Kakamakgtayaw tiku kgalhikgo tajatat xla talipuwan o xla talakgaputsit

¿Tuku kilhchanima?

Akxni chatum kiʼamigojkan kgalhi akgtum tajatat xla talipuwan o xla talakgaputsit, max ni katsiyaw la namakgtayayaw. Pero tlan nalimasiyaniyaw pi paxkiyaw akxni namakgtayayaw natatayani xtajatat.

¿Tuku tlan nakalimakgtayayaw?

«Lakapala nakgaxpatatit» (SANTIAGO 1:19).

Pulaktum tuku tlan natlawaya xlakata namakgtayaya miʼamigo wa pi nakgaxpatniya akxni xla tachuwinamputunan. Ni kalakpuwanti pi talakaskin nakgalhtiya putum tuku waniyan. Tuku tlakg xlakaskinka wa pi xla nakatsi pi kgaxpatniputuna chu xlikana lilakgaputsaya. Kaliskujti naʼakgatekgsa tuku xlakata chuna makgkatsi chu ni lakapala kalakpuwani tuku nitlan. Kalakapastakti pi miʼamigo max nitlan tuku nawan nema alistalh nitlan katilimakgkatsilh (Job 6:2, 3).

«Kakawanitit tachuwin nema tlan nakalimamakgkatsiniyatit» (1 TESALONICENSES 5:14).

Max miʼamigo lu lakgaputsama xlakata makgkatsi pi nitu litaxtu. Wa xlakata kawani pi wix lu lilakgaputsaya. Komo chuna natlawaya, tlan namamagkatsiniya chu namakgoxomixiya maski ni lhuwa tuku nawaniya.

«Xaxlikana amigo putum kilhtamaku paxkinan» (PROVERBIOS 17:17).

Kakgalhskinti miʼamigo tuku tlan nalimakgtayaya chu kamakgtaya. Max miʼamigo ni liwana katsi la nawan tuku maklakaskin. Wa xlakata kawani tuku max tlan akxtum natlawayatit. Max tlan akxtum napinatit talakgchokgoyatit. Max na tlan napina tamawananiya, nakaxakaniya kxchik o atanu tuku nalimakgtayaya (Gálatas 6:2).

«Ni lakapala [kasitsitit]» (1 TESALONICENSES 5:14).

Max miʼamigo ni ankgalhin katitachuwinamputun. Pero kamalakapastaka pi wix nakgaxpatniya akxni nakgalhchuwinamputun. Xlakata xtajatat, max miʼamigo natlawa o nawan tuku nitlan katimamakgkatsinin, o kaj xalan nawaniyan pi nialh katitlawatit tuku xlakkaxwilinitantit o lakapala nasitsi. Akxni wi tuku natlawaya xpalakata miʼamigo, ni lakapala kasitsi chu kaʼakgatekgsni tuku makgkatsima (Proverbios 18:24).

Wix tlan namakgtayaya miʼamigo

«Lu kliskuja xlakata nakmakgtaya kiʼamiga. Xlikana pi nila ktilakkaxtlawanikgolh putum xtaʼakglhuwit, pero tlan kkgaxmatni akxni xla kgalhchuwinamputun. Min kilhtamaku kajwatiya uma maklakaskin xlakata tlan namakgkatsi» (Farrah,a xʼamiga kgalhi tajatat xla talipuwan, talakgaputsit chu akgtum tajatat nema wanikan trastorno alimentario).

«Kkgalhi chatum amiga tiku lu xapaxuwana chu lu tlan kilikatsini. Akgtum kilhtamaku, kiwanilh pi xakkalh kxchik chu xkinkaxtlawaninit lu kgama liwat. Xlakata lu tlan kimamakgkatsinilh kwanilh tuku xakmakgkatsi. ¡Lu kimakgpuwantinilh!» (Ha-eun, tiku kgalhi tajatat xla talipuwan).

«Lu xlakaskinka ni lakapala nasitsikan. Akxni kimpuskat tlawa tuku klisitsi, klakapastaka pi ni wa lin kuenta, wata chuna tlawa xlakata xtajatat. Uma kimakgtaya ni naksitsi chu tlan naklikatsini» (Jacob, xpuskat kgalhi tajatat xla talipuwan).

«Kimpuskat lu kimakgtayanit chu lu tlan kimamakgkatsininit. Akxni lu klipuwan, xla ni xafuerza kiwani pi kaktlawalh tuku ni ktlawaputun. ¡Kgoxota kimpuskat!, xlakata min kilhtamaku nila tlawa tuku xla tlawaputun. Lu tlan likatsi chu lhuwa tuku limakgxtakga kaj kimpalakata. ¡Lu lhuwa xtapalh kliʼakxilha!» (Enrico, tiku kgalhi tajatat xla talakgaputsit).