Tuku lichuwinan Apocalipsis mimpalakata

1, 2. ¿Tuku xlakata kilikatsitkan tuku lichuwinan libro xla Apocalipsis?

¿MINIT kilhtamaku akxilhnita xfotos atanu lataman? Max kaʼakxilhti amakgapitsi tiku ni kalakgapasa. Pero kaj xalan maktum foto kaks akxilha. ¿Tuku xlakata? Xlakata wix na anta taxtunita. Kaks akxilha chu lakapastakputuna niku chu tuku kilhtamaku maxtuka. Nachuna, kalakapastakputuna putum tiku taxtukgo anta. Mimpalakata, uma foto ni xtachuna la amakgapitsi, wi tuku lu xlakaskinka waniyan.

² Libro xla Apocalipsis xtachuna la uma foto. ¿Tuku xlakata? Pulaktiy tuku xlakata. Pulana, xlakata uma libro tsokgka kimpalakatakan. Niku litsuku wan: «Umakgolh tachuwin wa tuku Jesucristo makatsininanit uku. Dios maxkilh Jesucristo putum uma xlakata nakamasiyani xlakskujnin Dios tuku ama la nialh makgas kilhtamaku» (Apoc. 1:1). Wa xlakata tuku wan uma libro ni wa katsokgnanika putum latamanin, wata akinin, xlakskujnin Dios. Wa xlakata ni kaks lilakawanaw akxni katsiyaw pi makgtayanamaw nakgantaxtu tuku lichuwinankanit. ¡Na taxtunitaw «kfoto»!

3, 4. Chuna la wan libro xla Apocalipsis, ¿tuku kilhtamaku xʼama kgantaxtu tuku xtalichuwinanita anta, chu la makgtanuma uma kkilatamatkan?

³ Xlipulaktiy makgtanuma kilhtamaku akxni xlikgantaxtut uma tuku xlichuwinankanit. Apóstol Juan lichuwinalh uma kilhtamaku akxni wa: «Espíritu santo kimaʼakxilhnilh tuku aku ama la kxkilhtamaku Malana» (Apoc. 1:10). Juan tsokgli umakgolh tachuwin lakatsu kkata 96 akxni xminita Jesús. Chu «kxkilhtamaku Malana» makgatku xwi (Mat. 25:14, 19; Luc. 19:12). Pero tuku xlichuwinankanit kBiblia pi xʼama la, tsukulh kkata 1914 akxni Jesús tsukulh Mapakgsinan kʼakgapun. Lata ama kata tsukulh kgantaxtu tuku xlichuwinan libro xla Apocalipsis, nema makgtanuma xkachikin Dios. Wa xlakata akinin lamaw «kxkilhtamaku Malana».

⁴ Xlakata lamaw kʼuma lu xlakaskinka kilhtamaku, lu kuenta kilitlawatkan tastakyaw nema limasiya tapaxkit chu tatekgsa kʼApocalipsis 1:3: «Paxuwa tiku pixlanka likgalhtawakga tuku talichuwinanit pi nala chu paxuwakgo tiku nakgaxmatkgo chu namakgantaxtikgo tuku anta tatsokgnit, xlakata kilhtamaku nema lakkaxwilikanit talakatsuwinita». Wa xlakata, lu xlakaskinka pixlanka nalikgalhtawakgayaw, nakgaxmataw chu nalilatamayaw «tuku talichuwinanit pi nala». ¿Tuku umakgolh tachuwin nema nalilatamayaw?

LIWANA KAKATSI KOMO JEHOVÁ MAKGAMAKGLHTINAN MINTAKAKNIN

5. ¿La limasiya libro xla Apocalipsis pi lu xlakaskinka nakatsiyaw komo Jehová makgamakglhtinan kintakakninkan?

