Tsumat, kaliskujti tlakg tlan kstalanina Cristo nalitaxtuya

1. ¿Tuku kilitlawatkan xlakata lu tlan kstalaninanin Cristo nalitaxtuyaw?

¿NI XLIKANA pi lu kaks kinkamalakawaniyan chuna la xlilakapala staka chatum aktsu kgawasa? Tasiya pi ni talakaskin naliskuja. Pero xlakata tlakg tlan kstalaninanin Cristo nawanaw, talakaskin lu naliskujaw (1 Cor. 13:11; Heb. 6:1).b Xlakata tlakg tlan kstalaninanin Cristo nawanaw, talakaskin namatliwakglhaw chuna la talalinaw Jehová. Na maklakaskinaw xtamakgtay xʼespíritu santo xlakata nakgalhiyaw xalaktlan tayat chu wi tuku nakatsiniyaw tlawayaw nema nakinkamakgtayayan alistalh (Prov. 1:5).

2. ¿Tuku kinkamasiyaniyan Génesis 1:27? ¿Chu tuku nalichuwinanaw kʼuma artículo?

² Jehová katlawalh latamanin, xla tlawalh chixku chu puskat (kalikgalhtawakga Génesis 1:27). Pero lakchixkuwin chu lakpuskatin ni lakxtum tasiyakgo, chu ni kajwatiya xmaknikan ni lakxtum, na wi atanu tuku litalakgpalikgo. Akgtum liʼakxilhtit, Jehová tanu tanu taskujut kalakgayawalh lakchixkuwin chu lakpuskatin, chu xlakata tlan namakgantaxtikgo talakaskin tanu tanu tayat nakgalhikgo chu tanu tanu tuku nakatsinikgo tlawakgo (Gén. 2:18). Kʼuma artículo, nalichuwinanaw tuku xlitlawatkan laktsuman xlakata tlakg tlan kstalaninanin Cristo nalitaxtukgo. Chu kʼatanu artículo naʼakxilhaw tuku xlitlawatkan lakgkgawasan.

KALISKUJTI NAKGALHIYA TAYAT NEMA MAKGAPAXUWA JEHOVÁ

3, 4. ¿Niku tlan natekgskgo laktsuman xatlan liʼakxilhtit? (Na kaʼakxilhti dibujos).

³ Biblia lichuwinan lhuwa xliʼakxilhtitkan lakpuskatin tiku skujnanikgolh Jehová chu xpaxkikgo (kalikgalhtawakga artículo «¿Qué aprendemos de las mujeres de la Biblia?» kjw.org). Chuna la wan texto niku takilhtinit uma artículo, xlakan ni xmalakatsalikgo tuku xlismanikgo tlawakgo, xliputum tuku xtlawakgo limasiyakgolh xtakanajlakan. Kmincongregación max na wilakgo natalan tiku lu tlan kstalaninanin Cristo litaxtukgo chu lhuwa tuku tlan namasiyanikgoyan.

⁴ Komo wix tsumatku, kalilakpuwanti makgapitsi natalan tiku wilinikgoyan lu tlan liʼakxilhtit chu katlawa tuku tlawakgo. Kuenta katlawa xatlan tayat nema kgalhikgo chu alistalh kalilakpuwanti tuku tlan xtlawa xlakata na nakgalhiya umakgolh tayat. Kʼatanu párrafos nalichuwinanaw pulaktutu tayat nema xlikgalhitkan putum lakpuskatin tiku lu tlan kstalaninanin Cristo litaxtukgo.

5. ¿Tuku xlakata xlitaktujutkan lakpuskatin tiku kstalaninanin Cristo litaxtukgo?

⁵ Tataktujut. Puskat tiku taktuju, tlan talalin Jehová chu tlan katalalin amakgapitsin (Sant. 4:6). Akgtum liʼakxilhtit, xlakata taktuju chu paxki xTlat xalak akgapun, laksaka nakakgalhakgaxmata tiku Jehová kalakgayawanit napulalinkgo congregación chu familia (1 Cor. 11:3).c

6. ¿La tlan nastalanikgo laktsuman xliʼakxilhtit Rebeca?

