Tastakyaw nema nakinkamakgtayayan xlakata tlan nakinkakitaxtuniyan

1. ¿Tuku xlakata kimputumkan maklakaskinaw xliskgalala Dios? (Proverbios 4:7).

¿MINIT kilhtamaku wi tuku lu xlakaskinka laksaknita? Komo chuna, max skini Jehová pi xmaxkin liskgalala xlakata xkatsiya pi xmaklakaskina (Sant. 1:5). Mapakgsina Salomón tsokgli: «Liskgalala wa tuku tlakg xlakaskinka» (kalikgalhtawakga Proverbios 4:7). Xlikana, xla ni xlichuwinama kaxatukawa liskgalala, wata liskgalala nema masta Jehová (Prov. 2:6). Pero ¿tlan nakinkamakgtayayan xliskgalala Dios natayaniyaw taʼakglhuwit xala uku? Chuna. Uma artículo nakinkamasiyaniyan.

2. ¿Tuku pulaktum nakinkamakgtayayan xlakata xlikana skgalala nawanaw?

² Pulaktum la skgalala nawanaw wa nalikgalhtawakgayaw chu nalilatamayaw xtamasiykan chatiy lakchixkuwin tiku kalilakgapaska xlakata xliskgalalakan. Pulana, nalichuwinanaw Salomón. Biblia wan pi «Dios maxkilh Salomón lhuwa liskgalala chu taʼakgatekgsni» (1 Rey. 4:29). Chu, xlipulaktiy, nalichuwinanaw xliʼakxilhtit Jesús, chatum chixku tiku lu skgalala nema latamanit kKatiyatni (Mat. 12:42). Xpalakata Jesús, wanka: «Chu nakgalhi xʼespíritu Jehová, xʼespíritu liskgalala chu taʼakgatekgsni» (Is. 11:2).

3. ¿Tuku naʼakxilhaw kʼuma artículo?

³ Xlakata liskgalala nema Dios kamaxkilh, Salomón chu Jesús mastakgolh laktlan tastakyaw nema kimputumkan tlan litamakgtayayaw. Kʼuma artículo nalichuwinanaw pulaktutu: la kiliʼakxilhatkan tumin, taskujut chu la kiʼakstukan nakinkaʼakxilhkanan.

LA KILIʼAKXILHATKAN TUMIN

4. ¿La xlilhuwa tumin xkgalhikgo Salomón chu Jesús?

⁴ Salomón xkgalhi lhuwa tumin chu tuku lhuwa xtapalh (1 Rey. 10:7, 14, 15). Pero, Jesús ni lhuwa tuku xkgalhi chu ni xkgalhi xchik (Mat. 8:20). Maski chuna, Salomón chu Jesús xʼakxilhkgo tuku lhuwa xtapalh chuna la xlilat xlakata liskgalala nema xkgalhikgo Jehová xkamaxki.

5. ¿Tuku xlakpuwan Salomón xlakata tumin?

⁵ Salomón xkatsi pi «tumin litamakgtayakan» (Ecl. 7:12). Tumin kinkamakgtayayan nakgalhiyaw tuku maklakaskinaw chu na tlan nalitamawayaw tuku lakgatiyaw. Pero, maski lhuwa tumin xkgalhi, Salomón akgatekgsli pi wi tuku tlakg xlakaskinka nixawa tumin. Akgtum liʼakxilhtit, xla tsokgli: «Tlakg tlan akgtum xatlan tukuwani nixawa nakgalhikan lhuwa tuku xtapalh» (Prov. 22:1). Na akxilhli pi latamanin tiku paxkikgo tumin ni lipaxuwakgo tuku kgalhikgo (Ecl. 5:10, 12). Chu lichuwinalh tuku lu nitlan kitaxtu akxni lipawankan tumin, xlakata la uku kgalhiyaw chu max chali nialh katikgalhiw (Prov. 23:4, 5).

6. ¿La xʼakxilha Jesús tuku lhuwa xtapalh? (Mateo 6:31-33).

⁶ Jesús xʼakxilha chuna la xlilat tuku lhuwa xtapalh. Xlipaxuwa liwat chu vino (Luc. 19:2, 6, 7). Akgtum kilhtamaku, chuchut lu xatlan vino limaxtulh, chu uma wa xapulana milagro nema tlawalh (Juan 2:10, 11). Nachuna, akxni nilh klhakganit maktum lhakgat nema lu tapalaxla xwanit (Juan 19:23, 24). Pero tuku lhuwa xtapalh ni wa tuku tlakg xlakaskinka xwanit kxlatamat. Kawanilh kstalaninanin: «Nila tiku skujni chatiy malana; […]. Nila nalitaxtuyatit xlakskujnin Dios chu xlakskujnin Tumin» (Mat. 6:24). Jesús masiyalh pi, komo pulana nawiliyaw xTamapakgsin Dios, Jehová nakinkamaxkiyan tuku maklakaskinaw (kalikgalhtawakga Mateo 6:31-33).

