1 | Oración: “Kawili putum mintalakgaputsit kxmakan”
BIBLIA WAN: «Kawilitit putum mintalakgaputsitkan kxmakan xlakata xla kalilakgaputsayan» (1 PEDRO 5:7).
¿Tuku kilhchanima?
Jehová kinkawaniyan pi kalitachuwinaw kaxatukawa taʼakglhuwit o talakgaputsit nema kgalhiyaw (Salmo 55:22). Ni anan akgtum taʼakglhuwit nema lu lanka o nema lu aktsu nema nila nalitachuwinanaw Dios. Komo akinin lilakgaputsayaw, Jehová na lilakgaputsa. Oración wa tuku nakinkamakgtayayan nakgalhiyaw takaksni kkintalakapastaknikan (Filipenses 4:6, 7).
¿La kinkamakgtayayan oración?
Akxni nitlan wi kintalakapastaknikan, makgkatsiyaw pi kiʼakstukan wilaw xlakata amakgapitsin ni akgatekgskgo tuku titaxtumaw (Proverbios 14:10). Pero xlakata Dios kinkaʼakgatekgsniyan chu makgkatsi tuku titaxtumaw, tlan nawaniyaw putum tuku makgkatsiyaw. Jehová kinkaʼakxilhman, katsi tuku kinkamakgapatinanan, liwana katsi tuku titaxtumaw, wa xlakata lakaskin pi katlawaniw oración chu kalitachuwinaw putum tuku lilakgaputsayaw (2 Crónicas 6:29, 30).
Akxni tlawaniyaw oración Jehová, tlakg lipawanaw pi xla kinkamakgtakgalhputunan. Na tlan nalipawanaw chuna la chatum tiku tsokgwililh Biblia, tiku wanilh: «Wix akxilhnita kintapatin, kuenta tlawaya tuku lu klilakgaputsa» (Salmo 31:7). Akxni katsiyaw pi Jehová akxilha tuku titaxtuyaw, kinkamaxkiyan litliwakga xlakata natayaniyaw. Xla ni kajwatiya akxilha tuku titaxtumaw. Liwana akgatekgsa tuku titaxtumaw chu kinkamakgtayayan natekgsaw kBiblia tuku tlan nakinkamamakgkatsiniyan.