Tlan nalatamayaw putum kilhtamaku

1. ¿La litamakgtayayaw akxni lilakpuwanaw xtamalaknun Jehová?

JEHOVÁ kamalaknuni tiku kgalhakgaxmatkgo pi nakamaxki «latamat nema ni kgalhi xlisputni» (Rom. 6:23). Akxni lilakpuwanaw uma lu stlan tamalaknun, tlakg paxkiyaw Jehová. Kalilakpuwaw uma: kinTlatkan xalak akgapun lu kinkapaxkiyan, wa xlakata kinkamalaknuniyan uma tamaskiwin xlakata nikxni natamakgatliniyaw.

2. ¿La kinkamakgtayayan tamalaknun xla latamat nema ni kgalhi xlisputni?

² Xtamalaknun Dios xlakata latamat nema ni kgalhi xlisputni, kinkamakgtayayan natayaniyaw taputsan. Asta maski kintalamakgasitsinkan nakinkawanikgoyan pi nakinkamakgnikgoyan, ankgalhin naskujnaniyaw Jehová. ¿Tuku xlakata? Pulaktum wa xlakata katsiyaw pi komo naniyaw chu ni namakgxtakgaw Jehová, xla nakinkamaxkiparayan latamat chu nialh katiniw (Juan 5:28, 29; 1 Cor. 15:55-58; Heb. 2:15). ¿Tuku xlakata liwana katsiyaw pi nalatamayaw putum kilhtamaku? Kaʼakxilhwi makgapitsi tuku xlakata.

JEHOVÁ PUTUM KILHTAMAKU LAMA

3. ¿Tuku xlakata liwana katsiyaw pi Jehová tlan nakinkamaxkiyan latamat putum kilhtamaku? (Salmo 102:12, 24, 27).

³ Liwana katsiyaw pi Jehová nakinkamaxkiyan latamat putum kilhtamaku xlakata wa tiku malakatsukinit latamat chu putum kilhtamaku lama (Sal. 36:9). Kaʼakxilhwi makgapitsi versículos xalak Biblia nema kinkamasiyaniyan pi Jehová putum kilhtamaku latamanit chu putum kilhtamaku nalatama. Salmo 90:2 wan pi xla lama «lata makgasa chu kanikxniwa». Salmo 102 na watiya tuku lichuwinan (kalikgalhtawakga Salmo 102:12, 24, 27). Chu palakachuwina Habacuc lichuwinalh xlakata kinTlatkan xalak akgapun: «Oh, Jehová, ¿ni lapat lata makgasa? Oh, kiDios, kiSanto, wix ni niya» (Hab. 1:12).

4. ¿Tuku xlakata ni kililakgaputsatkan komo tuwa namakgkatsiyaw naʼakgatekgsaw pi Jehová ankgalhin latamanit?

⁴ ¿Tuwa makgkatsiya naʼakgatekgsa pi Jehová «xliputum kilhtamaku lama»? (Is. 40:28). Ni kaj miʼakstu chuna makgkatsiya. Elihú wa xpalakata Dios: «Nila akgatekgsaw la xlilhuwa kilhtamaku latamanit» (Job 36:26). Pero maski wi tuku nila akgatekgsaw ni kilhchanima pi ni xaxlikana. Akgtum liʼakxilhtit, max ni liwana akgatekgsaw la lakatsuku xkgakganat. Pero uma ni wamputun pi ni anan xkgakganat. Xtachuna la uma, latamanin max nikxni liwana katiʼakgatekgswi pi Jehová ni kgalhi xkilhtsukut chu ni kgalhi xlisputni. Pero uma ni wamputun pi Dios ni putum kilhtamaku lama. Maski lhuwa tuku akinin ni liwana akgatekgsaw uma ni laktlawa tuku xaxlikana xlakata Dios (Rom. 11:33-36). Nachuna, xla xlamaja akxni nina xʼanankgo putum tuku akxilhaw, chuna la chichini chu amakgapitsi staku. Biblia liwana kinkawaniyan: «Xla wa tiku tlawalh katiyatni, wa tiku limalakatsukilh xlitliwakga». Chu wan pi “tlawalh akgapun” (Jer. 51:15; Hech. 17:24). Kaʼakxilhwi atanu tuku kinkalimasiyaniyan pi tlan nalatamayaw putum kilhtamaku.

