¿Kgalhiya tayat nema namakgtayayan akxni lama nawan lhuwa tapatin?

1. ¿Tuku xlakata lu xlakaskinka nakatsiyaw tuku natlawayaw akxni nina chin tuku masputunan?

KOMO liwana katsiyaw tuku natlawayaw akxni wi tuku nitlan nala, nalakgmaxtuyaw kilatamatkan. Akgtum liʼakxilhtit, akxni min tuku masputunan, latamanin tiku katsikgoya tuku natlawakgo tlan nalakgmaxtukgo xlatamatkan chu tlan nakamakgtayakgo amakgapitsin. Uma xtachuna tuku wa akgtum organización xalak Europa nema kamakgtaya latamanin: «Komo liwana katsiya tuku natlawaya akxni nalakgchinan tuku nitlan, tlan nalakgmaxtuya milatamat».

2. ¿Tuku xlakata kilikatsitkan tuku natlawayaw akxni nachin lhuwa tapatin? (Mateo 24:44).

² «Lhuwa tapatin» kaj xalan natsuku (Mat. 24:21). Pero akxni nachin, ni putum latamanin kaks katililakawankgolh. Liwakaya 2,000 kata, Jesús kawanilh kstalaninanin pi skgalalh xtawilakgolh xlakata xkatsikgolh tuku xtlawakgolh akxni xchilh uma kilhtamaku (kalikgalhtawakga Mateo 24:44). Komo nastalaniyaw uma tastakyaw, tlan nalakgtaxtuyaw kʼuma lu xatuwa kilhtamaku chu na tlan nakamakgtayayaw amakgapitsin latamanin nalakgtaxtukgo (Luc. 21:36).

3. ¿Tuku xlakata xlakaskinka natayaniyaw, nalakgalhamaninanaw chu napaxkinanaw xlakata nalakgtaxtuyaw akxni lama nawan lhuwa tapatin?

³ Xlakata nakatsiyaw tuku natlawayaw akxni lama nawan lhuwa tapatin, talakaskin nakgalhiyaw pulaktutu tayat. Kalilakpuwaw: ¿tuku natlawayaw komo nakinkawanikanan pi nakawaniyaw latamanin tuku nitlan nakaʼakgspula chu xlakan nakinkatalatlawakgoyan? (Apoc. 16:21). Uma kilhtamaku natalakaskin natayaniyaw xlakata uma nakinkamakgtayayan nakgalhakgaxmataw Jehová chu nalipawanaw pi xla nakinkakuentajtlawayan. Chu ¿tuku natlawayaw komo kinatalankan namakgatsankgakgo tuku kgalhikgo? (Hab. 3:17, 18). Natalakaskin nalakgalhamaninanaw xlakata uma natlawa pi nakamakgtayayaw chu nakamaxkiyaw tuku namaklakaskinkgo kinatalankan. Chu ¿tuku natlawayaw akxni nakinkatalatlawakgoyan lhuwa kachikinin o komo natalakaskin akxtum nakatatawilayaw kinatalankan kʼakgtum aktsu chiki? (Ezeq. 38:10-12). Natalakaskin nakakgalhiniyaw lanka tapaxkit.

4. ¿Tuku textos xalak Biblia limasiya pi talakaskin tlakg natayaniyaw, nalakgalhamaninanaw chu napaxkinanaw?

⁴ Xtachuwin Dios kinkamakgpuwantiniyan tlakg natayaniyaw, tlakg nalakgalhamaninanaw chu tlakg napaxkinanaw. Lucas 21:19 wan: «Xlakata natayaniyatit asta kxlisputni, namakglhtinanatit milatamatkan». Colosenses 3:12 kinkawaniyan: «Kakgalhitit talakgalhaman chu tapaxkit». Chu 1 Tesalonicenses 4:9, 10 na kinkawaniyan: «Dios kamasiyaninitan nalapaxkiyatit chatunu chatunu. […] Pero kkastakyawayan natalan, pi chuntiya tlakg katlawatit uma». Umakgolh tachuwin xkawanimaka tiku xlimasiyamakgolha pi xtayanikgo, xlakgalhamaninankgo chu xpaxkinankgo. Pero xtalakaskin pi chuntiya xliskujkgolh tlakg nakgalhikgo umakgolh tayat. Chu na wa tuku kilitlawatkan akinin. ¿Tuku nakinkamakgtayayan chuna natlawayaw? Kʼuma artículo naʼakxilhaw tuku tlawakgolh xapulana kstalaninanin Cristo xlakata xkgalhikgolh umakgolh tayat chu la tlan nastalaniyaw xliʼakxilhtitkan, chu chuna nakatsiyaw tuku natlawayaw akxni lama nawan lhuwa tapatin.