⁶ Kalichuwinaw Rebeca. Xla lu skgalala xwanit chu ni xpekuan akxni wi tuku xlitlawat xwanit chu liwana xkatsi la natlawa (Gén. 24:58; 27:​5-17). Pero na xmasta kakni chu xkgalhakgaxmatnan (Gén. 24:​17, 18, 65). Komo wix na nataktujuya chuna la Rebeca, chu nakakgalhakgaxpata tiku kgalhikgo limapakgsin, lu tlan liʼakxilhtit nakawiliniya mifamilia chu putum congregación.

7. ¿La tlan nastalanikgo laktsuman xliʼakxilhtit Ester?

⁷ Litayakan pi nila putum tlan tlawakan. Biblia wan pi «kgalhi liskgalala tiku ni lakpuwan pi putum tlan tlawa» (Prov. 11:2). Chatum kskujni Jehová tiku limasiyalh uma tayat wa Ester. Akgtum liʼakxilhtit, akxni mapakgsina limaxtuka, ni tatlankilh. Na xkgaxmata chu xtlawa tuku xwani xtapuxnimat, Mardoqueo (Est. 2:​10, 20, 22). Wix tlan nastalaniya xliʼakxilhtit Ester komo nakaskiniya tastakyaw amakgapitsin chu natlawaya tuku nawanikgoyan (Tito 2:​3-5).

8. Akxni nalaksakkgo la nalhakganankgo chu la natakaxtayakgo, ¿la tlan nastalanikgo natalan lakpuskatin xtastakyaw 1 Timoteo 2:​9, 10?

⁸ Ester na kamaxkilh kakni amakgapitsin. Maski xla «lu lilakgatit xwanit chu stlan xtasiya», ni xlakaskin pi kajwatiya xla xʼakxilhka (Est. 2:​7, 15). ¿La tlan nastalaniya xliʼakxilhtit? Pulaktum tuku tlan natlawaya wa tuku lichuwinan 1 Timoteo 2:​9, 10: «Lakpuskatin xlilhakganatkan chuna la nakalimaxkikan kakni, chuna la xlilat, kalimasiyakgolh tlan talakapastakni, ni xatuwa takgonkgxni namaklakaskinkgo kxchixitkan chu nipara oro o perlas o xalaktapalaxla lhakgat, pero xlitakaxtayatkan chuna la xlilat, la lakpuskatin tiku ni makgxtakgkgo Dios. Xlitlawatkan laktlan taskujut, wa uma tuku nalitakaxtayakgo». Apóstol Pablo kawani natalan lakpuskatin pi kalhakganankgolh chuna la xlilat chu kalimasiyakgolh tlan talakapastakni. Xlakata chatum puskat nalimasiya kakni, talakaskin pi xtalhakgan nalimasiya pi kuentajtlawa tuku lakpuwankgo amakgapitsin. ¡Lu tlan limakgkatsiyaw pi kinatalankan lakpuskatin limasiyakgo pi kgalhikgo tliwakga takanajla chu xtalhakgankan kalimaxkikgo kakni amakgapitsin!

9. ¿Tuku kinkamasiyaniyan xliʼakxilhtit Abigaíl?

⁹ Liwana lakapastaknankan. Wa uma atanu tayat nema xlikgalhitkan lakpuskatin tiku lu tlan kstalaninanin Cristo litaxtukgo, uma wamputun pi liwana katsikgo tuku tlan chu tuku nitlan, chu tlawakgo tuku tlan. Kalichuwinaw xliʼakxilhtit Abigaíl. Xchixku nitlan tuku laksakli, chu xla akxilhli pi lu nitlan tuku xʼama kakitaxtuni putum tiku xtapakgsikgo kxchik. Abigaíl wi tuku lakapala tlawalh, chu xlakata liwana lakapastaknalh kalakgmaxtulh lhuwa latamanin (1 Sam. 25:​14-23, 32-35). Nachuna, akxni liwana lakapastaknanaw kinkamakgtayayan nakatsiyaw tuku kilhtamaku nachuwinanaw chu tuku kilhtamaku tlakg tlan nawan nitu nawanaw, chu kinkamakgtayayan akxni katachuwinanaw amakgapitsin xlakata ni nakakgalhskinaw tuku ni kilikatsitkan o tuku nitlan nalimakgkatsikgo (1 Tes. 4:11).