KINKAMALAKATSUKIKAN XLAKATA TLAN NALATAMAYAW PUTUM KILHTAMAKU

5. ¿Tuku takgalhkgalhin xkgalhikgo Adán chu Eva?

⁵ Xliputum tuku Jehová malakatsukilh kKatiyatni, kajwatiya latamanin ni xʼamakgolh nikgo. Xlakan kamaxkika takgalhkgalhin pi tlan xlatamakgolh putum kilhtamaku. Pero Jehová limapakgsilh Adán: «Xtawakat kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya, xlikana pi naniya» (Gén. 2:17). Komo Adán chu Eva xtikgalhakgaxmatkgolh Jehová, ni xtinikgolh. Max xmilh kilhtamaku Dios xtikamaxkilh talakaskin xwakgolh «kiwi nema masta latamat». Uma xkalimasiyanilh pi tlan xʼamakgo latamakgo «putum kilhtamaku» (Gén. 3:22).b

6, 7. 1) ¿Tuku atanu kinkalimasiyaniyan pi ni kinkatlawakan xlakata naniyaw? 2) ¿Tuku tlawaputuna wix akxni nakgalhiya latamat nema ni kgalhi xlisputni? (Kaʼakxilhti dibujo).

⁶ Lu kaks malakawaninan pi makgapitsi científicos akxilhkgonit pi kkiʼakskititkan tlakg lhuwaku tuku tlan xmakiw nixawa tuku katsiniyaw xliputuminika kkilatamatkan. Kkata 2010, maktum revista xalak Estados Unidos nema lichuwinan tuku wankgo científicos, wa pi kiʼakskititkan lhuwa tuku maki nema tlan tamalakxtumikan akgtum video nema makgapala akgtutu millón hora. Komo wi tiku xʼakxilhli uma video, 300 kata xmakgapalalh xlakata xʼakxilhkgolh. Chu max lhuwaku tuku tlan xmakilh chu ni kajwatiya uma. Uma limasiya pi Jehová tlawalh kiʼakskititkan xlakata tlakg lhuwa tuku namaki chu ni kajwatiya tuku tlan katsiniyaw tutupuxamakaw o tatipuxamakaw kata (Sal. 90:10).

⁷ Jehová na kinkatlawanitan xlakata ankgalhin nalatamaputunaw. Chuna la wan Biblia, Dios kawilininit kxnakujkan latamanin pi «nalatamaputunkgo putum kilhtamaku» (Ecl. 3:11). Wa uma pulaktum tuku xlakata linin kintalatlawanakan liʼakxilhaw (1 Cor. 15:26). Kalilakpuwaw uma. Komo snun natatatlayaw, ¿nitu katitlawaw chu kajwatiya nakgalhkgalhitawilayaw naniyaw? Nichuna. Anaw kpumakuchin chu wayaw likuchun xlakata natatlaniyaw. Tlawayaw putum tuku matlaniyaw xlakata ni naniyaw. Chu akxni niy tiku lu paxkiyaw, maski lina kata o kgawasaku, lu lilipuwanaw chu ni tunkun tapanu uma talipuwan (Juan 11:32, 33). Xlikana, katsiyaw pi kiMalakatsukinakan kinkapaxkiyan chu ni xwililh kkinakujkan pi nalatamaputunaw putum kilhtamaku komo ni wa tuku lakpuwanit xpalakatakan latamanin. Pero anan atanu tuku na limasiya pi tlan nalatamayaw putum kilhtamaku. Kalichuwinaw makgapitsi tuku Jehová tlawanit chu tuku tlawama nema limasiya pi tuku xlakpuwanit natlawa xapulana nitu talakgpalima.

TUKU LAKPUWANIT JEHOVÁ NATLAWA NITU TALAKGPALIMA

8. ¿Tuku kinkawaniyan Isaías 55:11 xlakata tuku lakpuwanit Jehová natlawa?

⁸ Maski Adán chu Eva makglakgalhinankgolh chu kamatitaxtinikgolh linin putum xkamanankan, Jehová nitu lakgpalima tuku xlakpuwanit natlawa (kalikgalhtawakga Isaías 55:11). Xla chuntiya lakaskin pi tiku ni makgxtakgkgo kalatamakgolh putum kilhtamaku. ¿Tuku likatsiyaw? Xlakata putum tuku Jehová wanit chu tlawanit xlakata namakgantaxti xtalakaskin.

