akinin ni kinkamapapitsiyan kincolorkan chu pi putum tiku tamakamastaninitaw Dios lakxtum litaxtuyaw kxkachikin».

a The Golden Age (nema tsukuka maxtukan kxaʼespañol lata kkata 1932 chu wanika Luz y Verdad) lakgpalinika xtukuwani kkata 1937 chu wanika Consolation (Consolación kkata 1938) chu lakgpaliparaka chu wilinika Awake! kkata 1946 (¡Despertad! kkata 1947).