«Skgalalh katawilatit» xlakata xkilhtamaku Jehová lakatsu wi

1. ¿Tuku kilitlawatkan xlakata nalakgtaxtuyaw kxkilhtamaku Jehová?

AKXNI Biblia lichuwinan «xkilhtamaku Jehová» kilhchanima akxni Jehová nakamasputu xtalamakgasitsin chu nakalakgmaxtu xkachikin. Uma chuna lanit makgasa, akxni Jehová kamalakgaxokgelh makgapitsi kachikinin (Is. 13:1, 6; Ezeq. 13:5; Sof. 1:8). «Xkilhtamaku Jehová» nema nialh makgas namin nalitsuku akxni namasputukan xaLanka Babilonia chu nakikgalhsputa kʼArmagedón. Xlakata tlan nalakgtaxtuyaw kʼuma «kilhtamaku», talakaskin pi lata uku skgalalh natawilayaw. Jesús ni kajwatiya kinkawanin pi “skgalalh kilitawilatkan” xlakata namin «lhuwa tapatin», wata wa pi ankgalhin chuna kilitawilatkan (Luc. 12:40; Mat. 24:21).

2. ¿Tuku xlakata lu xlakaskinka nalakputsananiyaw 1 Tesalonicenses?

² Kxlimaktum tuku Pablo katsokgnanilh Tesalonicenses, maklakaskilh lhuwa liʼakxilhtit xlakata nakamakgtaya kstalaninanin Cristo skgalalh natawilakgo chu nakgalhkgalhikgo xkilhtamaku Jehová. Pablo xkatsi pi lhuwaku xtsankga xlakata xchalh ama kilhtamaku (2 Tes. 2:1-3). Maski chuna, kawanilh pi lu xlakaskinka skgalalh xtawilakgolh xtachuna la komo ama kilhtamaku lakatsu xwija. Akinin na tlan nastalaniyaw uma tastakyaw. Kaʼakxilhwi tuku wa Pablo xlakata 1) la namin xkilhtamaku Jehová, 2) tiku ni katilakgtaxtukgolh chu 3) tuku kilitlawatkan xlakata skgalalh natawilayaw.

¿LA NAMIN XKILHTAMAKU JEHOVÁ?

3. ¿Tuku xlakata Biblia wan pi xkilhtamaku Jehová namin xtachuna la chatum kgalhana? (Na kaʼakxilhti dibujo).

³ «Xtachuna la chatum kgalhana min katsisni» (1 Tes. 5:2). Pablo limaklakaskilh pulaktutu liʼakxilhtit xlakata nalichuwinan la namin xkilhtamaku Jehová, chu uma wa xapulana. Kgalhananin lakapala kgalhanankgo chu kkatsisni chuna tlawakgo, akxni niti kgalhkgalhima. Xtachuna la uma, xkilhtamaku Jehová lakapala namin chu akxni niti kgalhkgalhima nawan. Max asta xaxlikana kstalaninanin Cristo, kaks nalilakawanaw la xlilakapala nala putum uma. Pero akinin ni kintikamalakgsputukan; wa nakamalakgsputukan tiku lixkajni likatsikgo.

4. ¿Tuku xlakata Biblia wan pi xkilhtamaku Jehová xtachuna xtakatsanajwat chatum puskat tiku nakgalhi kskgata?

⁴ «Xtachuna la chatum puskat tiku nakgalhi kskgata kaj lakapala tsuku katsanajwan» (1 Tes. 5:3). Chatum puskat tiku ama kgalhi kskgata ni katsi tuku kilhtamaku nalakachin. Pero liwana katsi pi uma kilhtamaku nalakgchan chu kaj lakapala chuna nala, lu nakatsajwanan chu nila katimalakgachokgolh. Xtachuna la uma, maski ni katsiyaw tuku kilhtamaku chu tuku hora namin xkilhtamaku Jehová, liwana katsiyaw pi namin. Katsiyaw pi kaj lakapala nakamalakgaxokge tiku lixkajni likatsikgo chu ni katitsalakgolh.

5. ¿Tuku xlakata Biblia wan pi akxni lama nawan lhuwa tapatin xtachuna nawan la akxni amaja xkgakga?