9. ¿Tuku tamalaknun tlawanit Dios? (Daniel 12:2, 13).

⁹ Jehová malaknunit pi nakamalakastakwani latamanin tiku nikgonita chu nakamaxki talakaskin nalatamakgo putum kilhtamaku (Hech. 24:15; Tito 1:1, 2). Job liwana xkatsi pi Jehová lu kamalakastakwaniputun tiku nikgonita (Job 14:14, 15). Palakachuwina Daniel xkatsi pi xʼamaka kamalakastakwanikan latamanin chu tlan xlatamakgolh putum kilhtamaku (Sal. 37:29; kalikgalhtawakga Daniel 12:2, 13). Judíos xalak xkilhtamaku Jesús xkatsikgo pi Jehová tlan xkamaxkilh kskujnin tiku ni makgxtakgkgo «latamat nema ni kgalhi xlisputni» (Luc. 10:25; 18:18). Jesús makglhuwa lichuwinalh uma tamalaknun, chu akxni xla nilh xTlat malakastakwanilh (Mat. 19:29; 22:31, 32; Luc. 18:30; Juan 11:25).

10. ¿Tuku limasiyakgo talakastakwanat xalamakgasa? (Kaʼakxilhti dibujo).

¹⁰ Jehová wa tiku kinkamaxkiyan latamat chu tlan nakamaxkipara xlatamatkan tiku nikgonita. Maxkilh litliwakga palakachuwina Elías xlakata xmalakastakwanilh xkgawasa puskat xalak Sarepta (1 Rey. 17:21-23). Alistalh, Dios makgtayalh palakachuwina Eliseo xlakata xmalakastakwanilh xkgawasa puskat xalak Sunem (2 Rey. 4:18-20, 34-37). Uma chu amakgapitsi talakastakwanat limasiya pi Jehová kgalhi litliwakga xlakata nakamaxkipara xlatamatkan tiku nikgonita. Chu akxni Jesús latamalh unu kKatiyatni, limasiyalh pi xTlat na xmaxkinit uma litliwakga (Juan 11:23-25, 43, 44). Chu la uku Jesús wilacha kʼakgapun chu makglhtinanit «putum limapakgsin [...] kʼakgapun chu kkatiyatni». Wa xlakata tlan nakamalakastakwani «putum tiku wilakgolh kputaknun» chu tlan nalatamakgo putum kilhtamaku (Mat. 28:18; Juan 5:25-29).

11. ¿Tuku xlakata talakgmaxtut tlawa pi tlan nalatamayaw putum kilhtamaku?

¹¹ ¿Tuku xlakata Jehová mastalh talakaskin pi xmapatinika xKgawasa akxni makgnika? Jesús wa tuku xpalakata: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16). Xlakata xtamakamastan xKgawasa tlawa pi tlan nakinkatapatikanan kintalakgalhinkan, Dios kinkamaxkiyan talakaskin xlakata tlan namakglhtinanaw latamat nema ni kgalhi xlisputni (Mat. 20:28). Apóstol Pablo lichuwinalh tuku lakpuwanit Dios natlawa akxni wa: «Xtachuna la analh linin xpalakata chatum chixku, nachuna nalakastakwanankgo tiku nikgonita xpalakata chatum chixku. Chuna la kaj xpalakata Adán putum nimakgolh, nachuna kaj xpalakata Cristo putum nakamaxkiparakan latamat» (1 Cor. 15:21, 22).

12. ¿La namakgantaxti Jehová tuku lakpuwanit natlawa?

¹² Jesús kamasiyanilh kstalaninanin pi kskinkgolh kxʼoracionkan pi kamilh xTamapakgsin Dios chu kalalh xtalakaskin xTlat unu kKatiyatni (Mat. 6:9, 10). Pulaktum tuku Jehová lakaskin wa pi latamanin kalatamakgolh putum kilhtamaku unu kKatiyatni. Wa xlakata, Jehová laksakli xKgawasa la Mapakgsina chu kamamakxtumima 144,000 latamanin xlakata namakgtayakgo Jesús namakgantaxti xtalakaskin Jehová (Apoc. 5:9, 10).

13. ¿Tuku tlawama Jehová la uku, chu tuku militlawat wix?