KALISKUJTI TLAKG NATAYANIYA

5. ¿Tuku tlawakgolh xapulana kstalaninanin Cristo xlakata xtayanikgolh?

⁵ Xapulana kstalaninanin Cristo xtalakaskin xtayanikgolh (Heb. 10:36). Chuna la amakgapitsin latamanin, xlakan na xtitaxtukgo tuku nitlan, pero xtitaxtukgo atanu tuku tlakg tuwa xlakata xtakanajlakan. Xpulalinanin takanajla chu mapakgsinanin xalak Roma xkaputsastalanikgo, chu xmin kilhtamaku asta xfamiliajkan xkaputsastalanikgo (Mat. 10:21). Chu xtalakaskin pi kuenta xtlawakgolh xlakata apóstatas ni xkaʼakgskgawikgolh chu ni xkamapapitsikgolh (Hech. 20:29, 30). Maski titaxtukgolh putum uma, xlakan tayanikgolh (Apoc. 2:3). ¿Tuku kamakgtayalh? Lilakpuwankgolh liʼakxilhtit nema talichuwinan kTatsokgni xaʼHebreo, chuna la xliʼakxilhtit Job (Sant. 5:10, 11). Tlawanikgolh oración Jehová xlakata kskinikgolh litliwakga (Hech. 4:29-31). Chu lilakpuwankgolh tuku xʼamakgo makglhtinankgo komo xtayanikgolh (Hech. 5:41).

6. ¿Tuku kinkamasiyaniyan xliʼakxilhtit Merita?

⁶ Akinin na tlan natayaniyaw komo kgalhiyaw talismanin nalilakpuwanaw xliʼakxilhtitkan xlakskujnin Dios tiku tayanikgolh nema kalichuwinankan kBiblia chu kkilikgalhtawakgakan. Wa uma tuku makgtayalh chatum tala xalak Albania tiku wanikan Merita xlakata tlan chuntiya xtayanilh maski xfamilia lu nitlan xlikatsini xlakata xtakanajla. Xla wan: «Xliʼakxilhtit Job lakgchalh kinaku. Uma chixku lu patinalh…, chu xla ni xkatsi tiku xmapatinima. Maski chuna, ni makgxtakgli Dios. Anta kJob 27:5, xla wa: “¡Asta maski nakni, nikxni ktimakgatsankgananilh Dios!”. Uma kimakgtayalh naklilakpuwan pi kintaʼakglhuwit ni lu laklanka xwankgonit nixawa xtaʼakglhuwit Job chu pi akit liwana kkatsi tiku lin kuenta».

7. Maski la uku nitu titaxtupat tuku lu tuwa, ¿tuku talakaskin nalismaniya natlawaya?

⁷ Atanu tuku nakinkamakgtayayan tlakg natayaniyaw wa pi ankgalhin nawaniyaw Jehová tuku makgkatsiyaw (Filip. 4:6; 1 Tes. 5:17). Max la uku ni titaxtupat tuku lu tuwa. Pero ¿tuku tlawaya akxni wi tuku lu lisitsiya, wi tuku lilakgaputsaya o ni katsiya tuku natlawaya? ¿Putsaya xtapulalit Jehová? Komo lismaniya naskiniya tamakgtay Jehová chali chali, ni tuwa katimakgkatsi nalipawana akxni natitaxtuya tuku tlakg tuwa. Nalipawana pi xla tlan namakgtayayan putum kilhtamaku (Sal. 27:1, 3).

8. ¿La kinkamasiyaniyan xliʼakxilhtit Myra pi komo natayaniyaw la uku nakinkamakgtayayan natayaniyaw tuku namin alistalh? (Santiago 1:2-4; na kaʼakxilhti dibujo).