7. ¿Tuku tasikulunalin lipaxuwanit chatum tala xlakata ni wa tlakg xlakaskinka akxilha tumin?

⁷ Lhuwa natalan litamakgtayakgonit xalakwan xtastakyaw Jehová xlakata la akxilhkan tumin. Kaʼakxilhwi xliʼakxilhtit chatum tala tiku nina tamakgaxtokga nema wanikan Daniel. Xla wan: «Akxni aku xakstakma klakkaxwililh pi skujnanikan Jehová wa tuku tlakg xlakaskinka xʼama wan kkilatamat». Xlakata Daniel lu liskujnit ni lhuwa tuku nakgalhi kxlatamat, tlan limaklakaskinit xkilhtamaku chu tuku katsini tlawa xlakata namakgtayanan klabores de socorro chu kBetel. Wampara: «Nikxni klakpuwanit pi nitlan tuku klaksakli. Xlikana, tlakg xaktlajalh lhuwa tumin komo wa tlakg xlakaskinka xaktiʼakxilhli, pero ni xakkgalhilh amigos nema kkgalhi la uku. Nachuna, xlakata pulana kwili xTamapakgsin Dios kkilatamat lu kimakgapaxuwa chu uma nila xtilalh komo kaj xakliskujli naktlaja lhuwa tumin. Ni anan kkakilhtamaku tumin nema tlan naktamalakxtumi tasikulunalin nema Jehová kimaxkinit». Liwana tasiya pi komo wa tlakg xlakaskinka naʼakxilhaw tuku xla kintakanajlakan chu ni wa tumin, tlan nakinkakitaxtuniyan.

LA KILIʼAKXILHATKAN TASKUJUT

8. ¿La katsiyaw pi Salomón xʼakxilha taskujut chuna la xlilat? (Eclesiastés 5:18, 19).

⁸ Salomón wa pi tapaxuwan nema makgkatsiyaw xlakata kintaskujutkan wa «xtamaskiwin Dios» (kalikgalhtawakga Eclesiastés 5:18, 19). Na tsokgli: «Putum palha taskujut wi tuku tlan limin» (Prov. 14:23). Chu xla ni kaj akglakgwa tuku xwan. Liwana xkatsi tuku wamputun skujkan, xlakata katlawalh chiki, kachalh uvas, tlawalh jardines chu estanques, chu na katlawalh laklanka kachikinin (1 Rey. 9:19; Ecl. 2:4-6). Xlikana pi, lu palha skujli. Chu xlikana pi Salomón lipaxuwalh uma taskujut, pero xkatsi pi ni kajwatiya uma xtalakaskin xlakata napaxuwakan. Nachuna, lhuwa tuku tlawalh xpalakata Jehová. Akgtum liʼakxilhtit, pulalilh akxni tlawaka lu xastlan templo xlakata nakakninanikan Jehová, nema makgapalalh akgtujun kata (1 Rey. 6:38; 9:1). Akxni tanu tanu tuku xtlawanit kxlatamat, akxilhli pi tuku xla takanajla wa tuku tlakg xlakaskinka. Tsokgli: «Xlakata kgaxpatnita putum uma, wa uma tuku militlawat: kapekuani xaxlikana Dios chu kakgalhakgaxpatti xlimapakgsin» (Ecl. 12:13).

9. ¿Tuku tlawalh Jesús xlakata taskujut ni wa tlakg xlakaskinka xʼakxilhli?