¹³ La uku, Jehová kamamakxtumima «lhuwa latamanin» chu kamasiyanima la nalatamakgo akxni xla namapakgsinan (Apoc. 7:9, 10; Sant. 2:8). Maski kkakilhtamaku anan tapapitsit xlakata tasitsi chu guerras, tiku makgtapakgsikgo kʼuma grupo lu liskujkgo xlakata nalakgmakgankgo tasitsi. Tlan nawanaw pi limaklakaskimakgo xʼespadajkan xlakata naliskujkgo ktiyat (Miq. 4:3). Xlakan ni makgtlawakgo guerras, niku kamakgnikan lhuwa latamanin, wata kamakgtayakgo natekgskgo «xaxlikana latamat» akxni kamasiyanikgo xpalakata xaxlikana Dios chu tuku lakpuwanit natlawa (1 Tim. 6:19). Xlakata tatayakgo xaxlikana Dios, max kxfamiliajkan kaputsastalanikan o titaxtukgo tuku tuwa xlakata ni kaʼakchani tumin, pero Jehová kamaxki putum tuku maklakaskinkgo (Mat. 6:25, 30-33; Luc. 18:29, 30). Putum uma kinkalimasiyaniyan pi xTamapakgsin Dios xaxlikana chu namakgantaxti tuku lakpuwanit Jehová natlawa.

AKGTUM LU XATLAN TAKGALHKGALHIN

14, 15. ¿La nakgantaxtu xtamalaknun Jehová pi namasputu linin putum kilhtamaku?

¹⁴ Jesús mapakgsinamaja kʼakgapun kxTamapakgsin Dios chu namakgantaxti putum xtamalaknun Jehová (2 Cor. 1:20). Lata kkata 1914 kamakgatlajama xtalamakgasitsin (Sal. 110:1, 2). Nialh makgas, Jesús chu 144,000 namakgatlajanankgo chu nakamalakgsputukgo putum tiku nitlan likatsikgo kKatiyatni (Apoc. 6:2).

¹⁵ KxTamapakgsin xaʼAkgtum Mil Kata, Jesús nakamalakastakwani tiku nikgonita chu nakamakgtaya putum latamanin nialh nakgalhikgo talakgalhin. Akxni titaxtunita nawan xaʼawatiya taputsan, latamanin tiku Jehová xaʼakgstitum nakaliʼakxilha «nakamaxkikan katiyatni chu putum kilhtamaku nalatamakgo anta» (Sal. 37:10, 11, 29). Chu «xaʼawatiya kintalamakgasitsinkan, wa linin, namalakgsputukan» (1 Cor. 15:26). ¡Lu kinkamakgapaxuwayan uma!

16. ¿Tuku xlitlawat pi naskujnaniyaw Jehová?

¹⁶ Chuna la akxilhnitaw, xTachuwin Dios liwana limasiya pi kintakgalhkgalhinkan xlakata nalatamayaw putum kilhtamaku xaxlikana. Uma takgalhkgalhin kinkamakgtayayan ni namakgxtakgaw Jehová kʼuma xaʼawatiya kilhtamaku nema lu xatuwa. Pero, komo kamakgapaxuwaputunaw Jehová chu Jesús, ni katikamakgxtakgwi xlakata kapaxkiyaw xliputum kinakujkan chu ni kaj xlakata lakgmaxtuputunaw kilatamatkan (2 Cor. 5:14, 15). Uma tapaxkit wa tuku kinkamakgpuwantiniyan nastalaniyaw xliʼakxilhtitkan chu nakalitachuwinanaw kintakgalhkgalhinkan amakgapitsin (Rom. 10:13-15). Komo tlakg naliskujaw xlakata ni kiʼakstukan nakinkapaxkikanan chu nakalilakgaputsayaw amakgapitsin, Jehová xliputum kilhtamaku kiʼamigojkan nalitaxtuputun (Heb. 13:16).

17. ¿Tuku kilitlawatkan chatunu akinin? (Mateo 7:13, 14).

¹⁷ ¿Chu akinin? ¿Nalatamayaw putum kilhtamaku? Jehová kinkamaxkinitan uma takgalhkgalhin, pero talakaskin pi akinin ni namakgxtakgaw tiji nema linan klatamat (kalikgalhtawakga Mateo 7:13, 14). Pero ¿la nawan latamat kxasasti kakilhtamaku? Wa tuku naʼakxilhaw kʼatanu artículo.