⁸ Tlan natayaniyaw tuku tuwa natitaxtuyaw akxni lama nawan lhuwa tapatin komo tayaniyaw tuku tuwa titaxtuyaw la uku (Rom. 5:3). ¿Tuku xlakata chuna wanaw? Lhuwa natalan wankgo pi akxni titaxtukgo tuku tuwa chu tayanikgo, kamakgtaya natayanikgo tuku tlakg tuwa titaxtukgo alistalh. Akxni Jehová kamakgtaya natayanikgo tuku tuwa, tlakg kanajlakgo pi xla xlikana kamakgtayaputun. Chu uma takanajla, kamatliwakglha xlakata natayanikgo tuku nakalakgmin alistalh (kalikgalhtawakga Santiago 1:2-4). Wa uma tuku akxilhli chatum precursora xalak Albania tiku wanikan Myra. Uma tala lakpuwan pi lu lhuwa xtaʼakglhuwit nixawa xtaʼakglhuwitkan amakgapitsin. Akxni chuna makgkatsi, lilakpuwan la makgtayanit Jehová umakgolh 20 kata chu xʼakstu wanikan: «Ni kamakgxtakgti Jehová. Lhuwata kata skujnaninita, tayaninita tuku tuwa xlakata xla makgtayanitan. Ni kamakgxtakgti la uku». Wix na tlan nalilakpuwana putum tuku Jehová tlawanit xlakata namakgtayayan natayaniya. Liwana kakatsi pi akxni wix tayaniya, xla akxilhan chu nasikulunatlawayan (Mat. 5:10-12). Komo chuna natlawaya, akxni lama nawan lhuwa tapatin, wix katsininitata nawan la tayanikan chu liwana lakkaxwilinita nawan chuntiya natayaniya.

KALAKGALHAMANINANTI

9. ¿La limasiyakgolh talakgalhaman natalan xalak Antioquía de Siria?

⁹ Kalilakpuwaw tuku lalh akxni kstalaninanin Cristo xalak Judea titaxtukgolh akgtum lanka tatsinkstat. Natalan xalak Antioquía de Siria lu kalakgalhamankgolh akxni katsikgolh tuku xtitaxtumakgo. Pero ni kajwatiya wi tuku makgkatsikgolh, wata wi tuku tlawakgolh: «Lakpuwankgolh nakamalakgachanikgo tamakgtay natalan xalak Judea, xchatunukan makgtayanankgolh chuna la xmatlanikgo» (Hech. 11:27-30). Maski natalan tiku xtitaxtumakgo tuku lu tuwa lu lakgamakgat xwilakgo, natalan xalak Antioquía liwana lakpuwankgolh nakamakgtayakgo (1 Juan 3:17, 18).

10. ¿La tlan nalimasiyayaw pi lakgalhamaninanaw akxni kinatalankan titaxtukgo tuku lu tuwa? (Na kaʼakxilhti dibujo).

¹⁰ Akinin na tlan nalimasiyayaw pi lakgalhamaninanaw akxni kinatalankan titaxtumakgo tuku lu tuwa. Tlan lakapala tuku natlawayaw: max tlan nakawaniyaw lakgkgolotsin pi makgtayanamputunaw, tlan namastayaw kintuminkan kʼobra mundial chu natlawayaw oración xpalakatakan tiku patinamakgo (Prov. 17:17).b Kalilakpuwaw tuku lalh kkata 2020. Uma kata lakkaxwilika 950 Comités de Socorro kxlikalanka katiyatni xlakata xkamakgtayaka natalan tiku xtitaxtumakgo tuku tuwa xpalakata pandemia xla COVID-19. Lu kapaxtikatsiniyaw putum natalan tiku makgtayanankgo kʼuma taskujut. Xlakata lu kalakgalhamankgo xnatalankan kalinikgolh tuku xmaklakaskinkgo, kamatliwakglhnikgolh xtakanajlakan, chu milh kilhtamaku, makgtayanankgolh xlakata xkakaxtlawanika xchikkan chu niku xtamakxtumikgo (katamalakxtupi 2 Corintios 8:1-4).

11. ¿La maxkiyaw kakni kinTlatkan xalak akgapun akxni limasiyayaw talakgalhaman?

¹¹ Amakgapitsin latamanin na akxilhkgo akxni akinin limasiyayaw talakgalhaman akxni la tuku nitlan. Kalichuwinaw akgtum liʼakxilhtit. Kkata 2019, huracán Dorian malakgsputulh Pukgalhtawakga anta kBahamas. Akxni xkaxtlawamaka Pukgalhtawakga, natalan kgalhskinkgolh chatum tiku kaxtlawa chiki la xlilhuwa tumin xʼama kamataji xlakata xtaskujut. Chixku kawanilh: «Wi tuku ktlawaputun mimpalakatakan. Kkamaxkiputunan liskujni, ni ktikamatajin xlakata taskujut chu nipara tuku nakmaklakaskin. Lu kaks klilakawan akxni kakxilha la kalikatsiniyatit miʼamigoskan». Lhuwa latamanin ni lakgapaskgo Jehová, pero lhuwa akxilhkgo tuku tlawayaw akinin xtatayananin. Lu tlan limakgkatsiyaw pi talakgalhaman nema limasiyayaw tlan kamakgpuwantini amakgapitsin latamanin nalakgapaskgo Dios, «tiku lu lakgalhamanan» (Efes. 2:4).