WI TUKU KAKATSINI NATLAWAYA

10, 11. ¿La nalitamakgtayaya komo nakatsiniya liwana nakgalhtawakgaya chu natsokgnana? (Na kaʼakxilhti dibujo).

¹⁰ Tlan nawan pi lakpuskatin tiku kstalaninanin Cristo litaxtukgo wi tuku nakatsinikgo tlawakgo. Makgapitsi tuku nakatsiniya akxni aktsujku wix, nalitamakgtayaya putuminika kmilatamat. Kalichuwinaw makgapitsi liʼakxilhtit.

¹¹ Kakatsini liwana nakgalhtawakgaya chu natsokgnana. Kmakgapitsi kachikinin lakpuwankan pi ni xlakaskinka pi lakpuskatin nakatsinikgo kgalhtawakgakgo chu tsokgnankgo. Pero putum kstalaninanin Cristo xlikatsinitkan uma (1 Tim. 4:13).d Wa xlakata ni kamasta talakaskin pi wi tuku natlawa ni nakatsiniya nakgalhtawakgaya chu natsokgnana. ¿La nalitamakgtayaya komo nakatsiniya uma? Pulana, tlakg ni tuwa katitekgsti taskujut chu ni tuwa katimakgkatsi nakgalhiya tuku maklakaskina. Nachuna, tlakg tlan nalikgalhtawakgaya chu namasiyaya xTachuwin Dios. Pero tuku tlakg tlan, wa pi akxni nalikgalhtawakgaya Biblia chu nalilakpuwana, namakgtayayan tlakg tlan natalalipina Jehová (Jos. 1:8; 1 Tim. 4:15).

12. ¿Tuku masiyaniyan Proverbios 31:26?

¹² Kakatsini nakatakgalhchuwinana amakgapitsin. Lu xlakaskinka pi putum kstalaninanin Cristo nakatsiniyaw uma. Discípulo Santiago kinkamaxkin uma lu tlan tastakyaw xlakata la nakatakgalhchuwinanaw amakgapitsin: «Lakapala nakgaxpatatit, pero ni lakapala natsukuyatit chuwinanatit» (Sant. 1:19). Akxni kaks kgaxmatniyaw tiku kinkatachuwinaman, limasiyayaw pi na makgkatsimaw tuku makgkatsima (1 Ped. 3:8). Komo ni liwana katsiya pi akgatekgspat tuku waniman o tuku makgkatsi tiku tachuwinampat, katlawani takgalhskinin. Chu pulana kalilakpuwanti tuku nawaniya (Prov. 15:​28, nota). Kalilakpuwanti umakgolh takgalhskinin: «¿Xlikana tuku nakwani? ¿Namakgpuwantini? ¿Nalimasiya pi kmaxki kakni? ¿Tlan nalimakgkatsi?». Kakalilakpuwanti natalan lakpuskatin tiku tliwakga kgalhikgo xtakanajlakan chu lu katsinikgo katakgalhchuwinankgo amakgapitsin, chu kastalani xliʼakxilhtitkan (kalikgalhtawakga Proverbios 31:26). Kaʼakxilhti tuku wankgo chu la wankgo. Kalitsakgsa chuna natlawaya chu chuna la natitaxtu kilhtamaku naʼakxilha pi uma namakgtayayan tlakg tlan nakatalalipina amakgapitsin.

13. ¿La tlan nakatsiniya naskuja kchiki? (Na kaʼakxilhti dibujo).

¹³ Kakatsini natlawaya taskujut kchiki. Klakalhuwa kachikinin, lakpuskatin tlawakgo lhuwa taskujut xalak chiki. Max mintse o atanu tala tiku katsini tlawa uma taskujut, tlan namasiyaniyan la natlawaya. Chatum tala tiku wanikan Cindy, wan: «Pulaktum lu xatlan tamaskiwin nema kimaxkilh kintse wa pi kimasiyanilh pi akxni lhuwa skujkan, paxuwakan. Xlakata kkatsinilh naktlawa kiliwat, nakkaxaka kkinchik, naktsapanan chu naktamawanan, kimakgtayanit kkilatamat chu kimaxkinit talakaskin tlakg nakskujnani Jehová. Kintse na kimasiyanilh pi xatapaxuwan xakkamakgamakglhtinaw amakgapitsin, chu xlakata chuna xaktlawayaw, kkalakgapasli lhuwa natalan tiku lu tlan xlikatsikgo chu lhuwa tuku kimasiyanikgolh» (Prov. 31:​15, 21, 22). Lakpuskatin tiku lu lakskulujwan, tiku xatapaxuwan kamakgamakglhtinankgo amakgapitsin chu katsinikgo tlawakgo taskujut xalak chiki, akgtum tasikulunalin litaxtukgo kxfamiliajkan chu kcongregación (Prov. 31:​13, 17, 27; Hech. 16:15).