⁵ Lata xapulana capítulo xla Apocalipsis limasiya pi Jesús kuenta tlawa putum tuku lama kcongregaciones (Apoc. 1:12-16, 20; 2:1). Tamakatsinin nema kamalakgachanilh akgtujun congregaciones xalak Asia Menor limasiya pi uma chuna. Kʼumakgolh tamakatsinin, mastalh tastakyaw nema xʼama kamakgtaya kstalaninanin Cristo xalak pulana siglo nakatsikgo komo Jehová xmakgamakglhtinama xtakakninkan. Chu umakgolh tastakyaw na kamakgtaya putum xlakskujnin Dios xalak kinkilhtamakujkan. ¿Tuku kinkamasiyaniyan uma? Pi kimPulalinakan, Jesucristo, liwana katsi la wi kintakanajlakan. Xla kinkapulalinan chu kinkakuentajtlawayan, chu ni anan tuku ni katsi. Katsi tuku kilitlawatkan xlakata Jehová chuntiya tlan nakinkaʼakxilhan. La uku, nalichuwinanaw makgapitsi tastakyaw nema xla mastalh chu nema kilikgalhakgaxmatatkan.

6. 1) Chuna la wan Apocalipsis 2:3, 4, ¿tuku taʼakglhuwit xkgalhikgo kstalaninanin Cristo xalak Éfeso? 2) ¿Tuku kinkamasiyaniyan uma?

⁶ (Kalikgalhtawakga Apocalipsis 2:3, 4). Chuntiya kapaxkiw Jehová chuna la xapulana. Tamakatsinin nema Jesús kamaxkilh kstalaninanin Cristo xalak Éfeso xmasiya pi lu xtayanikgonit chu chuntiya kskujnanimakgo Jehová maski tuwa tuku xtitaxtumakgo. Pero nialh xkgalhinikgo tapaxkit Jehová chuna la xapulana. Komo xlakaskinkgo pi Jehová xmakgamakglhtinalh xtakakninkan, xtalakaskin pi xmatliwakglhkgolh tapaxkit nema xkgalhinikgo. Nachuna lama kkinkilhtamakujkan. Ni kajwatiya talakaskin natayaniyaw; talakaskin pi tapaxkit wa tuku nakinkamakgpuwantiniyan. Jehová ni kajwatiya akxilha tuku tlawayaw, na akxilha tuku xlakata chuna tlawayaw. Xla lu xlakaskinka akxilha tuku xlakata wi tuku tlawayaw. Xla kgalhkgalhi pi kakakninaniw xlakata paxkiyaw chu paxtikatsiniyaw (Prov. 16:2; Mar. 12:29, 30).

7. 1) Chuna la wan Apocalipsis 3:1-3, ¿tuku taʼakglhuwit akxilhli Jesús kcongregación xalak Sardis? 2) ¿Tuku kilitlawatkan akinin?

⁷ (Kalikgalhtawakga Apocalipsis 3:1-3). Chuntiya skgalalh katawilaw. Natalan xalak congregación xalak Sardis atanu taʼakglhuwit xkgalhikgo. Maski xapulana lhuwa la kskujnanimakgolh Jehová, la uku nialh chuna xtlawamakgolh. Wa xlakata Jesús kawanilh pi skgalalh xtawilakgolh. Unu wi akgtum tastakyaw kimpalakatakan. Katsiyaw pi Jehová ni patsankga tuku tlawayaw xpalakata (Heb. 6:10). Uma ni wamputun pi ni skgalalh kilitawilatkan chu pi nialh kilimatliwakglhatkan kintakanajlakan. Max la uku nialhla tlawayaw chuna la xapulana, pero “kilimalhuwitkan tuku tlawayaw kxtaskujut Malana” chu chuntiya skgalalh natawilayaw asta akxni namin lisputni (1 Cor. 15:58; Mat. 24:13; Mar. 13:33).

8. ¿Tuku kinkamasiyaniyan tachuwin nema Jesús kawanilh kstalaninanin Cristo xalak Laodicea? (Apocalipsis 3:15-17).

⁸ (Kalikgalhtawakga Apocalipsis 3:15-17). Xatapaxuwan chu xliputum kinakujkan kakakninaniw Jehová. Ktamakatsinin nema Jesús kamalakgachanilh kstalaninanin Cristo xalak Laodicea, lichuwinalh atanu taʼakglhuwit. Xlakan «xtachuna la xatsitsi chuchut» xlitaxtukgo o nialh xatapaxuwan xkakninanimakgolh Jehová. Chu asta Jesús kawanilh pi nialh xpaxuwamakgo. Wa xlakata xtalakaskin pi xmatliwakglhkgolh chuna la kskujnanimakgo chu xkakninanimakgo Jehová (Apoc. 3:19). ¿Tuku kinkamasiyaniyan uma? Komo nialh paxuwayaw chuna la xapulana, talakaskin naʼakxilhaw la xlilhuwa xtapalh litaxtu tuku makglhtinanaw xlakata kintakanajlakan (Apoc. 3:18). Ni kamastaw talakaskin pi lhuwa tuku kgalhiputunkan nakinkamalaktlawiyan uma. Lakaskinaw pi taskujut xla kintakanajlakan wa tuku tlakg xlakaskinka nalitaxtu kkilatamatkan.