⁹ Jesús lu skulujwa xwanit. Akxni kgawasaku xwanit, xwakna xlitaxtu (Mar. 6:3). Max xnatlatni lu xpaxtikatsinikgo xlakata xkamakgtaya nakgalhikgo tuku xmaklakaskinkgo xlakata klhuwakan xwankgonit. Chu, xlakata ni xkgalhi talakgalhin, tlan taskujut xtlawa, wa xlakata max lhuwa tiku xmatlawikgo tuku xliskuja. Tlan lilakpuwanaw la Jesús xlipaxuwa xtaskujut. Pero ni xmasta talakaskin pi uma xmakglhtilh kilhtamaku chu nialh xlakaskinka xʼakxilhli tuku xla xtakanajla (Juan 7:15). Chu akxni xliputum kilhtamaku xlichuwinama Dios mastalh uma tastakyaw: «Ni kaliskujtit taway nema lakxla, wata wa kaliskujtit taway nema ni lakxla chu masta latamat nema ni kgalhi xlisputni» (Juan 6:27). Chu ktaʼakgchuwin xalak Sipi wa: «Kamaʼakgstokgwilitit tuku lhuwa xtapalh kʼakgapun» (Mat. 6:20).

10. Komo lu skulujwa akinin, ¿tuku max tuwa xtitaxtuw?

¹⁰ Liskgalala nema Jehová kinkamaxkiyan kinkamakgtayayan naʼakxilhaw taskujut chuna la xlilat. Kstalaninanin Cristo kinkawanikanan pi palha kaskujwi chu «laktlan taskujut» katlawaw (Efes. 4:28). Makglhuwa, kimalanakan akxilhkgo pi ni kgalhananaw chu pi lu skulujwa akinin, chu max nakinkawanikgoyan pi lu lakgatikgo la skujaw. Max lhuwa horas natsukuputunaw skujaw xlakata kimalanakan tlan tuku nakalakpuwani xtatayananin Jehová. Pero, komo chuna xtlawaw, max nialh lu kuenta katikatlawaw kifamiliajkan chu tuku xla kintakanajlakan. Komo chuna xlalh, natalakaskin natlawayaw talakgpalit xlakata nalimaxtuniyaw kilhtamaku tuku tlakg xlakaskinka.

11. ¿Tuku katsinilh William akxni akxilhli xatlan xliʼakxilhtit chatum kgolotsin?

¹¹ Chatum kgawasa tiku wanikan William katsinilh pi lu xlakaskinka nawilikan taskujut niku xlilat. Milh kilhtamaku, taskujli chatum tala tiku kgolotsin xlitaxtu kcongregación. Akxni lichuwinan, William wan: «Lu tlan liʼakxilhtit litaxtu xlakata la kiliʼakxilhatkan taskujut. Lu lhuwa skuja chu tlan katalalin tiku makgtamawanankgo xlakata tlan taskujut tlawa. Pero akxni sputa kilhtamaku, wili taskujut niku xlilat chu kajwatiya lilakgaputsa xfamilia chu xtakanajla. Xla chatum lataman tiku lu paxuwa nema klakgapasa».b

LA KIʼAKSTUKAN KINKAʼAKXILHKANAN

12. ¿La limasiyalh Salomón pi ni xmalakatsali la xʼakstu xʼakxilhkan, chu la makgatsankgalh uma?

¹² Akxni Salomón kskujnani Jehová, xʼakxilhkan chuna la xlilat. Akgtum kilhtamaku, akxni kgawasaku xwanit chu nina makgas la xmapakgsinama, xkatsi pi wi tuku nila xtlawa chu skinilh Jehová pi xpulalilh (1 Rey. 3:7-9). Nachuna, liwana xkatsi tuku nitlan kitaxtu akxni tlankajwanankan. Tsokgli: «Pulana wi tatlankit chu alistalh nitlan kitaxtu; chu tlanka tamakgkatsit, wi akxni nina akgchakgxkan» (Prov. 16:18). Lu nitlan, pero chuna la titaxtulh kilhtamaku patsankgalh xalaktlan xtastakyaw. Akxni akglhuwata kata la xmapakgsinama, tlankajwanalh chu nialh kgalhakgaxmatli xlimapakgsin Dios. Akgtum liʼakxilhtit, Limapakgsin xwan pi mapakgsinanin hebreos: «Ni lhuwa lakpuskatin xlitatawilatkan xwanit, xlakata ni nalakgpalinikgo xnaku» (Deut. 17:17). Salomón kgalhakgaxmatmakgalh uma limapakgsin chu kgalhilh 700 lakpuskatin chu 300 concubinas, ¡chu lhuwa umakgolh lakpuskatin atanu dioses xkakninanikgo! (1 Rey. 11:1-3). Max lakpuwa pi nitu xʼama la. Maski chuna lakpuwa o ni, tuku nitlan tlawalh nitlan kitaxtunilh xlakata tamakgatlinilh Jehová (1 Rey. 11:9-13).

13. ¿Tuku katsiniyaw akxni lilakpuwanaw la xtaktuju Jesús?