14. ¿Tuku masiyaniyan xliʼakxilhtit Crystal, chu tuku tlakg kuenta militlawat?

¹⁴ Kakatsini natlawaya akgtum taskujut. Putum kstalaninanin Cristo tiku tliwakga kgalhikgo xtakanajlakan, xlikatsinitkan la namakgskujkgo xlakata nakgalhikgo tuku maklakaskinkgo (Filip. 4:11). Chatum tala puskat tiku wanikan Crystal, wan: «Akxni aku xakstakma chu xakkgalhtawakgamajku, pulaklhuwa tuku xkinkamasiyanikanan kʼescuela nema tlan xaklaksakli nakkatsini, chu kinatlatni xkiwanikgo pi xakkatsinilh tuku xʼama kimakgtaya. Akgtum liʼakxilhtit, kintlat kiwanilh pi xakkatsinilh contabilidad, chu uma lu kimakgtayalh». Pero ni kajwatiya talakaskin nakatsiniya makgskuja, na milikuentajtlawat mintumin (Prov. 31:​16, 18). Komo naliskuja ni nalaklipina tumin chu nalipaxuwaya maski ni lhuwa tuku kgalhiya, namakgtayayan wa kuenta natlawaya tuku tlakg xlakaskinka, namatliwakglha mintakanajla (1 Tim. 6:8).

KATLAWA TUKU NAMAKGTAYAYAN KKILHTAMAKU NEMA AKU MIMA

15, 16. ¿Tuku xlakata lu lanka xtapalh litaxtukgo laktsuman? (Marcos 10:​29, 30).

¹⁵ Komo naliskuja nakgalhiya tayat nema makgapaxuwa Jehová chu wi tuku nakatsiniya natlawaya nema namakgtayayan, lu tlan nakitaxtuniyan alistalh. Kaʼakxilhwi makgapitsi tuku tlan xtlawa.

¹⁶ Tlan nina xtamakgaxtokgti. Chuna la Jesús wa, wi tiku laksakkgo ni natamakgaxtokgkgo maski niku lamakgo, latamanin kawanikgo pi katamakgaxtokgkgolh (Mat. 19:​10-12). Amakgapitsin atanu tuku xlakata ni tamakgaxtokgkgo. Komo wix nina tamakgaxtokga, liwana kakatsi pi Jehová chu Jesús lu xtapalh liʼakxilhkgoyan. Kxlikalanka katiyatni, natalan laktsuman lanka xtapalh litaxtukgo kcongregaciones. Tapaxkit nema limasiyakgo chu xlakata kalilakgaputsakgo amakgapitsin, tlawa pi natalan la xnatsetnikan chu xnatalankan nakaliʼakxilhkgo (kalikgalhtawakga Marcos 10:​29, 30; 1 Tim. 5:2).

17. ¿Tuku nakamakgtaya natalan laktsuman naskujnanikgo Jehová putum kilhtamaku?

¹⁷ Tlan kskujni Jehová putum kilhtamaku. Natalan lakpuskatin wa tiku tlakg lichuwinankgo Dios kxlikalanka katiyatni (Sal. 68:11). ¿Tlan xlakkaxwili naskujnaniya Jehová putum kilhtamaku? Max tlan precursora o betelita xlitaxtu, o xmakgtayananti niku katlawakan Pukgalhtawakga. ¿Tuku namakgtayayan? Katlawani oración Jehová, kakatachuwinanti tiku skujnanimakgo Jehová putum kilhtamaku chu kakgalhskininanti tuku talakaskin namakgatsiya. Alistalh katsokgwili tuku tlan natlawaya xlakata nalakgchipina. Komo naskujnaniya Jehová putum kilhtamaku, tipalhuwa la tlan namakgtayanana kxkachikin.