9. Chuna la kawanilh Jesús congregaciones xalak Pérgamo chu Tiatira, ¿tuku kuenta kilitlawatkan?

⁹ Kalakgmakgaw tuku masiyakgo apóstatas. Jesús palha kastakyawalh makgapitsi kstalaninanin Cristo xalak Pérgamo xlakata xtlawamakgolh pi xʼanalh tapapitsit (Apoc. 2:14-16). Pero kstalaninanin Cristo xalak Tiatira, kawanilh laktlan tachuwin xlakata xlakgmakgankgonit «ni xaxlikana xtamasiy Satanás» chu kamakgpuwantinilh ni namakgxtakgkgo xaxlikana (Apoc. 2:24-26). Kstalaninanin Cristo tiku xtaxlajwanikgonit xtakanajlakan chu xmastakgonit talakaskin pi xkaʼakgskgawilh ni xaxlikana tamasiy xlimakgxtakgatkan xwanit uma. Nachuna, talakaskin pi akinin nalakgmakganaw kaxatukawa tamasiy nema ni tatalakxtumi tuku lakpuwan Jehová. Max apóstatas nalimasiyakgo pi «kakninanikgo Dios», pero tuku xaxlikana wa pi «ni lilatamakgo» tuku skin Dios (2 Tim. 3:5). Komo liwana lakputsananiyaw xTachuwin Dios, tlakg ni tuwa nalakgapasaw chu nalakgmakganaw ni xaxlikana tamasiy (2 Tim. 3:14-17; Jud. 3, 4).

10. ¿Tuku atanu kinkamasiyaniyan tuku Jesús kawanilh congregaciones xalak Pérgamo chu Tiatira?

¹⁰ Ni katlawaw chu ni kamakgamakglhtinaw kaxatukawa talakgxtumit nema ni xlitatlawat. Anta kPérgamo chu kTiatira xʼanan atanu taʼakglhuwit. Makgapitsi kstalaninanin Cristo xalak uma congregación ni xlakgmakgankgo talakgxtumit nema ni xlitatlawat, wa xlakata Jesús kastakyawalh (Apoc. 2:14, 20). Uma kinkamasiyaniyan pi Jehová ni kintikamakgamakglhtinan komo natlawayaw talakgxtumit nema ni xlitatlawat maski akglhuwata kata lakgapasaw xaxlikana chu maski lhuwa tuku lakgayaw (1 Sam. 15:22; 1 Ped. 2:16). Maski uma kakilhtamaku ni lilatamakgo xlimapakgsin Dios, xla lakaskin pi kamaxkiw kakni xlimapakgsin (Efes. 6:11-13).

11. ¿Tuku katsininitaw asta la uku? (Na kaʼakxilhti recuadro «Tuku kinkamasiyaniyan»).

¹¹ ¿Tuku lichuwinanitaw asta la uku? Akxilhnitaw pi lu xlakaskinka nakatsiyaw komo Jehová makgamakglhtinan kintakakninkan. Komo tlawamaw tuku nitlan, lakapala kalakgpaliw (Apoc. 2:5, 16; 3:3, 16). Pero, Jesús wi atanu tuku lichuwinalh ktamakatsinin nema kamalakgachanilh congregaciones. ¿Tuku uma?

SKGALALH KATAWILA XLAKATA NATAYANIYA TAPUTSASTALANIT

12. ¿Tuku kinkamasiyaniyan tamakatsin nema makgamakglhtinankgolh congregaciones xalak Esmirna chu Filadelfia? (Apocalipsis 2:10).

