Natlatni, kakamakgtayatit minkamanankan napaxkikgo Jehová

1, 2. ¿Tuku xlakata makgapitsi tastakyaw xalak Biblia tlakg xlakaskinka litaxtu kimpalakatakan?

AKXNI chatum kgawasa chu chatum tsumat tamakgaxtokgkgo, chatum kgolotsin kamatitaxtini akgtum taʼakgchuwin nema takilhtinit kBiblia chu xlakan kuenta tlawakgo tastakyaw nema kamaxkimaka. Xlakan liwana lakgapaskgoya uma tastakyaw. Pero, lata uma kilhtamaku, lu xlakaskinka litaxtu xpalakatakan, xlakata la uku nalilatamakgo uma tastakyaw.

² Nachuna kitaxtu xlakata la kamakgastakkan kamanan. Max akgtum tamakgaxtokgat makglhuwata kgaxmatkgonit taʼakgchuwin xlakata la kamakgastakkan kamanan. Pero, akxni kgalhikgo xkamanankan, tlakg xlakaskinka litaxtu uma tastakyaw xpalakatakan. ¡Lu lanka talakgatay nakgalhikgo! Xlikana pi akxni talakgpali kilatamatkan, na talakgpali la akxilhaw tastakyaw xalak Biblia nema lakgapasaw. Wa xlakata, chali chali xlakskujnin Jehová likgalhtawakgayaw Biblia chu lilakpuwanaw chuna la xlitlawatkan xwanit mapakgsinanin xalak Israel (Deut. 17:19).

3. ¿Tuku nalichuwinanaw kʼuma artículo?

³ Natlatni, wixin kgalhiyatit akgtum lu xlakaskinka talakgatay nema tlan xkgalhilh chatum kstalanina Cristo: nakamakgtayayatit minkamanankan nalakgapaskgo Jehová. Pero ni kajwatiya talakaskin nakamasiyaniyatit xlakata Jehová; talakaskin nakamakgtayayatit napaxkikgo Jehová xliputum xnakujkan. ¿La namakgantaxtiyatit? Uma artículo nalichuwinan pulaktati tastakyaw xalak Biblia nema nakamakgtayayan (2 Tim. 3:16). Na nalichuwinan tuku tlan kakitaxtuninit makgapitsi natlatni tiku stalanikgonit xtastakyaw Biblia.

PULAKTATI TASTAKYAW NEMA NAKAMAKGTAYA NATLATNI

4. ¿Tuku tastakyaw tlan nakamakgtaya natlatni xlakata nakamasiyanikgo xkamanankan napaxkikgo Jehová? (Santiago 1:5).

⁴ Pulana: kaputsa xtapulalit Jehová. Xlakata nakamakgtayayatit minkamanankan napaxkikgo Jehová, wixin maklakaskinatit liskgalala. Wa xlakata kaskinitit Jehová (kalikgalhtawakga Santiago 1:5). Jehová wa tiku tlakg xatlan stakyawana. ¿Tuku xlakata? Pulaklhuwa tuku xlakata. Pulaktum wa pi xla chatum tlat tiku lhuwa tuku katsini nema anan kkakilhtamaku (Sal. 36:9). Chu atanu wa pi xalaktlan xtastakyaw ankgalhin kinkamakgtayayan (Is. 48:17).

5. 1) ¿Tuku tamakgtay kamaxki xkachikin Jehová natlatni? 2) ¿Tuku katsini xlakata la kamakgastakkan kamanan kvideo nema taxtukgo natalan Amorim?

⁵ Jehová kamaxki natlatni lhuwa likgalhtawakga nema takilhtinit kBiblia, xlakata tlan nakamakgtayakgo xkamanankan napaxkikgo Jehová (Mat. 24:45). Akgtum liʼakxilhtit, natekgsatit laktlan tastakyaw ksección «Ayuda para las familias», nema akglhuwa kata taxtulh krevista ¡Despertad! chu la uku tatekgsa kjw.org. Kkisitiojkan xla Internet na natekgsa videos nema liminkgo entrevistas chu tlan nakamakgtaya natlatni nalilatamakgo xtastakyaw Jehová xlakata la nakamakgastakkgo xkamanankan (Prov. 2:4-6).b

6. ¿Tuku wan chatum tlat xlakata tapulalit nema xla chu xpuskat makglhtinankgo kxkachikin Jehová?