18. ¿Tuku xlakata chatum tala tsumat liwana xlilaksakat tiku natatamakgaxtokga? (Na kaʼakxilhti dibujo).

¹⁸ Tlan xtamakgaxtokgti. Tayat chu tuku nakatsiniya natlawaya nema lichuwinanitawa, namakgtayayan tlan puskat nalitaxtuya. Komo tamakgaxtokgputuna, liwana mililaksakat tiku natatamakgaxtokga. Uma wa tuku na tlakg xlakaskinka nalaksaka kmilatamat. Kalakapastakti pi chixku tiku natatamakgaxtokga, miʼakgxakga nalitaxtu (Rom. 7:2; Efes. 5:​23, 33). Wa xlakata, kalilakpuwanti: «¿Tliwakga kgalhi xtakanajla? ¿Tasiya pi tuku tlakg xlakaskinka liʼakxilha wa tuku xla xtakanajla? ¿Tlan tuku laksaka? ¿Litaya tuku nitlan tlawa? ¿Kamaxki kakni lakpuskatin? ¿Nakimakgtaya chuntiya tlan naktalalin Jehová, nakimaxki tuku kmaklakaskin chu naʼakgatekgsa tuku kmakgkatsi? ¿Liwana makgantaxti tuku lakgayawakanit? ¿Tuku lakgayawakanit kcongregación, chu la makgantaxti?» (Luc. 16:10; 1 Tim. 5:8). Pero kalakapastakti pi komo tekgsputuna chatum tlan chixku, na miliskujat xlakata tlan puskat nalitaxtuya.

19. ¿Tuku xlakata wanaw pi akgtum lanka talakgalhaman “makgtayana” litaxtukan?

¹⁹ Biblia lichuwinan pi chatum tlan puskat, «xmakgtayana» xchixku litaxtu (Gén. 2:18). ¿Maktuju uma chatum puskat? Nichuna, wata akgtum lanka talakgalhaman. Asta Biblia lichuwinan pi Jehová “makgtayana” litaxtu (Éx. 18:4; Heb. 13:6). Puskat tiku tlan makgtayana litaxtu, tataya tuku laksaka xchixku xlakata xfamilia chu makgtayanan xlakata tlan nakitaxtu. Nachuna, xlakata lu paxki Jehová, liskuja tlan nalichuwinankan xchixku (Prov. 31:​11, 12; 1 Tim. 3:11). Komo lakpuwampat natamakgaxtokga, la uku kaliskujti namatliwakglha tapaxkit nema kgalhiniya Jehová xlakata tlan puskat nalitaxtuya, chu kaliskujti la uku xlakata tlan “makgtayana” nalitaxtuya kminchik chu kcongregación.

20. ¿La makgtaya xfamilia chatum tlan tse?

²⁰ Tlan xkgalhi kamanan. Komo natamakgaxtokga, max nakgalhiya kamanan (Sal. 127:3). Wa xlakata, tlan nawan nalilakpuwana tuku xlitlawat chatum xatlan tse. Tayat chu tuku nakatsiniya natlawaya nema lichuwinanitaw kʼuma artículo lu namakgtayayan. Komo nalimasiyaya tapaxkit, tlan nalikatsiya chu ni lakapala nasitsiya, namakgtayanana xlakata mifamilia napaxuwa chu minkamanan nitu nalipekuankgo chu namakgkatsikgo pi kapaxkikan (Prov. 24:3).

21. ¿La xlilhuwa xtapalh kaliʼakxilha wix natalan laktsuman, chu tuku xlakata? (Kaʼakxilhti xmakni revista).

²¹ Natalan laktsuman, lu kkapaxkiyan xlakata lu skujnaniyatit Jehová chu makgtayananatit kxkachikin (Heb. 6:10). Na liskujatit nakgalhiyatit laktlan tayat, nakatsiniyatit tuku nakamakgtayayan chu nakamakgtaya amakgapitsin, chu liskujatit nakatsiniyatit tuku nakamakgtayayan kkilhtamaku nema aku mima. ¡Lu xlakaskinka litaxtuyatit kxkachikin Jehová!