Kaʼakxilhti kuchu chuna la akxilha Dios

JEHOVÁ lhuwa tuku kinkamaskiwinitan, chu paxtikatsiniyaw xlakata kinkamaxkiyan talakaskin nalaksakaw la nalipaxuwayaw. Pulaktum tamaskiwin wa vino. Biblia wan: «Tlawakan kaxtalanchu xlakata nalipaxuwakan chu vino makgapaxuwa latamat» (Ecl. 10:19; Sal. 104:15). Pero max akxilhnitaw pi makgapitsi latamanin malakatsalikgo la wakgo kuchu. Chu xlakata tanu tanu la kamakgastakkanit chu tanu tanu xtalismaninkan, ni lakxtum tuku lakpuwankgo xlakata kuchu. Chu akinin kstalaninanin Cristo, ¿la kiliʼakxilhatkan?

Ni kamastaw talakaskin pi tuku lakpuwankgo latamanin niku lamaw o chuna la kinkamakgastakkanitan natlawa pi nawayaw o ni nawayaw kuchu, wata kuenta kilitlawatkan chuna la akxilha Dios kuchu. Komo chuna natlawayaw, tlakg napaxuwayaw.

Max na akxilhnitaw pi kkakilhtamaku lhuwa latamanin ni xmakgasni wakgo kuchu chu lhuwa wakgo. Wilakgo tiku wakgo kuchu kaj xlakata tlan namakgkatsikgo. Amakgapitsi kgotkgo xlakata napatsankgakgo xtaʼakglhuwitkan. Chu kmakgapitsi kachikinin latamanin kgotkgo xlakata nalimasiyakgo pi laklankata chu lu lakgtliwakgan.

Pero kstalaninanin Cristo kinkapulalinan xapaxkina kiMalakatsukinakan. Biblia kinkawaniyan tuku lu nitlan kitaxtu akxni kgachikan. Akgtum liʼakxilhtit, Proverbios 23:​29-35 lichuwinan chatum lataman tiku kgachi chu tukuya taʼakglhuwit limini.a Chatum kgolotsin xalak congregación xalak Europa tiku wanikan Daniel, lichuwinan la xwanit xlatamat akxni nina xtatayana Jehová xwanit. Xla wan: «Xlakata lu xakkgota, nitlan tuku klaksakli nema nitlan kinkitaxtunilh chu kimakgalipuwa».

¿Tuku nakinkamakgtayayan nalaksakaw tuku tlan chu ni namalakatsaliyaw la nawayaw kuchu? Kiliʼakxilhatkan kuchu chuna la akxilha Dios.

Kaʼakxilhti tuku wan Biblia xlakata kuchu chu tuku xlakata makgapitsi latamanin wakgo.

TUKU WAN BIBLIA

Xtachuwin Dios ni wan pi nipara tsinu nawayaw kuchu, wata wan pi tlan limakgkatsikan wakan vino. Eclesiastés 9:7 wan: «Kapit chu xatapaxuwan kawat miliwat chu xatapaxuwan kawat mivino». Biblia wan pi Jesús chu makgapitsi xlakskujnin Dios tiku ni makgxtakgkgolh wakgolh vino (Mat. 26:​27-29; Luc. 7:34; 1 Tim. 5:23).

Pero wakan tsinu kuchu ni wamputun pi tlan kgachikan. Biblia liwana wan: «Ni kakgachitit» (Efes. 5:18). Na wan pi «kgotnin […] ni katimakglhtinankgolh xTamapakgsin Dios» (1 Cor. 6:10). Chuna la akxilhaw, Jehová xkajni komo malakatsalikan akxni wakan kuchu o kgachikan. Ni kamastaw talakaskin pi tuku lakpuwankgo latamanin xlakata kuchu, natlawa pi nachuna natsukuyaw lakpuwanaw, wata kaliskujwi naʼakxilhaw chuna la akxilha Dios.

Wi tiku wan: «Akit tlan kwa lhuwa kuchu chu ni kkgachi». Pero lu nitlan kitaxtu chuna lakpuwankan. Biblia liwana wan pi tiku “malakatsalikgo akxni wakgo vino”, max natlawakgo laklanka talakgalhin chu nalaktlawakgo la talalinkgo Jehová (Tito 2:3; Prov. 20:1). Jesús wa pi tiku lhuwa kgotkgo ni katitanukgolh kxasasti kakilhtamaku (Luc. 21:​34-36). Wa xlakata, ¿tuku xlitlawat chatum kstalanina Cristo xlakata ni nasmanipasa kuchu?