⁵ Xtachuna la akxni xkgakgamaja. Pablo lichuwinan xliʼakgtutu li’akxilhtit chu kalichuwinampara kgalhananin tiku kgalhanankgo katsisni, pero tamalakxtumi xkilhtamaku Jehová xtachuna la akxni amaja xkgakga (1 Tes. 5:4). Max kgalhananin kajwatiya kuenta tlawakgonit tuku kgalhamakgo chu nipara akxilhkgo pi tsukumaja xkgakga chu pi xkgakganat nakamakgesiya. Nachuna nala akxni natsuku lhuwa tapatin. Natasiya tuku nitlan tlawamakgo latamanin tiku kxakapukswa wilakgo chuna la kgalhananin chu tlawamakgo tuku Dios ni lakgati. Akinin nichuna likatsiyaw la xlakan, wata limasiyayaw pi skgalalh wilaw chu kgalhkgalhimaw xkilhtamaku Jehová. ¿La tlawayaw? Akxni lakgmakganaw tayat nema Jehová xkajni chu lu liskujaw xlakata “xaʼakgstitum nalitaxtuyaw chu lakatitum nalatamayaw” (Efes. 5:8-12). Pablo maklakaskimpara atanu akgtiy liʼakxilhtit xlakata nalichuwinan tiku ni katilakgtaxtukgolh kxkilhtamaku Jehová.

¿TIKU NI KATILAKGTAXTUKGOLH?

6. ¿Tuku kilhchanima pi lhuwa latamanin lhtatamakgo? (1 Tesalonicenses 5:6, 7).

⁶ «Tiku lhtatakgo» (kalikgalhtawakga 1 Tesalonicenses 5:6, 7). Pablo lichuwinalh pi tiku ni xʼamakgo lakgtaxtukgo kxkilhtamaku Jehová xtachuna la tiku lhtatakgonit. Akxni chatum lataman lhtatanit, ni katsi tuku lama chu la titaxtuma kilhtamaku. Ni katsi komo wi tuku lu xlakaskinka lama chu wi tuku xlitlawat. Wa uma tuku kaʼakgspula lhuwa latamanin: xtachuna pi lhtatakgonit (Rom. 11:8). Ni kuenta tlawakgo tuku limasiya pi lamaw «kxaʼawatiya kilhtamaku» chu pi lakatsu wi lhuwa tapatin. Akxni wi tuku la kxlikalanka katiyatni, wilakgo tiku tsinu kanajlakgo chu katsiputunkgo xtamakatsinin Dios. Pero uma ni makgapala chu nialh kuenta tlawaparakgo. Chu asta wilakgo tiku kanajlakgo pi namin lisputni, pero lakpuwankgo pi lhuwaku kilhtamaku tsankga (2 Ped. 3:3, 4). Akinin katsiyaw pi chuna la titaxtu kilhtamaku tlakg skgalalh kilitawilatkan.

7. ¿Tuku kilhchanima pi latamanin tiku Dios nakamasputu xtachuna la tiku kgachikgo?

⁷ «Tiku kgachikgo». Apóstol Pablo katamalakxtumilh latamanin tiku Dios nakamasputu chuna la tiku kgachikgo. Tiku kgachi ni liwana lakapastaknan chu nitlan tuku laksaka. Xtachuna la uma, tiku lixkajni likatsikgo ni kuenta tlawakgo xtamakatsinin Dios chu laksakkgo na’ankgo ktiji nema linan kpulakgsputni. Pero apóstol Pablo kinkawaniyan pi kakgalhiw tlan talakapastakni chu ni kalitaxtuw la tiku kgachikgo (1 Tes. 5:6). Chatum tiku lakputsanani Biblia wan pi kgalhikan tlan talakapastakni kilhchanima «ni lakapala tuku natlawayaw chu liwana nalilakpuwanaw, nema kinkamakgtayayan nalaksakaw tuku tlan». Pero ¿tuku xlakata talakaskin ni lakapala tuku natlawayaw chu liwana nalilakpuwanaw? Xlakata komo ni kuenta natlawayaw, kaj lakapala namakgtanuyaw tuku xalak kakilhtamaku. Nachuna, akxni tlakg talakatsuwima nawan xkilhtamaku Jehová, tlakg tuwa nakinkakitaxtuniyan ni namakgtanuyaw kkakilhtamaku. Pero ni lu kalilakgaputsaw, xlakata xʼespíritu Dios nakinkamakgtayayan ni lakapala tuku natlawayaw chu nalaksakaw tuku tlan (Luc. 12:11, 12).