¹² La uku kalichuwinaw tamakatsinin nema makglhtinankgolh congregaciones xalak Esmirna chu Filadelfia. Jesús kawanilh umakgolh kstalaninanin Cristo pi ni xpekuanikgolh taputsastalanit, xlakata Jehová xʼama kasikulunatlawa komo ni xmakgxtakgkgolh (Kalikgalhtawakga Apocalipsis 2:10; 3:10). ¿Tuku kinkamasiyaniyan umakgolh tamakatsinin? Pi xlilat nalilakpuwanaw pi nakinkaputsastalanikanan, chu pi lu xlakaskinka skgalalh natawilayaw xlakata natayaniyaw (Mat. 24:9, 13; 2 Cor. 12:10). ¿Tuku xlakata lu xlakaskinka nalilakpuwanaw uma?

13, 14. ¿La kakitaxtuninit xlakskujnin Dios xlakata tuku lichuwinan capítulo 12 xla Apocalipsis?

¹³ Libro xla Apocalipsis kinkawaniyan pi «kxkilhtamaku Malana», uma wamputun, kkinkilhtamakujkan, xlakskujnin Dios xʼamaka kaputsastalanikan. Capítulo 12 wan pi «analh akgtum guerra anta kʼakgapun» akxni tawilalh xTamapakgsin Dios. Miguel, Jesucristo tiku maxkika Tamapakgsin, chu xʼángeles talatlawakgolh Satanás chu xdemonios (Apoc. 12:7, 8). Tuku kitaxtulh wa pi umakgolh xtalamakgasitsin Dios kamakgatlajaka chu kamakaminka unu kKatiyatni, niku lu kamakgapatinamakgolh latamanin (Apoc. 12:9, 12). Pero ¿la kakitaxtuninit xlakskujnin Dios xlakata uma tuku lanit?

¹⁴ Libro xla Apocalipsis lichuwinan tuku tlawama Satanás. Xlakata nialhla tanu kʼakgapun, katlawani tuku nitlan xatalaksakni kstalaninanin Cristo, tiku lakskujnanimakgo xTamapakgsin Dios kKatiyatni chu «kalakgayawakanit nalichuwinankgo Jesús» (Apoc. 12:17; 2 Cor. 5:20; Efes. 6:19, 20). ¿La kgantaxtunit uma tuku xlichuwinankanit?

15. ¿Tiku «chatiy tatayananin» nema kalichuwinankan kcapítulo 11 xla Apocalipsis, chu tuku kaʼakgspulalh?

¹⁵ Satanás tlawalh pi xtalamakgasitsin Dios xkaputsastalanikgolh xatalaksakni kstalaninanin Cristo tiku xpulalimakgo la xlichuwinamaka xTamapakgsin Dios. Anta xmakgtanumakgo natalan tiku lu xlakaskinka tuku xlakgayakgo. Umakgolh wa «chatiy tatayananin»b tiku libro xla Apocalipsis kalichuwinan pi kamakgnikan (Apoc. 11:3, 7-11). Kkata 1918, kgalhtsayan natalan tiku xpulalimakgo taskujut kaliyawaka taʼakgsanin chu kawanika pi makgas kilhtamaku xʼamakgolh tanukgo kpulachin. Max kxlakatinkan latamanin xtasiya pi xmasputukanita xtaskujutkan.

16. ¿Tuku lalh nema lu kaks malakawaninan kkata 1919, pero tuku chuntiya tlawama Satanás asta la uku?

¹⁶ Tuku talichuwinan kcapítulo 11 xla Apocalipsis na lichuwinan pi «chatiy tatayananin» xʼamaparakgo latamakgo ni makgas kilhtamaku. Lu kaks malakawaninan pi nina xchan akgtum kata la xkatamaknukanit kpulachin akxni kgantaxtulh uma. Marzo kkata 1919, umakgolh xatalaksakni kstalaninanin Cristo katamakxtuka kpulachin, chu alistalh mapanuka tuku xkaliyawakanit. Natalan tunkun tsukuparakgolh lichuwinankgo xTamapakgsin Dios. Pero Satanás ni taxlajwanilh. Lata uma kilhtamaku kalakgmakaminit xlakskujnin Dios taputsastalanit nema xtachuna la akgtum «kgalhtuchokgo» (Apoc. 12:15). Wa xlakata, kimputumkan talakaskin “natayaniyaw chu nakgalhiyaw takanajla” (Apoc. 13:10).

KATLAWA PUTUM TUKU MATLANIYA KTASKUJUT NEMA JEHOVÁ KINKALAKGAYAWANITAN

17. ¿Tuku tamakgtay makglhtinankgonit xlakskujnin Dios maski Satanás lu kaputsastalanima?