KALILAKPUWANTI TUKU XLAKATA WAYA KUCHU, LA XLILHUWA CHU LA XLIMAKGASNI

Chuna la akxilhwi, lu nitlan xkinkakitaxtunin komo xlaksakwi nawayaw kuchu o ni nawayaw kaj xlakata la kinkamakgastakkanitan. Kstalaninanin Cristo kuenta kilitlawatkan pi tuku nawayaw chu tuku nalikgotnanaw, namakgapaxuwa Jehová. Biblia kinkamaxkiyan uma tastakyaw: «Komo wayampatit, o kgotnampatit, o katuwa tuku tlawapatit, putum chuna katlawatit xlakata namalankiyatit Dios» (1 Cor. 10:31). Kaʼakxilhwi makgapitsi takgalhskinin chu tastakyaw xalak Biblia nema kuenta kilitlawatkan.

¿Kwa kuchu kaj xlakata amakgapitsin tlan nakintalalinkgo? Éxodo 23:2 wan: «Ni kakastalani lhuwa latamanin». Jehová xkawanima israelitas pi ni xtlawakgolh tuku nitlan xtlawakgo latamanin. Chu uma tastakyaw chuntiya kinkamakgtayayan. Komo xtsukuw lakpuwanaw tuku lakpuwankgo amakgapitsin chu xtlawaw tuku tlawakgo, max xlakatsalaw xlimapakgsin Jehová chu xtamakgatliniw (Rom. 12:2).

¿Kwa kuchu xlakata naklimasiya pi akit lu tliwakga? Kmakgapitsi kachikinin lismanikan wakan lhuwa kuchu chu ni xlimakgasni (1 Ped. 4:3). Pero kaʼakxilhwi tuku wan 1 Corintios 16:13: «Skgalalh katawilatit, tliwakga kakgalhitit mintakanajlakan, ni kapekuantit, lakgtliwakga kawantit». Uma texto limasiya pi kgotkan ni tlawa pi chatum lataman tlakg tliwakga nawan, wata tlawa pi ni liwana nalakapastaknan chu nitlan tuku nalaksaka. Isaías 28:7 wan pi tiku kgotkgo nila lakatitum tlawankgo chu akgchakgxkgo.

Komo tlawaputunaw tuku tlan, talakaskin nalipawanaw Jehová, skgalalh natawilayaw chu tliwakga nakgalhiyaw kintakanajlakan (Sal. 18:32). Xlakata chuna natlawayaw, kuenta kilitlawatkan ni nalaksakaw tuku nalaktlawa chuna la talalinaw Jehová. Jesús chuna tlawalh akxni kilatamachi kKatiyatni, chu wa xlakata lhuwa latamanin xliʼakxilhkgo la chatum tliwakga chixku chu tiku ni xpekuan.

¿Kwa kuchu kaj xlakata nialh naklakapastaka kintaʼakglhuwit? Chatum salmista wanilh Jehová: «Akxni lu xaklilakgaputsama tuku nitlan xaktitaxtuma, wix xkimakgoxamixiya chu skaya xkimamakgkatsiniya» (Sal. 94:19). Komo wi tuku lilakgaputsapat, ni kaputsa kuchu, wata kaputsa Jehová. Chuna natlawaya komo ankgalhin natlawaniya oración. Lhuwa natalan na lu kamakgtayanit akxni kaskinikgo tastakyaw natalan tiku tliwakga kgalhikgo xtakanajlakan. Akxni wi tiku putsa kuchu xlakata napatsankga xtaʼakglhuwit, tuwa namakgkatsi nalakgmakgan tuku nitlan chu natlawa tuku xlilat (Os. 4:11). Daniel, tiku lichuwinawa, wan: «Xakmakgatlajaputun talakgaputsit chu tuku nitlan xakmakgkatsi xlakata xaktlawanit tuku nitlan. Xakkgota xlakata nakpatsankga tuku xaktitaxtuma, pero wata tlakg xkilimini taʼakglhuwit chu xakkamakgatsankgama kiʼamigos». ¿Tuku makgtayalh? Xla wan: «Kʼakgatekgsli pi xtalakaskin naklipawan Jehová, chu ni wa kuchu. Xlakata Jehová kimakgtayalh, ktayanilh tuku tuwa xaktitaxtuma». Kalakapastakwi pi maski tasiya pi nialhla tuku tlawayaw, Jehová ankgalhin nakinkamakgtayayan (Filip. 4:​6, 7; 1 Ped. 5:7).