¿TUKU KILITLAWATKAN XLAKATA SKGALALH NATAWILAYAW?

8. Chuna la wan 1 Tesalonicenses 5:8, ¿tuku talakaskin xlakata skgalalh natawilayaw chu chuntiya nakgalhiyaw tlan talakapastakni? (Na kaʼakxilhti dibujo).

⁸ «Kalitakuxmumakgtayaw takanajla […] chu kalilakpuwaw lakgtaxtut». Pablo kinkatamalakxtumin chuna la soldados tiku skgalalh wilakgo chu wilikgonit tuku nalitamakgtayakgo (kalikgalhtawakga 1 Tesalonicenses 5:8). Akxni anan guerra, chatum soldado ankgalhin skgalalh xlitawilat xlakata tlan natalatlawanan. Nachuna la kimpalakatakan. Limasiyayaw pi skgalalh wilaw chu kgalhkgalhimaw xkilhtamaku Jehová komo nalitakuxmumakgtayayaw takanajla chu tapaxkit, chu nalilakpuwanaw lakgtaxtut nema xtachuna la akgtum takgnu xalikan. Umakgolh tayat lu nakinkamakgtayayan.

9. ¿La kinkamakgtayayan takanajla?

⁹ Xtachuna la tuku xlitakuxmumakgtayakgo soldados xkuentajtlawa xnakujkan, takanajla chu tapaxkit kuentajtlawa tuku makgkatsiyaw chu tuku lakpuwanaw. Umakgolh tayat kinkamakgtayayan chuntiya naskujnaniyaw Jehová chu nastalaniyaw Jesús. Takanajla kinkamakgtayayan nalipawanaw pi Jehová nakasikulunatlawa tiku xatapaxuwan tlawakgo xtalakaskin (Heb. 11:6). Nachuna, kinkamakgpuwantiniyan ni namakgxtakgaw kimPulalinakan, Jesús, maski tuwa tuku natitaxtuyaw. Xlakata namatliwakglhaw kintakanajlakan chu natayaniyaw tuku tuwa, kalilakpuwaw tuku tlawakgo natalan xlakata ni namakgxtakgkgo Jehová maski kaputsastalanimaka o ni kgalhikgo tumin. Chu xlakata ni lhuwa tuku nakgalhiputunaw, kastalaniw xliʼakxilhtitkan tiku ni lhuwa tuku kgalhikgo chu pulana wilikgo xTamapakgsin Dios kxlatamatkan.b

10. ¿La kinkamakgtayayan tapaxkit nema kgalhiniyaw Dios chu tapaxkit nema kakgalhiniyaw latamanin?

¹⁰ Xlakata skgalalh natawilayaw chu nakgalhiyaw tlan talakapastakni, na talakaskin nakgalhiyaw tapaxkit (Mat. 22:37-39). Akgtum liʼakxilhtit, tapaxkit nema kgalhiniyaw Dios kinkamakgtayayan chuntiya nalichuwinanaw xtachuwin maski natitaxtuyaw tuku tuwa (2 Tim. 1:7, 8). Chu xlakata kapaxkiyaw latamanin tiku tanu takanajla kgalhikgo, lu liskujaw xlakata nakalitachuwinanaw xatlan tamakatsinin, chu asta maklakaskinaw teléfono chu carta. Ni lakpuwanaw pi nila katitalakgpalikgolh, wata kgalhkgalhiyaw pi katalakgpalikgolh chu katsukukgolh tlawakgo tuku tlan (Ezeq. 18:27, 28).

11. ¿La kinkamakgtayayan tapaxkit nema kakgalhiniyaw kinatalankan? (1 Tesalonicenses 5:11).