⁶ Lhuwa natlatni paxtikatsininankgo la Jehová maklakaskin xkachikin xlakata nakamakgtaya. Chatum tlat tiku wanikan Joseph wan: «Kamakgastakkan kgalhtutu kamanan lu tuwa. Kimpuskat chu akit ankgalhin kskiniyaw Jehová pi kakinkamakgtayan. Chu makglhuwa kakxilhnitaw pi taxtunit akgtum artículo o akgtum video akxni lu xakmaklakaskimaw. Xlakata kputsanitaw xtapulalit Jehová lu kinkamakgtayanitan». Joseph chu xpuskat akxilhkgonit pi umakgolh artículos chu videos kamakgtayama xkamanan xlakata xʼamigos Jehová nalitaxtukgo.

7. ¿Tuku xlakata lu xlakaskinka pi natlatni nawilikgo akgtum lu tlan liʼakxilhtit? (Romanos 2:21).

⁷ Pulaktiy: tlan liʼakxilhtit kawili. Kamanan kuenta tlawakgo tuku tlawakgo xnatlatni chu nachuna tlawaputunkgo. Xlikana, kimputumkan kgalhiyaw talakgalhin (Rom. 3:23). Pero natlatni tiku lakgskgalalan lu liskujkgo xlakata nakawilinikgo tlan liʼakxilhtit xkamanankan (kalikgalhtawakga Romanos 2:21). Chatum tlat wa xlakata kamanan: «Xtachuna la panamak; putum kachuwa». Chu wampa: «Akxni akxilhkgo pi tuku tlawayaw ni tatalakxtumi tuku kamasiyanimaw, nakinkawanikgoyan». Wa xlakata, komo lakaskinaw pi kinkamanankan napaxkikgo Jehová, talakaskin pi tapaxkit nema akinin kgalhiniyaw tlakg tliwakga xliwanat chu xlitasiyat kkilatamatkan.

8, 9. ¿Tuku katsini xlakata tuku wankgolh Andrew chu Emma?

⁸ Natlatni lhuwa tuku tlan natlawakgo xlakata nakamasiyanikgo xkamanankan napaxkikgo Jehová. Kaʼakxilhwi tuku wan Andrew, chatum kgawasa tiku tamununita chu kgalhi 17 kata: «Kinatlatni ankgalhin kimasiyanikgonit pi lu xlakaskinka tlawakan oración. Akgatunu katsisni, kintlat xkintatlawa oración maski akit xaktlawanita. Kinatlatni ankgalhin xkinkawanikgoyan: “Tlan natlawaniyatit oración Jehová chuna la xlimakglit nalakaskinatit”. Wa xlakata lu xlakaskinka kakxilha oración. La uku tlan kmakgkatsi akxni ktlawani oración Jehová chu kliʼakxilha la chatum Tlat tiku lu kimpaxki». Natlatni, ankgalhin kalakapastaktit pi tapaxkit nema kgalhiniyatit Jehová lu nakamakgtaya minkamanankan.

⁹ Ka’akxilhwi tuku wan Emma. Akxni xtlat kaʼakgxtakgwililh xlaklin lhuwa tumin nema xtse xokgolh. Emma lakapastaka: «Makglhuwa ni x’akchani tumin kintse. Pero ankgalhin xkinkawaniyan pi Jehová kakuentajtlawa xlakskujnin chu kamaxki tuku maklakaskinkgo. Chu, xlakata tuku xlaksaka kxlatamat, liwana xakakxilha pi xkanajla tuku xkinkawaniyan. Kintse xkinkawiliniyan tlan liʼakxilhtit». ¿Tuku kinkamasiyaniyan? Pi, maski kgalhikgo taʼakglhuwit, natlatni tlan nawilikgo tlan liʼakxilhtit (Gál. 6:9).

10. ¿Tuku kilhtamaku xmaklakaskinkgo natlatni israelitas xlakata nakatachuwinankgo xkamanankan? (Deuteronomio 6:6, 7).

¹⁰ Pulaktutu: ankgalhin kakatachuwinantit minkamanankan. Jehová kawanilh natlatni israelitas pi xkalitachuwinankgolh xkamanankan xpalakata chali chali (kalikgalhtawakga Deuteronomio 6:6, 7). Putum kilhtamaku, xkgalhikgo talakaskin nakamasiyanikgo xkamanankan xlakata napaxkikgo Jehová. Akgtum liʼakxilhtit, kamanan tlan akxtum xkatatawilakgo xnatlatnikan akxni xchananankgo o akxni xmakikgo tachanan. Laktsuman tlan akxtum xkatatawilakgo xnatsetni akxni xkamakgtayakgo ktaskujut xalak chiki, la akxni tsapanankan chu lakgaxtokgonankan. Akxni wi tuku akxtum xtlawakgo xkamaxki talakaskin nakalitachuwinankgo tuku lu xlakaskinka. Akgtum liʼakxilhtit, tlan xlilakpuwankgolh la Jehová tlan xkalikatsininit chu la xkakuentajtlawa xfamilia.