12. Komo nalimasiyayaw talakgalhaman la uku, ¿la nakinkamakgtayayan uma akxni lama nawan lhuwa tapatin? (Apocalipsis 13:16, 17).

¹² ¿Tuku xlakata natalakaskin nalimasiyayaw talakgalhaman akxni lama nawan lhuwa tapatin? Xlakata Biblia kinkawaniyan pi tiku ni katatayayaw mapakgsinanin nakgalhiyaw taʼakglhuwit la uku chu akxni lama nawan lhuwa tapatin (kalikgalhtawakga Apocalipsis 13:16, 17). Max kinatalankan namaklakaskinkgo nakamakgtayayaw xlakata nakgalhikgo tuku namaklakaskinkgo. Lakaskinaw pi akxni namin kiMapakgsinakan, Jesucristo, naʼakxilha pi limasiyamaw talakgalhaman chu nakinkawaniyan: «Kamakglhtinantit Tamapakgsin» (Mat. 25:34-40).

TLAKG KAKAPAXKI NATALAN

13. ¿Tuku tlawakgolh kstalaninanin Cristo xlakata tlakg xlapaxkikgolh? (Romanos 15:7).

¹³ Kxapulana siglo, putum latamanin xkatsikgo pi kstalaninanin Cristo xlapaxkikgo. Pero ¿xkilhchanima uma pi ni tuwa xmakgkatsikgo nalalimasiyanikgo tapaxkit? Kalilakpuwaw congregación xalak Roma, niku xmakgtapakgsikgo natalan xalak lakalhuwa kachikinin. Makgapitsi judíos xwankgonit, tiku xkalimakgastakkanit xLimapakgsin Moisés. Pero na xwilakgo natalan xalak amakgapitsin kachikinin, tiku tanu tanu talismanin xkgalhikgo. Makgapitsin max skujnin xwankgonit, chu amakgapitsin xmalananin skujni xwankgonit. ¿Tuku xʼama kamakgtaya xlakata uma ni xkamapapitsilh chu tlakg xlapaxkikgolh? Apóstol Pablo kamaxkilh uma tastakyaw: «Xatapaxuwan kalamakgamakglhtinantit» (kalikgalhtawakga Romanos 15:7). ¿Tuku xwamputun? Tachuwin nema unu matitaxtikan «xatapaxuwan kalamakgamakglhtinantit» xkilhchanima wi tiku tlan makgamakglhtinankan kchiki chuna la chatum tlan amigo. Akgtum liʼakxilhtit, Pablo wanilh Filemón la xlimakgamakglhtinat xwanit kskujni, tiku xwanikan Onésimo chu xtsalataxtunit kxchik. Wanilh: «Xatapaxuwan kamakgamakglhtinanti» (Filem. 17). Priscila chu Áquila tlakg lhuwa tuku xkatsikgo xlakata xasasti tamasiy nixawa Apolos, pero xatapaxuwan makgamakglhtinankgolh (Hech. 18:26). Maski umakgolh natalan tanu tanu tuku xtitaxtukgonit, ni mastakgolh talakaskin pi uma xkamapapitsilh, wata xatapaxuwan lamakgamakglhtinankgolh.

14. ¿La limasiyakgolh tapaxkit Anna chu xchixku?

¹⁴ Akinin na tlan nalimasiyayaw kintapaxkitkan komo xatapaxuwan nakamakgamakglhtinanaw natalan chu kiʼamigoskan nakalimaxtuyaw. Komo chuna natlawayaw, xlakan na nakinkalimasiyanikgoyan talakgalhaman (2 Cor. 6:11-13). Kalichuwinaw tuku titaxtukgolh Anna chu xchixku, tiku misioneros xwankgonit kʼÁfrica Occidental. Akxni nina makgas xkamalakgachakanit kʼatanu país xalak África, tsukulh pandemia xla COVID-19, chu nialhla xkatatamakxtumikgo natalan xalak congregación. ¿Tuku tlawakgolh Anna chu xchixku xlakata xlimasiyakgolh xtapaxkitkan? Katachuwinankgolh natalan kvideollamada xlakata xkawanikgolh pi tlakg xkalakgapasputunkgo. Natalan lu tlan limakgkatsikgolh, chu na tsukukgolh katachuwinankgo kteléfono chu xkamalakgachanikgo mensajes. ¿Tuku xlakata umakgolh misioneros lu liskujkgolh xlakata xkalakgapaskgolh natalan? Anna kinkawaniyan: «Lu klakapastaka tapaxkit nema kinatalankan kinkalimasiyanikgon akit chu kifamilia akxni xaktitaxtumaw tuku tuwa. Akxni klilakpuwan uma kimakgpuwantini naklimasiya tapaxkit».