¹¹ Na kapaxkiyaw kinatalankan, chu limasiyayaw akxni lamatliwakglhaw chu lamakgtayayaw (kalikgalhtawakga 1 Tesalonicenses 5:11). Soldados tiku akxtum talatlawanankgo kʼakgtum guerra lamakgtayakgo. Pero akxni talatlawanamakgo, max kaj xalan latlawanikgo tuku nitlan maski nichuna xtlawaputunkgo. Xtachuna la uma, akinin nikxni katlawaniputunaw tuku nitlan kinatalankan chu ni katamakgapuspitniputunaw (1 Tes. 5:13, 15). Atanu la nalimasiyayaw pi kapaxkiyaw kinatalankan wa pi nakamaxkiyaw kakni tiku pulalinkgo congregación (1 Tes. 5:12). Kalilakpuwaw congregación xalak Tesalónica. Akxni Pablo kamalakgachanilh akgtum tatsokgni, nina xchan akgtum kata lata xlakatsukunit uma congregación. Max lakgkgolotsin aku xkatsinimakgo natlawakgo xtaskujutkan chu wi tuku nitlan xkakitaxtuni, pero xtalakaskin xkamaxkika kakni. Chuna la talakatsuwima nawan lhuwa tapatin, tlakg natalakaskin pi nakalipawanaw lakgkgolotsin xalak congregación, xlakata max nialhla kintikatachuwinankan lata niku pulalinkan kintaskujutkan o ksucursales xlakata nakinkawanikanan tuku kilitlawatkan. Wa xlakata, la uku lu xlakaskinka pi nakapaxkiyaw chu nakamaxkiyaw kakni lakgkgolotsin xalak congregación. Maski kalalh tuku nala, kakgalhiw tlan talakapastakni chu ni wa kuenta katlawaw tuku nitlan tlawakgo. Wata kalilakpuwaw pi Jehová maklakaskima Cristo xlakata nakapulalin umakgolh lakchixkuwin tiku ni makgxtakgnankgo.

12. ¿La makgtaya takgalhkgalhin kintalakapastaknikan?

¹² Xtachuna la takgnu xalikan xmakgtaya xʼakgxakga soldado, takgalhkgalhin kuentajtlawa kintalakapastaknikan. Takgalhkgalhin nema Jehová kinkamaxkiyan kinkamakgtayayan naʼakxilhaw pi tuku malaknu uma kakilhtamaku nitu kxtapalh (Filip. 3:8). Takgalhkgalhin na kinkamakgtayayan ni lu nalakgaputsa kinakujkan. Wa uma tuku kaʼakgspulalh Wallace chu Laurinda, tiku makgtayanamakgo kʼÁfrica. Kaj akgtutu semanas titaxtulh, xchatiykan makgatsankgakgolh tiku lu xkapaxkikgo. Chatum nilh xtlat, chu achatum nilh xtse. Chu nila taspitkgolh kxpaiskan xlakata nakatatawilakgo xfamiliajkan xlakata xʼanan pandemia xla COVID-19. Wallace wan: «Takgalhkgalhin xla talakastakwanat lu kimakgtaya. Ni klilakpuwan tuku makgkatsikgolh xaʼawatiya kilhtamaku nema latamakgolh kʼuma kakilhtamaku, wata klilakpuwan la namakgkatsikgo akxni nakamalakastakwanikan kxasasti kakilhtamaku. Uma takgalhkgalhin kimakgtaya ni lu naklakgaputsa chu ni lu naklipuwan».

13. ¿Tuku tlan natlawayaw xlakata Jehová nakinkamaxkiyan x’espíritu santo?

¹³ «Ni kamamixitit xlhkuyat espíritu» (1 Tes. 5:19). Pablo tamalakxtumilh espíritu santo xtachuna la akgtum lhkuyat. Uma espíritu kinkamakgtayayan lu natlawaputunaw tuku tlan chu kinkamaxkiyan litliwakga xlakata naskujnaniyaw Jehová (Rom. 12:11). ¿Tuku tlan natlawayaw xlakata Jehová nakinkamaxkiyan espíritu santo? Talakaskin naskiniyaw, nalikgalhtawakgayaw xTachuwin chu ni natamakgatliniyaw xkachikin. Komo chuna natlawayaw, nakgalhiyaw xalaktlan tayat (Gál. 5:22, 23).

14. ¿Tuku ni kilitlawatkan komo chuntiya makglhtinamputunaw xʼespíritu Dios? (Na kaʼakxilhti dibujo).