¹³ Jesús ankgalhin limasiyalh pi xtaʼaktuju chu ni malakatsalilh la xʼakxilhkan. Akxni nina xmin kKatiyatni, lhuwa tuku tlawalh chuna la kskujnanima Jehová. Colosenses 1:16 wan pi «xpalakata xla malakatsukika putum tuku xalak akgapun chu putum tuku xalak katiyatni». Max akxni tamunulh, Jesús lakapastakli tuku xtlawanit akxni xtawilacha xTlat kʼakgapun (Mat. 3:16; Juan 17:5). Pero ni litlankajwanalh akxni lakapastakli putum uma. Chu, nikxni limasiyalh pi tlakg xlakaskinka xlitaxtu nixawa amakgapitsin. Kawanilh kstalaninanin pi ni milh kKatiyatni «xlakata naskujnanikan, wata milh xlakata nakaskujnani amakgapitsin chu xlakata namasta xlatamat chu nakalilakgmaxtu lhuwa latamanin» (Mat. 20:28). Lichuwinalh pi nila tuku kaj xʼakstu xtlawa (Juan 5:19). ¡Jesús lu limasiyalh tataktujut! ¿Ni xlikana pi stalaniputunaw xatlan xliʼakxilhtit?

14. ¿La kinkamakgtayayan xtachuwin Jesús nakinkaʼakxilhkanan chuna la xlilat?

¹⁴ Jesús kamasiyanilh kstalaninanin pi ni xmalakatsalikgolh chuna la xʼakstukan xkaʼakxilhkan. Akgtum kilhtamaku kawanilh: “Minchixitkan xalak miʼakgxakgakan katsikan chuna la xlikganlhuwa” (Mat. 10:30). Lu tlan kinkamamakgkatsiniyan umakgolh tachuwin, liwaka komo lakpuwanaw pi nitu litaxtuyaw. Kinkamalakapastakayan pi kinTlatkan xalak akgapun lu kinkalilakgaputsayan, pi lu xlakaskinka litaxtuyaw kxlakatin. Komo Jehová lakpuwan pi kinkalakgchanan naskujnaniyaw chu nalatamayaw putum kilhtamaku kxasasti kakilhtamaku, ¿tiku litaxtuyaw akinin xlakata nalakpuwanaw pi ni kinkalakgchanan?

15. 1) Chuna la lichuwinalh makgasata revista La Atalaya, ¿la xlilat nakinkaʼakxilhkanan? 2) Chuna la tasiya kfoto xla página 24, ¿tuku tasikulunalin namakgatsankgayaw komo namalakatsaliyaw chuna la kiʼakstukan kinkaʼakxilhkanan?

¹⁵ Titaxtunita 15 kata, revista La Atalaya kinkamakgpuwantinin nakinkaʼakxilhkanan chuna la xlilat. Lichuwinalh: «Ni kililakpuwanatkan pi lu xlakaskinka litaxtuyaw pi asta natlankajwananaw; pero na ni kililakpuwanatkan pi nitu litaxtuyaw. Wata lakaskinaw nakinkaʼakxilhkanan chuna la xlilat, chu wa xlakata kuenta kilitlawatkan tuku tlan tlawayaw chu tuku nila tlawayaw. Chatum tala wa: “Nila kwan pi nitlan klikatsi pero na ni la kwan pi lu tlan klikatsi. Kkgalhi laktlan tayat pero na kkgalhi ni laktlan tayat, chuna la amakgapitsi latamanin”».c ¿Akxilhaw pi lu tlan kitaxtu akxni kinkaʼakxilhkanan chuna la xlilat?

16. ¿Tuku xlakata Jehová kinkamaxkiyan laktlan tastakyaw?

¹⁶ Anta kxTachuwin, Jehová kinkamaxkiyan laktlan tastakyaw. Chuna tlawa xlakata kinkapaxkiyan chu lakaskin pi kapaxuwaw (Is. 48:17, 18). Tuku tlakg tlan nalaksakaw wa pulana nawiliyaw Jehová kkilatamatkan. Wa uma tuku xlikana nakinkamakgapaxuwayan. Ni katikgalhiw taʼakglhuwit nema kgalhikgo latamanin tiku kajwatiya lilakpuwankgo nakgalhikgo lhuwa tumin, taskujut o kaj xʼakstukan kalilakpuwankan. Wa xlakata, ¡ankgalhin kalimasiyaw liskgalala chu kamakgapaxuwaw xnaku Jehová! (Prov. 23:15).