Komo min kilhtamaku waya kuchu, kalilakpuwanti umakgolh takgalhskinin: «¿Chatum tiku xalak kifamilia o chatum kiʼamigo kiwaninit pi kililakgaputsa xlakata kmalakatsalima chuna la kwa kuchu?». Xatakgalhtin nalimasiya komo kinkasmanipasaman kuchu. «¿La uku tlakg kwa kuchu nixawa xapulana?». Xatakgalhtin nalimasiya pi maski ni kinkasmanipasanitan kuchu, max tsinu tsinu kinkasmanipasaman. «¿Tuwa kmakgkatsi ni nakwa kuchu makgapitsi kilhtamaku?». Xatakgalhtin nalimasiya pi kinkasmanipasanitan kuchu. Komo chuna kinkaʼakgspulaman, talakaskin naputsayaw tiku nakinkamakgtayayan xlakata namakgxtakgaw uma talismanin.

Xlakata ni nakasmanipasa kuchu, makgapitsi kstalaninanin Cristo laksakkgonit ni nawakgo nipara tsinu. Wilakgo amakgapitsi natalan tiku ni wakgo kuchu kaj xlakata ni lakgatikgo la takgalhwanan. Komo lakgapasaw tiku laksaknit ni nawa kuchu, kamaxkiw kakni tuku laksaknit chu ni kawaw pi tuku laksakli nitlan.

Makgapitsi akxilhkgonit pi tlan kakitaxtuni akxni lakkaxwilikgo la xlilhuwa nawakgo kuchu, la xlimakgasni, komo nawakgo aktsu akxni nawayankgo o kaj makgtum nawakgo akgatunu semana. Amakgapitsi laksakkgo tukuya kuchu nawakgo. Akgtum liʼakxilhtit, makgapitsi wakgo vino chu cerveza, pero ni malakatsalikgo, chu ni wakgo tuku lakapala likgachikan asta maski kaj wi tuku talakgtlawakanit xlakata ni lu nalitakgalhwanan kuchu. Komo liwana nalilakpuwaw la xlilhuwa nawayaw kuchu, tlakg ni tuwa katimakgkatsiw ni namalakatsaliyaw. Akxni wi tiku chuna nalaksaka ni xlilat nalimaxanan tuku laksaknit.

Nachuna, kuenta kilitlawatkan tuku lakpuwankgo amakgapitsin. Romanos 14:21 wan: «Tlakg tlan ni nawaya liway o nawaya vino o natlawaya katuwa tuku nalimaʼakgchakgxniya mintala». Uma wamputun pi kuenta kilitlawatkan tuku lakpuwankgo amakgapitsin chu nakalimasiyaniyaw tapaxkit. Komo akxilhaw pi chatum tala nitlan akxilha wakan kuchu, max nalaksakaw ni nawayaw kxlakatin xlakata paxkiyaw. Chuna nalimasiyayaw pi kamaxkiyaw kakni tuku lakpuwankgo amakgapitsin, chu ni kajwatiya tlawayaw tuku tlan nakinkakitaxtuniyan (1 Cor. 10:24).

Nachuna, kstalaninanin Cristo kilikgalhakgaxmatatkan limapakgsin nema mapakgsinanin wilikgonit xlakata kuchu. Akgtum liʼakxilhtit, max wi limapakgsin pi ni nawakgo kuchu tiku laktsujku o tiku namatlawanikgo putlaw o namaskujukgo máquinas (Rom. 13:​1-5).

Jehová kinkamaxkinitan talakaskin nalaksakaw la nalipaxuwayaw tuku kinkamaskiwinitan. Wa xlakata, putum akinin tlan nalaksakaw tuku nawayaw chu tuku nalikgotnanaw. Ankgalhin liwana kamaklakaskiw uma tamaskiwin chu kalimasiyaniw kinTlatkan xalak akgapun pi makgapaxuwaputunaw.