¹⁴ Jehová kinkamaxkiyan xʼespíritu, pero kuenta kilitlawatkan xlakata ni natlawayaw tuku namamixi «xlhkuyat espíritu». Xlakata Jehová nakinkamaxkiyan xʼespíritu, talakaskin pi kintayatkan chu kintalakapastaknikan xaskulunku nawan. Komo namastayaw talakaskin pi nixatlan talakapastakni natanu kkinakujkan chu natlawayaw tuku nitlan, namakgatsankgayaw xʼespíritu (1 Tes. 4:7, 8). ¿Tuku atanu kuenta kilitlawatkan? Pablo wa: «Ni kalakgmakgantit tuku Dios makatsininan» (1 Tes. 5:20). Uma versículo kilhchanima tamakatsinin nema masta Dios akxni maklakaskin xʼespíritu. Makgapitsi wa xlakata xkilhtamaku Jehová chu la xlilakatsu wi. Akinin ni lakpuwanaw pi lu lhuwaku tsankga namin xkilhtamaku Jehová o pi ni katiʼakxilhwi Armagedón. Wata ankgalhin lilakpuwanaw pi xkilhtamaku Jehová lu lakatsu wi. Wa xlakata lu kuenta tlawayaw kintayatkan chu chali chali tlawayaw tuku limasiya pi tamakamastaninitaw (2 Ped. 3:11, 12).

«PUTUM KALAKPUTSANANITIT»

15. ¿Tuku kilitlawatkan xlakata niti nakinkaʼakgskgawiyan? (1 Tesalonicenses 5:21).

¹⁵ Nialh makgas xtalamakgasitsin Dios nawankgo: «¡Uku kgalhiyaw takaksni kkilatamatkan chu nitu kinkamakgapekuanan!» (1 Tes. 5:3). Demonios namalakgatumikgo tamakatsinin kxlikalanka katiyatni nema nakaʼakgskgawikgo lhuwa latamanin (Apoc. 16:13, 14). ¿Chu akinin? ¿Namastayaw talakaskin pi nakinkaʼakgskgawikanan? Nichuna kintikaʼakgspulan komo nastalaniyaw uma tastakyaw: «Putum kalakputsananitit» (kalikgalhtawakga 1 Tesalonicenses 5:21). Tachuwin xagriego nema matitaxtikan «kalakputsananitit» xmalakpuwaninan tuku xtlawakgo latamanin xlakata nakatsikgo komo akgtum likan xatlan xwanit. Akinin nachuna kilitlawatkan xlakata nakatsiyaw komo tuku kgaxmatmaw o tuku likgalhtawakgamaw xaxlikana o ni. Lu xlakaskinka xwanit pi tesalonicenses xtlawakgolh uma. Pero tlakg xlakaskinka pi akinin chuna natlawayaw xlakata tlakg lakatsu wi lhuwa tapatin. Ni kakanajlaw putum tuku kinkawanikanan, kamaklakaskiw kintalakapastaknikan xlakata natamalakxtumiyaw tuku likgalhtawakgayaw o tuku kgaxmataw chu tuku wan Biblia chu xkachikin Jehová. Komo chuna natlawayaw, niti kintikaʼakgskgawin (Prov. 14:15; 1 Tim. 4:1).

16. ¿Tuku takgalhkgalhin kgalhiyaw, chu tuku kilitlawatkan la uku?

¹⁶ Xkachikin Jehová nalakgtaxtu akxni lama nawan lhuwa tapatin, pero ni katsiyaw tuku nakinkaʼakgspulayan chatunu akinin chali tuxama (Sant. 4:14). Komo lamawku nawan akxni natsuku lhuwa tapatin o ni, Jehová nakinkamaxkiyan latamat nema nikxni sputa komo ni namakgxtakgaw. Tiku xatalaksakni natatawilakgo Cristo kʼakgapun, chu amakgapitsi borregos nalatamakgo kparaíso unu kKatiyatni. Xlakata nina chin uma kilhtamaku chuntiya kalilakpuwaw kintakgalhkgalhinkan, ankgalhin skgalalh katawilaw chu kakgalhkgalhiw xkilhtamaku Jehová.