Tajatat xla talipuwan chu talakgaputsit tlakg talhuwima
«Ankgalhin klakgaputsa maski ni anan tuku xpalakata chuna nakmakgkatsi».
«Akxni klakpuwan pi lu tlan kinkitaxtunima, lu klakgaputsa. Kkatsi pi kaj lakapala natitaxtu kintapaxuwan chu naktsukupara lipuwan».
«Kliskuja xlakata kajwatiya naklilakgaputsa tuku xala chali chali, pero min kilhtamaku kintaʼakgstokgtawilani tuku xala akgtum papaʼ».
Wa uma tuku wankgo makgpitsi latamanin tiku lu lakgaputsakgo chu lu lipuwankgo. ¿Wix nachuna titaxtupat la umakgolh latamanin, o lakgapasa tiku chuna titaxtuma?
Komo chuna titaxtupat, ni miʼakstu chuna akgspulaman. Lhuwa latamanin kxlikalanka katiyatni kgalhikgo uma tajatat o lilipuwankgo xlakata chatum tiku xalak xfamiliajkan chuna titaxtuma.
Liwana tasiya pi lamaw kxakatuwa chu kxakalipekua kakilhtamaku, chu wa xlakata anan lhuwa tuku lilakgaputsayaw chu tuku kinkamakgapatinanan (2 Timoteo 3:1). Chuna la wan Organización Mundial de la Salud, lata kgalhtsayan latamanin chatum kgalhi tajatat xla talipuwan o xla talakgaputsit. Chu xlakata analh pandemia xla COVID-19, kkata 2020 taliwakalh 78 millones tiku kgalhikgo tajatat xla talipuwan chu nachuna taliwakalh tiku kgalhikgo atanu tajatat xla talakgaputsit.
Pero ni wa xlakaskinka nakatsiya la xlilhuwa latamanin kgalhikgo tajatat xla talipuwan. Wata tuku tlakg xlakaskinka wa pi nakatsiya tuku natlawaya wix chu mifamilia xlakata tlan namakgkatsiyatit.
¿Tuku kilhchanima tlan natawila kintalakapastaknikan?
Akxni chatum lataman tlan wi xtalakapastakni, tlan makgkatsi chu ni tuwa makgkatsi natlawa tuku xlitlawat chali chali. Tlan tatayani tuku tuwa titaxtu kxlatamat, makgantaxti xtaskujut chu lipaxuwa xlatamat.
¿Tuku kilhchanima pi nitlan tawila talakapastakni?
NI WAMPUTUN pi chatum lataman ni tliwakga.
AKGTUM TAJATAT nema tlawa pi chatum lataman lu nalakgaputsa, laktlawa xtalakapastakni, chu tuwa makgkatsi namalakgachokgo tuku makgkatsi chu tuku tlawa.
Ankgalhin laktlawa la katalalin amakgapitsin chu tuwa makgkatsi namakgantaxti tuku xlitlawat chali chali.
Kaxatikawa tiku tlan nachipa uma tajatat, maski tanu tanu xkatakan o kaxanikawa niku lamakgo.
Kaputsa tamakgtay
Min kilhtamaku chatum lataman tsuku talakgpali chuna la likatsi, chuna la wayan o chuna la lhtata. O max lhuwata kilhtamaku la lakgaputsa chu lu lipuwan. Komo chuna titaxtupat o komo chatum mintalilakgapasni chuna titaxtuma, max talakaskin naputsayatit chatum makuchina tiku tlan nakamakgtayayan.
Chixku tiku tlakg skgalala nema kilatamanitanchi kKatiyatni, Jesucristo, wa: «Latamanin tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina» (Mateo 9:12). Komo makuchinanin namakgtayakgoyan, max nialh lu katilipuwanti chu napaxuwaparaya. Komo makgkatsiya pi kgalhiya tajatat xla talipuwan o makgasata lu lakgaputsapat, talakaskin naputsaya xtamakgtay chatum makuchina.a
Biblia ni maktum libro nema lichuwinan likuchun, pero xtastakyaw nakinkamakgtayayan tlan natawila kintalakapastaknikan. Atanu artículos nalichuwinankgo la tlan nakinkamakgtayayan Biblia xlakata natayaniyaw umakgolh tajatat. Kkawaniyan pi kalikgalhtawakga umakgolh artículos.
a Revista Makatsinina ni lichuwinan tuku likuchun tlan namaklakaskinaw. Chatunu lataman liwana xlilaksakat tuku natlawa.