¹⁷ Alistalh, capítulo 12 xla Apocalipsis lichuwinan pi xlakskujnin Dios xʼamakgolh makglhtinankgo tamakgtay, xlakata wan pi «katiyatni […] kgotwalh kgalhtuchokgo», uma wamputun, taputsastalanit (Apoc. 12:16). Chu wa uma tuku lanit. Minit kilhtamaku, tiku makgtanumakgo kxkakilhtamaku Satanás, chuna la makgapitsi tiku lakkaxwilikgo limapakgsin, kamakgtayakgonit xkachikin Dios. Minit kilhtamaku xlakskujnin Jehová ankgonit kxlakatin mapakgsinanin niku tlajanankgonit chu uma kamakgtayanit chuntiya natlawakgo xtaskujutkan. ¿Chu la maklakaskinkgonit uma? Limaklakaskinkgonit kaxatukawa kilhtamaku xlakata namakgantaxtikgo taskujut nema Jehová kalakgayawanit (1 Cor. 16:9). ¿Tuku makgtanuma kʼuma taskujut?

18. ¿Tuku taskujut tlakg xlakaskinka lakgayanaw kʼuma xaʼawatiya kilhtamaku?

¹⁸ Jesús lichuwinalh pi kstalaninanin xʼamakgo lichuwinankgo «xatlan tamakatsinin xla Tamapakgsin» kxlikalanka Katiyatni akxni nina xmilh lisputni (Mat. 24:14). Xlakata namakgantaxtikgo uma taskujut, kgalhikgo xtamakgtay chatum ángel o lhuwa ángeles tiku kgalhikgo «xatlan tamakatsinin nema putum kilhtamaku namakgapala» chu kalitachuwinan «tiku lamakgolh kkatiyatni: xliputum laklanka kachikinin, laklanka familias, tiku chuwinankgo tipalhuwa tachuwin chu kachikinin» (Apoc. 14:6).

19. ¿Tuku atanu tamakatsinin xlimastatkan tiku paxkikgo Jehová?

¹⁹ Xlakskujnin Dios ni kajwatiya lichuwinankgo xalaktlan tamakatsinin xla xTamapakgsin Dios. Na xkalimakgtayatkan ángeles nema kalichuwinankan kcapítulos 8 asta 10 xla Apocalipsis. Umakgolh ángeles lichuwinankgo tipalhuwa talakgaputsit nema nakalakgmin tiku lakgmakgankgo xTamapakgsin Dios. Wa xlakata, xtatayananin Jehová lichuwinamaw akgtum nixatlan tamakatsinin nema xtachuna «chijit chu lhkuyat». Uma tamakatsinin masiya tuku Dios nakatlawani putum tuku likgatsi xkakilhtamaku Satanás (Apoc. 8:7, 13). Latamanin xlikatsitkan pi lakatsu wi xlisputni kakilhtamaku. Kajwatiya chuna tlan natlawakgo talakgpalit nema talakaskin xlakata tlan nalakgtaxtunikgo xtasitsi Jehová (Sof. 2:2, 3). Xlakata uma tamakatsinin ni lakgatikgo putum latamanin, talakaskin ni napekuanaw. Chu akxni lama nawan lhuwa tapatin xaʼawatiya tamakatsinin nema namastayaw tlakg tuwa nawan (Apoc. 16:21).

KAKGALHAKGAXPATTI «TUKU TALICHUWINANIT PI NALA»

20. ¿Tuku nalichuwinanaw kʼakgtiy artículos nema stalakgo?

²⁰ Lu xlakaskinka nakgalhakgaxmataw «tuku talichuwinanit pi nala» xlakata «akinin na taxtunitaw kfoto», uma wamputun pi makgtayanamaw nakgantaxtu tuku lichuwinan Apocalipsis (Apoc. 1:3). Pero ¿la tlan natayaniyaw taputsastalanit chu chuntiya nalichuwinanaw umakgolh tamakatsinin? Anan pulaktiy tuku nakinkamaxkiyan litliwakga xlakata namakgantaxtiyaw: pulana, tuku wan Apocalipsis xlakata xtalamakgasitsin Dios, chu xlipulaktiy, tasikulunalin nema kgalhkgalhimaw komo ni namakgxtakgaw Dios. Nalichuwinanaw umakgolh temas kʼakgtiy artículos nema stalakgo.