11. ¿Tuku kilhtamaku natlatni tlan katakgalhchuwinankgo xkamanankan?

¹¹ La uku, lhuwa tuku talakgpalinit. Klhuwa países, natlatni chu kamanan nialh akxtum tawilakgo xlakata natlatni ankgo skujkgo chu kamanan ankgo kʼescuela. Wa xlakata, natlatni xlimaxtutkan kilhtamaku xlakata akxtum nakatatawilakgo xkamanankan chu nakatakgalhchuwinankgo (Efes. 5:15, 16; Filip. 1:10). Akxni kakninanikgo Dios kfamilia kamaxki talakaskin natlawakgo uma. Chatum kgawasa tiku wanikan Alexander wan: «Kintlat ankgalhin lakkaxwili xlakata nakkakninaniyaw Dios kfamilia chu ni masta talakaskin pi wi tuku nalaktlawa. Akxni kkgalhtawakgakgoyaw kkgalhchuwinanaw».

12. ¿Tuku xlilakapastakat xʼakgxakga familia akxni kakninanikgo Dios kfamilia?

¹² ¿Tuku tlan natlawa xʼakgxakga familia xlakata xkamanan nalipaxuwakgo akxni kakninanikgo Dios kfamilia? Pulaktum tuku tlan natlawakgo wa akxtum nalikgalhtawakgakgo libro Kalipaxuwa latamat. Komo akxtum nalikgalhtawakgakgo uma libro, max lhuwa tuku tlan nalichuwinankgo. Xlakata wixin lakaskinatit pi minkamanankan nakawanikgoyan tuku makgkatsikgo chu tuku lilakgaputsakgo, ni kamaklakaskintit akxni kakninaniyatit Dios kfamilia xlakata nakakilhniyatit. Chu komo xlakan nalichuwinankgo tuku ni masiya Biblia, ni kalitaʼakglhuwitit. Wata, kakapaxtikatsinitit pi kawanikgoyan tuku makgkatsikgo chu kakamakgpuwantinitit chuntiya natlawakgo. Komo minkamanankan nakawanikgoyan tuku makgkatsikgo, wixin tlakg ni tuwa katimakgkatsitit nakamakgtayayatit.

13. ¿Tuku atanu kilhtamaku tlan namaklakaskinkgo natlatni xlakata nakamakgtayakgo xkamanankan natalakatsuwinikgo Jehová?

¹³ Natlatni, kaputsatit kilhtamaku xlakata nakamakgtayayatit minkamanankan natalakatsuwinikgo Jehová. Ni talakaskin nakgalhkgalhiyatit kilhtamaku asta akxni nakatalikgalhtawakgayatit Biblia xlakata nakalitachuwinanatit xapaxkina kiDioskan. Chatum tse tiku wanikan Lisa wan: «Xaklimaklakaskinaw tamalakatsukin xlakata nakkamakgtayayaw kinkamanankan tlakg nalakgapaskgo Jehová. Akgtum liʼakxilhtit, akxni kinchichikan wi tuku xtlawa chu xkamakgalitsin, xakkamalakapastakayaw pi Jehová xapaxuwana chu paxki latamat, chuna la akinin».

14. ¿Tuku xlakata lu xlakaskinka pi natlatni nakamakgtayakgo xkamanankan nalaksakkgo xatlan amigos? (Proverbios 13:20).

¹⁴ Pulaktati: kakamakgtayatit minkamanankan nakgalhikgo xatlan amigos. Anta kxTachuwin Dios kinkawaniyan pi amigos nema kgalhiyaw tlan nakinkamatlawikgoyan tuku tlan o tuku nitlan (kalikgalhtawakga Proverbios 13:20). Natlatni, ¿katsiyatit tiku xʼamigos minkamanankan? ¿Liwana kalakgapasatit chu akxtum katatawilanitantit? ¿Tuku tlan natlawayatit xlakata nakamakgtayayatit minkamanankan xʼamigos nalitaxtukgo tiku paxkikgo Jehová? (1 Cor. 15:33). Akxni wi tuku akxtum nakatatlawayatit mifamiliajkan, na kakawanitit amakgapitsi natalan tiku lu tlan talalinkgo Jehová (Sal. 119:63).

15. ¿Tuku tlan natlawakgo natlatni xlakata nakamakgtayakgo xkamanankan nakgalhikgo tlan amigos?