15. ¿Tuku tlan natlawayaw xlakata tlakg nakapaxkiyaw natalan chuna la tlawalh Vanessa? (Na kaʼakxilhti dibujo).

¹⁵ Klhuwa congregaciones wilakgolh natalan tiku tanu tanu likatsikgo chu tanu tanu xkachikinkan. ¿Tuku nakinkamakgtayayan tlakg nakapaxkiyaw? Nalilakpuwanaw xatlan xtayatkan. Chatum tala tiku wanikan Vanessa chu lama kNueva Zelanda, tuwa xmakgkatsi nakatalalin natalan xlakata ni xlakgati la xlikatsikgo. Pero ni katamakgatlinilh, wata tlakg limaxtulh kilhtamaku akxtum nakatatawila. Xlakata chuna tlawalh, akxilhli tuku xlakata Jehová kapaxki umakgolh natalan. Xla wan: «Xlakata kinchixku lakgayawaka taskujut chuna la superintendente de circuito, tlakg lhuwa natalan tiku kkalakgapasaw, chu chatunu xlakan kgalhikgo xtayatkan. Pero la uku tlakg ni tuwa kmakgkatsi nakkatalalin amakgapitsin. Klakgati pi kxkachikin Jehová anan tanu tanu latamanin. Chu liwana tasiya pi Jehová na lu lakgati, xlakata xla wa tiku kaliminit umakgolh natalan kxkachikin». Wa xlakata, ¿la nalimasiyayaw pi kapaxkiyaw kinatalankan? Kaliskujwi xlakata nakaʼakxilhaw chuna la Jehová kaʼakxilha (2 Cor. 8:24).

16. ¿Tuku xlakata lu xlakaskinka nawan nalalimasiyaniyaw tapaxkit akxni lama nawan lhuwa tapatin? (Na kaʼakxilhti dibujo).

¹⁶ Akxni lama nawan lhuwa tapatin, lu xlakaskinka nawan nakapaxkiyaw kinatalankan. ¿La nakinkakuentajtlawayan Jehová akxni natsuku lhuwa tapatin? Kalilakpuwaw tuku kawanilh Jehová xkachikin xlakata xlakgtaxtukgolh akxni xʼamaka malakgsputukan Babilonia. Kawanilh: «Kapit, kinkachikin, katanu niku tlakg xatsekg kminchik chu kamalakchuwa mimalakcha. Kaj tsinu katatsekgti asta akxni nasputa tasitsi» (Is. 26:20). Max natalakaskin pi akinin na nastalaniyaw umakgolh tastakyaw akxni lama nawan lhuwa tapatin. Tachuwin «niku tlakg xatsekg kminchik» max kilhchanima congregaciones. Komo uma kilhtamaku makxtum nakatalayaw kinatalankan, Jehová nakinkakuentajtlawayan, chuna la xla malaknulh. Wa xlakata, lu xlakaskinka pi nakapaxkiyaw kinatalankan xliputum kinakujkan. Komo ni chuna natlawayaw max ni katilakgtaxtuw.

KALISKUJTI LA UKU

17. ¿Tuku tlan nakitaxtu akxni lama nawan lhuwa tapatin komo la uku naliskujaw nakgalhiyaw laktlan tayat?

¹⁷ Latamanin lu nalilakgaputsakgo akxni nachin «lanka xkilhtamaku Jehová» (Sof. 1:14, 15). Xlakskujnin Jehová na natitaxtuyaw tuku tuwa. Pero komo la uku naliskujaw nakgalhiyaw tayat nema nakinkamakgtayayan natayaniyaw akxni nachin, ni katipekuaw chu tlan nakamakgtayayaw amakgapitsin. Komo natayaniyaw, tlan namakgatlajayaw putum tuku nitlan natitaxtuyaw. Komo nalakgalhamaninanaw, lu naliskujaw xlakata natlawayaw putum tuku namatlaniyaw xlakata nakamakgtayayaw kinatalankan chu nakamaxkiyaw tuku namaklakaskinkgo. Chu tapaxkit nema kakgalhiniyaw, nakinkamakgtayayan makxtum natawilayaw. Jehová nakinkamaxkiyan latamat nema ni kgalhi xlisputni kʼakgtum kakilhtamaku niku nialh katiʼanalh tapatin chu tuku masputunan (Is. 65:17).