¹⁵ Kaʼakxilhwi akgtum li’akxilhtit. Chatum tlat tiku wanikan Tony lichuwinan tuku xla chu xpuskat tlawakgonit xlakata xkamanan nakgalhikgo xatlan amigos: «Kimpuskat chu akit akglhuwata kata la klismaninitaw kkawaniyaw natalan tiku tanu tanu xkatakan chu xtalismaninkan xlakata naminkgo kkinchikkan. Akxtum kwayanaw chu klipaxuwayaw takaknin Dios kfamilia. Klakpuwanaw pi uma lu tlan kilhtamaku xlakata tlan nakkalakgapasaw tiku paxkikgo Jehová chu xatapaxuwan skujnanimakgo. Chu asta tamakgxtakgkgonit kkinchikkan superintendentes de circuito, misioneros chu amakgapitsi natalan. Kakxilhnitaw pi tuku titaxtukgonit umakgolh natalan, xtapaxuwankan chu tuku makgxtakgkgonit xlakata la skujnanimakgo Jehová lu kamakgtayanit kinkamanankan chu kamakgtayanit tlakg natalakatsuwinikgo Jehová». Natlatni, katlawatit putum tuku matlaniyatit xlakata nakamakgtayayatit minkamanankan nakgalhikgo tlan amigos.

¡NI KAMAKGATSANKGA TAKGALHKGALHIN!

16. ¿Tuku xlilakapastakatkan natlatni komo chatum xkamanan nalaksaka namakgxtakga Jehová?

¹⁶ ¿Chu maski lhuwa liskujnitantit xlakata nakamakgtayayatit minkamanankan, pero chatum nawan pi nialh skujnaniputun Jehová? Ni kalakpuwantit pi nitlan tuku tlawanitantit. Jehová kinkamaxkinitan talakaskin kimputumkan chu nachuna kinkamanankan, nalaksakaw komo naskujnaniyaw Jehová o ni. Komo minkamanankan namakgxtakgkgo Jehová, ni kalakpuwantit pi nikxni katitaspitli. Kalakapastaktit parábola xlakata kgawasa tiku laktlawamilh tuku xkgalhi (Luc. 15:11-19, 22-24). Uma kgawasa tamakgatlinilh xatlan tiji, pero alistalh taspitli. Pero max wix nawana: «Uma kaj akgtum cuento. Uma nichuna la klatamat». Tuku titaxtulh chatum kgawasa tiku wanikan Elie limasiya pi uma chuna la.

17. ¿La makgpuwantiniyan tuku titaxtulh Elie?

¹⁷ Wa uma tuku wan Elie xlakata xnatlatni: «Tlawakgolh putum tuku xmatlanikgo xlakata nakimasiyanikgo nakpaxki Dios chu xTachuwin, Biblia. Pero akxni kstakli nialh kkakgalhakgaxmatnilh». Elie lakgaputiy tsukulh lin xlatamat chu xlakgmakgan putum tuku xtlawakgo xnatlatni xlakata namakgtayakgo xlakata xtakanajla. Taxtulh kxchik chu nialh xkgalhakgaxmata xtastakyaw Jehová. Maski chuna, xmin kilhtamaku xlitachuwinan Biblia chatum x’amigo. Elie lakapastaka: «Akxni tlakg xaklitachuwinan kiʼamigo xlakata Jehová tlakg xaklilakpuwan. Tsinu tsinu tuku xkimasiyanikanit xalak Biblia nema xwi kkinaku chu tuku kinatlatni lu xliskujkgonit nakimasiyanikgo tsukupa staka». Titaxtulh kilhtamaku, Elie taspitli.c ¿Lilakpuwanatit la paxuwakgolh xnatlatni xlakata xmasiyanikgonit lata akxni aktsujku xwanit napaxki Jehová? (2 Tim. 3:14, 15).

18. ¿Tuku lakpuwana wix xlakata natlatni tiku lu liskujmakgolh nakamasiyanikgo xkamanankan napaxkikgo Jehová?

¹⁸ Natlatni, Jehová kamaxkinitan talakgalhaman nakamakgastakatit tiku xlakskujnin Jehová nalitaxtukgo (Sal. 78:4-6). Katsiyaw pi mintaskujutkan lu tuwa chu wa xlakata kkawaniyan xliputum kinakujkan pi lu tlan taskujut tlawapatit. Chuntiya katlawatit putum tuku matlaniyatit xlakata nakamakgtayayatit minkamanankan napaxkikgo Jehová chu nakalimakgastakatit xtastakyaw Jehová (Efes. 6:4). Komo chuna natlawayatit, liwana kakatsitit pi xapaxkina kinTlatkan xalak akgapun lu namakgapaxuwayatit.